阿克鸠射||小说《梦落无痕殇依旧选》（初稿）选1—6

二维码

阿克鸠射阿克鸠射de笔记 2024-01-04 21:21

ꒉꄩꇓꋒꋉ ꇓꋒꊿꇢꏿ

—ꀉꈌꏬꌋ —

ꃰꊿꐥꐨꆹ

ꄯꒉꋍꋐꌡ

ꑫꑵꋍꁬꌡ

ꆧꁨꁠꀕꌡ

ꎧꏸꋍꍔꌡ

ꑵꉙꋍꊱꌡ

ꁬꃨꋍꀮꌡ

ꄇꇉꋍꇷꌡ

ꀄꂼꋍꈁꌡ

……

——ꁱꂾꅇ

ꋍ

ꃅꐨꑍꄜꆹꎍꊿꂶꌠꆹꌶꅉꇬꄉꌌꁨꊙꌬꏹꍓꈧꌠꇬꑓꊒꀕꃅꎖꉚꇁꋋꄹꉈꂵꆤꈍꐯ，ꃷꐕꃮꌺꆹꀋꆏꃅꎇꇁꀀꅉꈐꏮꄉꀀꑌꇴꇬꎷꑴꌦ。

ꃅꅍꊌꄐꂘꌤꃅꅉꇬꍗꏓꂶꌠꆹ，ꂵꆤꇰꆐꀋꆏꃅꃷꐕꃮꌺꅿꇇꌭꄆꅇꂶꌠꅥꅷꐺ，ꋍꏭꂘꎥꆹꄹꊐꑳꑍꂷꀕꌠ2012ꁨꌠꇬꄉꑓꊒꀕꃅꎖꉚꃅꆹꄷꇤꅷꐺ，ꊜꋽꄮꊌꄮꊌꀋꉆꑵꉬ，ꏟꈯꃅꒃꇇꈐꊐꄷꊡꀱꅷꐺ。ꄚꃷꐕꃮꌺꂶꌠꆹꈍꃅꑋꇬꄷꀋꈴꉌꀋꃹꐛꅹ，ꈛꎂꃅꇇꌭꄆꅇꂶꌠꋌꇱꈢꇬꎭꇈ，ꁱꀋꐭꃅꇬꄘꑣꐺꌠꉬ。ꋋꇅꆏ，ꀀꅉꇬꄆꅇꊪꇖꂾꃚꆹꋍꇅꆏꋍꇅꄹꊋꑌꃅꏅꇁꇬꎷꐛꅹ，ꃷꐕꃮꌺꌌꉪꇁꇬꇫꇖꅒꀋꄐꐛꅹ，ꑓꋪꊼꇅꍀꑣꄉ，ꈛꎂꃅꀀꄓꇁꇈ。ꇁꌊꅊꁧꒈꅉꇬꄉꀇꐒꁉꈢꅍꏡꌠꏀꄉ，ꑓꏭꑊꈷꇓꇬꉜꄉꀂꏾꀬꈁꑓꋌꇈ，ꑬꆹꇇꆹꁱꈍꉘꏢꐛꈭꐨꑳꆀꁖꇁꀀꑳꄇꃀꁬꌠꇬꈴꁖꅊꁧꇁ。

ꄮꐰꆹꁮꏮꄮꇬꉬꐛꅹ，ꂵꆤꈨꑭꆹꀋꆏꃅꊸꆚꁊꃑꎼꇁꄉ，ꑱꈐꆹꋎꁁꌊꀙꐮꀙ，ꂵꆤꈍꐯꀀꑌꇴꇬꆹꊋꒉꌠꆏꀀꀋꌒꑵ。ꃷꐕꃮꌺꂶꌠꀉꄂꀀꑌꇴꈭꐨꆏꋋꀉꁁꆹꌤꃅꅍꀋꊌꌠꌡꇬꎌ。ꈄꏍꈩꂯꇬ，ꂵꆤꈩꇬꆹꈩꀋꌒꃅꐙ，ꈄꏍꈩꐋꈧꌠꆹ，ꈀꄸꑌꉬꇮꃅꂱꑱꌤꑘꃛꀙꌐ。ꄯꒉꌶꌠꆹ，ꀊꅰꃅꉌꎭꌠꌤꐘꉬ，ꌷꊭꋋꇅꃅꌐꂯꀐ，ꇯꍝꃅꐙꄏꇁꇈ，ꀋꇊꆏꋰꄉꀋꄐꀑꌠꌡ。

