ꀋꑍꊂ，ꆃꎭꆈꌠꊨꏦꏱꅉꍏꐥꊈꀋꉬꁰꁱꍸꇐꀧꌋꃅꈯꄜꀞꄻꌠ2024ꈎ“ꁰꁱꌋꆀꋌꐛꍸꇐꋩꑍ”ꆃꎭꀋꂿꑘꃅꀕꈩꌠ——2024ꆃꎭꆈꌠꃢꈪꈚꈷꃆꂮꍔꀦꃅꈩꌠꌌꀒꎂꏃꄔꊏꈩꅉꈚꌠꇬꄉꃅꈩꌐꀐ。
ꆃꎭꍏꐥꊈꀋꉬꁰꀕꍸꇐꀧꌋꃅꈯꄜꇬꐥꌠꆈꌠꃢꃅꈚꎔꎥꃪꌧꃀꀊꐚꆿꋒꉉꇬ：ꆈꌠꃢꌧꈚꄙ、ꃢꅋꈚꑣ、ꃢꈪꈚꈷꐘꃆꋋꐘꆹꇩꏤꊐꌠꃤꉬ。ꀋꃅꊪꊛꊿꀉꇨꑠꀉꑌꃅꐥ，ꌜꊐꌠꊪꊛꊿꆏꀊꑞꃴꎓꃀ（ꀋꃅꇬꊎꇩꏤꊐꌠꐥꊈꀋꉬꁰꁱꍸꇐꊪꊛꌠꊿꇖꂟꐺꇰ）ꏤꋋꈨꐥ。ꐘꃆꋋꐘꀋꉬꀋꉆꌠꆏ，ꆺꃅꏪꐦ、 ꑞꋯꃺꄧ、ꐟꈮꇤꇉꑤꋋꌕꂷꌌꀋꂿꑘꃅꄉꇈꅉꃀꃅꄉꍏꑭꊂꐥꊈꀋꉬꁰꁱꍸꇐꈯꄜꇬꎍꑠꐘꉬꑴꄷ。
ꃢꈪꈚꈷꐘꃆꋌꐘꆹꌌꊪꊛꌋꆀꍔꆙꇬꈲꏣꀉꑌꁁꏯꃅꄉꐥ。ꋍꍈꌠꆏ：ꆈꌠꀎꋏꃤꇮꇐꑴꇐ、ꌧꇐꂿꇐꉾꃪꄞꅐꋋꈨꌠꀒꁨꋍꁘꃅꄉꌌꉹꁌꏭꄜꉺ，ꈀꄸꑌꇫꅉꐚꎻꇈ，ꌶꑣꇬꀊꅰꃅꍑ。ꑍꍈꌠꆏ：ꆈꌠꃢꈪꈚꈷ，ꃢꅋꈚꑣ，ꃢꌧꈚꄙꋋꈨꌠꆏ，ꋍꏅꅫꃀꌱꃀꑠꄚꄉꇮꇐꑴꇐꁦꎆꈭꐨ，ꃷꎏꌋꆀꐮꑌꐯꑲꄉꃷꄻꇈꎆꊌꋚꊊꇁꄎ，ꎆꋚꍈꎹꌊꀉꑳꄯꒉꌶꁌꃅ。ꃢꈪꈚꈷꋋꈨꃅꄉꎆꎹꋚꈹꇈ，ꈜꀕꐥꌑꄻꌒꑠꑌꀉꑌꃅꐥ。ꄚꂱꑱꃅꈋꇬ，ꌋꅪꉻꏑꅉ，ꑤꊈꄨꊈ，ꌧꇐꁰꁱꌤꃅꅉꈧꌠꇬꈴꄉꊥꇺꄉꇈꑲꆀ，ꅫꃀꌱꃀꌌꄉꌶꄻꌋꆀꁰꍋꇈ，ꇇꑘꇮꇐꃆꂮꋋꈨꀉꑌꃅꌧꇁ，ꀉꑌꃅꇮꇁ，ꃢꈜꀉꑌꃅꈪꄎꇁ，ꈪꑌꈪꌌꄉꋽꇁ，ꈪꌊꄉꉾꃪꇁ，ꋋꈨꀂꏽꊌꐨꐥꌠꀉꑌꃅꐥ。
ꉈꑴꆏ，ꆿꁮꀒꎂꀉꄂꀋꉬꃅ，ꂱꑱꑤꏃꈧꌠꇬꑌꆈꌠꃢꈜꈪꈷ，ꆈꌠꃢꈜꈪꅉꄺꅉꑠꃼꇇꃅꑲꌧꇁ，ꅫꃀꌱꃀꇮꇐꌧꐨꃅꐨꁦꎆꇁꌠꀉꑌꃅꐥ。ꄚꌶꅉꋍꈨꋋꈨꄹꁆꇬꑌ，ꌶꌺꀉꑳꋋꈨꌠꀄꊭꃅꇬꇤꇬꂘꄉꇈꑲꆀ，ꆈꌠꃢꃅꈚꎔꌋꆀꃢꌧꈚꈷꃆꂮꌧꇈ，ꌧꇐꁰꁱꁦꎆꃅꌌꇬꊎꁊꈴꃅꌷꌠꑌꀉꑌꃅꐥꀐꄷ。
ꃶꐚꃅꉉꇬ，ꃅꐎꋋꈍꑋꈓ，ꆃꎭꆈꌠꃅꄷꆹꃢꃅꈚꎔꈪꇁꈚꅉꃅ，ꏀꀺꆹꊛꏽ，ꈪꋒꑣꋒ，ꊿꋅꁰꁱꁯꇐꅑꌠꀋꃷꎵ。ꁰꁱꍸꇐꊪꇁꊛꅉꃅ，ꐩꋊꁱꏣꀋꈘꏡ，ꃅꋊꅇꎔꁱꇁꇱꅉꃅ。ꋋꆹꇩꏤꇗꅉꂄꌠꌋꆀꐥꐨꇎꏦꃪ，ꃼꇇꃅꀰꏢꋦꈭꑠꑌꄻꌊꎃꊒꇬꎷꄉ，ꂿꑘꁡꇤꆈꌠꅫꃀꌱꃀꑠꀁꇬꑌꄉꏀꀺꑘꀺꑘꒃꌐꀐ。ꋋꆹꀊꅰꃅꄉꇈꑣꋂꄖꄑꌄꆣꀻꎆꄹꆷꌠꏭꀉꒉꃅꊋꇱꇈꊋꁈꄏꀐꌠꉬ。 （ꁱꍑ/ꀋꅙꏂꆿ ）