ꃷꐕꃮꌺꆹꀋꃅꆏꒉꌶꅉꌕꈎꊐꌠꇬꌶꐺ，ꋋꌷꌠꆹꃅꑘꂘꑴꀊꂥꊐꐘꌠꉈꄅꃆꂮꐥꌠꌧꇐꑵꌠꉬ，ꉈꑴꋍꁁꏯꃅꄉꉉꇬꆏꎼꈎꃅꎸꄮꐰꆏꋋꆹꌶꅐꀐ。ꌶꅉꏤꄉꇬꆹ，ꌶꌺꅿꐧꋦꄐꅍꐥꁆꏯꌌꀉꇨꆹꌠꎁꃅ，ꌷꅷꒉꌕꈎꊐꌠꇬꃹꈭꐨꆏꐧꋦꃄꄻꅉꇬꐊꉆꀐ，ꅀꄅꃅꃅꅍꎹꄉꃅꉆꌠꉬ。

ꃷꐕꃮꌺꆹꌷꅷꒉꑍꈎꊐꌠꇬꑟꈭꐨꆏ，ꀉꁁꌷꐋꈧꌠꌋꆀꐯꌟꃅ，ꌶꅉꃅꅍꊌꄐꂘꌤꃅꅉꇬꇱꉀꁵꎼꇁꌠꈨꇐꈧꌠꇬꈴꄉ，ꊨꏦꌬꇐꈧꌠꌞꏮꇁꒈꂪꁆꏯꉇꄅꎆꏂꑘꈍꑌꁯꁵꋺ，ꄯꒉꑋꁱꄉꇈ，ꁱꒌꑋꑕꇬꄀꎼꁧꀐ，ꄚꅑꅷꀋꃅꀃꑍꑟꇁꇬꆏ，ꄚꌤꃅꅉꋍꁯꅇꏮꄯꒉꀱꑷꑌꀋꐥꑴꌦ。ꄐꂘꌤꃅꅉꆹꊁꆏꄡꇗꄚꂱꑱꏃꇬꐛꌠ，ꑋꅉꉆꅉꀄꊭꈍꑋꍈꌌꉀꁵꋺ，ꃷꐕꃮꌺꆹꉈꑴꊐꐘꀁꂥꇨꄷꄻꀋꈴꄉ，ꄡꇗꇫꊪꇬꉬꀋꅲꑴꌦ。

ꃷꐕꃮꌺꄰꅿꀂꇬꆹꄚꏃꋋꂷꇬꐛꌠꉬꐛꅹ，ꀋꉊꄹꈎꇩꏤꋉꐛꑬꆏꄮꇬꆏ，ꃷꐕꃮꌺꌋꆀꌷꐋꄹꁆꆹꐮꐊꄉꇁꌊꄚꏃꋋꂷꈐꏮꐛꌠ，ꄆꉂꄆꈽꃷꅉꇪꌦꑠꂷꇬꄉꃷꄻꄜꉺꌠꃅꇈ，ꃄꐎꏃꑍꌠꎆꃀꑍꉐꊰꂷꍍꊌꋺ，ꋋꆹꋌꒆꊂꊯꈬꈎꐛꈭꐨ，ꉘꃀꃢꌠꊨꏦꅿꀑꁮꐨꌋꆀꑘꃅꌠꌌꄉꍍꌌꇁꌠꎆꃀꉘꃀꀦꌠꉬ，ꋋꆹꊿꌟꃅꑋꈌꃅꍵꄮꐰꈏꆏꀂꄂꈬꃼꌊꋍꀉꂿꇢꇁꋺ，ꋋꈭꐨꆏꈍꃅꑋꑠꃅꀉꇨꃅꑠꃢꐥꀋꋻꀐ。

ꋍꀉꂿꆹꍏꑷꄆꁱꃑꅉꇬ《ꀪꈈꌶꅐꄷꆏꀈꈥꀕ》ꄷꊭꐘꂶꌠꊌꂿꈭꐨꆏ，ꋍꀉꂿꆹꐒꊀꌊꈍꑌꑍꃅꋚꀋꋠꋺ，ꀉꄶꊭꐘꉪꅉꑞꅉꆹꒉꌶꌺꌶꅐꌠꆹ，ꑡꑌꇫꇬꄉꃅꅷꁧꋭꄷꅇꈪꊐꌠꀉꄂꉬꅱꀋꅐ，ꄚꄡꇗꑱꈐꋋꑷꌠꃅꋋꌌꊼꇅꉌꐒꇁꎭꉌꂵꐛꀋꐛꃅꎍꌐ，ꄚꄉꑓꇙꀕꃅꉜꎼꇁꉆ，ꃅꅍꊌꌤꃆꆹꈍꄮꇬꇯꆐꐛꐈꌊꋍꉎꀋꐥꃅꀉꒉꌠꌤꃆꐘꌠꐛꀐ。

ꏮꋩꌐꄷꆏ，ꆺꑳꏂꃴꑱꈐꏣꃀꏣꑟꃅꄓꄉꇁꋍꎁꃅꌤꃅꑘꎹꌐꀐ。ꀿꃶ、ꃀꑌ、ꀉꂿꃀꑌ、ꀉꁧ、ꀑꑌꏤꈧꌠꆹ，ꋍꁁꏯꆏꎹꋍꁁꏯꆏꅑꀵꇱꀋꏦꃅꎌꌐ，ꃅꋊꐛꐈꃅꐛꃄꐚꁏꀐ，ꊿꋋꋏꆹꉪꊈꋏꌠꀋꏣꀋꌡꀐ，ꉪꊈꀊꋨꋏꆹꌧꇐꂿꇐꆹꀂꑌꑴꇬ，ꄚꌶꅉꄇꂿꇬꄉꅐꇁꄷꆏꄡꇗꌤꃅꉆꈉꍈꆹꎹꊊꄏꇬꎷ，ꌌꅹꌡꉚꇬꄚꋋꋏꆹꉈꑴꆏꎖꁨꃅꒆꉘꋏꌠꑌꉬ，ꃷꐕꃮꌺꑌꄡꇗꎖꁨꃅꒆꉘꎻꇁꌠꈐꏭꊿꂷꉬ，ꑡꃅꎖꁨꃅꒆꉘꎻꇁꌠꈐꏭꊿꆹꌤꃅꉆꈉꍈꂯꎹꅉꀋꊌꇁꌠꉬꂯꀋ。ꃷꐕꃮꌺꆹꄚꅇꂷꈧꌠꊌꈨꈭꐨꆏ，ꉌꂵꆹꄺꀋꈴꌦꄈꏾꃅꎌ，ꇨꇅꃃꌊꋰꀋꄐꃅꂇꏅꅷꐺ，ꄇꀋꉆꄷꆏꉢꆹꑱꄜꁯꈨꌠꃅꁧꂯꄷ。

ꃷꐕꃮꌺꆹꑱꄜꁯꃅꇮꑴꅀ，ꑱꄜꁯꃅꇫꆹꎭꐓꅧꐓꄺꅐ，ꃷꐕꃮꌺꆹꊿꎭꐓꅧꐓꑵꌠꆹꀋꉬ，ꃷꐕꃮꌺꆹꏝꀪꊿꐥꐨꐥꄸꑵꌠꀉꄂꉪꉂꇬꎷꌠꉬ，ꁱꃀꋂꎮꍫꎽꁱꀙꇂꃴꑱꏲꃥꌋꈧꌠꌡꃅ，ꄿꐨꇈꏃꅐꁁꐚ，ꉌꇿꈩꌒꇈ，ꉂꐪꐛꂨꀕ。ꎆꌬꇬꇿꄉꇁꌠꀋꅲꀋꇭ。ꃷꐕꃮꌺꆹꅉꀕꃅꈄꏍꐋꌋꆀꐮꇰꏦꒉꋦꌠꅇꀨꑠꏢꌌꐮꇖꐯꄟꇬꎷ，ꋍꀉꄉꅫꌋꍏꇩꊿꆹꇯꍝꃅꃄꃶꌺꑓꋧꄮꋦꌺꁚꅖꌠꉬꀐ，ꂯꇩꒉꌶꌺꆹꊨꏦꇪꌦꀞꄻꉆ，ꍏꇩꒉꌶꌺꆹꊿꐥꌅꈌꀋꐥ，ꀉꁁꄷꀋꁧꉂꐪꉂꑟꌧꄜꇬꂯꄡꇗꂁꍃꂁꄉꃅꐥ。

ꍏꇩꄰꅿꈭꎁꌠꑋꅉꉆꅉꈧꌠꆹꃷꐕꃮꌺꇱꉜꑓꋪꇬꇯꀋꊐ，ꉈꄅꃆꂮꐥꌠꌧꇐꌶꌠꉬꑲꆏ，ꃷꐕꃮꌺꆹꈍꃅꑋꀋꎪꃅꀉꄶꉇꄅꎆꏂꑘꇬꄉꆹꈇꀊꐎꉾꐯꉾꏠꌠꄺꁧꌠꉬꀐ。ꃷꐕꃮꌺꆹꒆꌊꌺꏦꂷꄿꌡ，ꇍꈩꀒꎂꒉꌶꅉꉈꄅꃆꂮꐥꌠꌧꇐꌶꌠꌺꃰꌶꌺꆹꉬꇮꃅꌺꏦꎃꌐ，ꌋꅪꌶꌺꆹꉬꇮꃅꎔꌋꄞꅐꌐ。ꋀꊇꎖꌊꄚꈐꏭꃹꇁꄮꇬꆹꎖꏦꀉꇨꑠꏢꐥ，ꌋꅪꌶꌺꇭꀧꀉꒉꐨꆹꀋꎪꃅ1.65ꂰꈋꉐꐛꌠꈁ，ꌺꃰꌶꌺꆹꀋꎪꃅ1.70ꂰꈋꉐꐛꌐꑳꆀꍑꌠꉬ。

ꃷꐕꃮꌺꅿꌺꏦꌠꆹ，ꄮꀹꑵꌠꉬ，ꊿꄹꁆꉉꇬꆹꋋꆹꒆꌊꑵꉙꑵꂓꅑꌠꁍꎽꂶꌠꌡꄷ。ꌞꀉꁁꑫꇬꂁꄉꋍꇬꉂꌠꌋꅪꌶꌺꂶꆹꂱꀯꄖꆷꄉꉉꇬ，ꋋꆹꁍꎽꂶꌠꏮꀋꋌꃅꈍꃅꌺꏦꌠꉬꄷ，ꋋꆹꌣꈚꌺꇖꑓꋪꋒꅑꎍ。ꌣꈚꌺꇖꅿꑓꋪꆹꈍꃅꐙꌠꑓꋪꑵꉬꂯ，ꋋꆹꀉꄶꑗꑆꋍꄀꀉꄂꅑꇈꉂꏣꅼꇻꀕꃅꀀꐛꈴꌠꑓꋪꉬ。

ꑠꅹ，ꃷꐕꃮꌺꆹꈄꏍꈩꄉꑮꆜꈧꌠꌋꆀꌧꈿꁉꈿꄮꇬꆏ，ꅉꀕꃅꑍꁁꏯꐮꇰꐮꂿꉆꃅꌧꈿꄷꇖꂽꇬꎷ，ꐮꂿꉆꃅꌧꈿꄷꆏ，ꀉꋩꁁꏯꆹꋋꇅꃅꒌꈯꆟꈯꌠꌡꃅꂱꇁꃷꐕꃮꌺꇬꁯꌐꇈ，ꋰꀋꄐꇈꑡꑌꀋꑴꃅꂱꇭꁬꃨꑵꌠꌋꆀꂱꀯꉙꅪꇉꀕꈧꌠꆹꀋꆏꃅꃑꌞꎼꇁꇬꎷꌠꉬ。

ꄚꑠꃅꑴꇬ，ꃷꐕꃮꌺꆹꋀꊇꈧꌠꋍꂷꑋꄻꉌꂵꇬꑘꊐꄉꀋꋻꑴꌦ，ꉜꅉꉜꅉꆏ，ꋀꊇꆹꋍꂷꋍꉌꂵꈐꏭꃅꌋꊩꌺꂶꌠꏣꂷꑌꇬꀋꐊ，ꋋꆹꋍꁥꌠꇬꎔꌋꄞꅐꌠꌋꅪꌶꌺꐞꍀꑕꑘꂶꌠꉬ。ꃷꐕꃮꌺꆹꂁꄉꐞꍀꑕꑘꇬꉂꌠꄮꈉꆹꀊꉘꏢꐛꀐ，ꌶꅐꂯꌠꃅꑍꆹꐤꅉꐥꅉꃅꈛꑌꇁꌠꊂꈹꄉ，ꉂꏣꑌꐤꅉꐥꅉꃅꃹꅼꀙꇧꁠꇁꇬꎷ。ꃷꐕꃮꌺꆹꌤꀋꐥꃅꅞꇁꀀꈤꄩꀀꇈ，ꑓꋪꊼꇅꂭꐮꇰꄷꆏ，ꀂꏾꌋꆀꉌꂵꇬꆹꉬꇮꃅ，ꁯꇐꅑꌊꊿꋌꁭꌠꐞꍀꑕꑘꂶꌠꅿꈁꑓꒈꌦꀕꂶꌠꀉꄂꇁꇬꀀꎍꇬꎷ。

ꆏꈭꑍꂷꂲꆽꂾ，ꃅꐨꑍꄜꊙꌬꏹꍓꎹꌠꅺꇰꄯꒉꑕꇁꇍꈩꀒꎂꒉꌶꅉꊖꁋꄀꄯꒉꈧꌠꄩꇿꇬꑌꐛꃅꅑꌐꄮꇬꆏ，ꀋꇊꆏꍉꄊꈍꑌꂷꍞꇁꄚꇍꈩꀒꎂꒉꌶꅉꇬꊐꌠꌡꇬꎌ。ꋌꃢꌶꅐꌠꌶꌺꈧꌠꆹꈨꅇꋋꈨꊌꂿꄮꇬꆏ，ꈍꃅꉌꐡꑓꐡꌐ，ꋋꇅꃅꆏꄿꉢꄿꂅꃅꇁꌊꃅꅍꊌꄐꂘꌤꃅꅉꇬꄉꂓꁱꇈ，ꌋꁵꄯꒉꏮꄉꌐꀐ。

ꌋꁵꄯꒉꆹꄆꀑꌊꄉꉈꃅꄐꁱꄉꀊꋨꑵꉬꐛꅹ，ꄻꌊꈍꃅꋽꎔ，ꐊꇐꇯꍝꀕꇈꀋꃷꎵ，ꊨꏦꀑꐱꃅꄜꌠꇬꄉꅑꅷꇮꅍꐋꀋꌡꌠꌋꆀꉌꃹꐨꇬꑟꌠꃅ，ꉜꄷꆏꊨꄅꌐ，ꄷꀋꁧꌶꌺꊨꏦꀃꅉꁰꒌꑋꄻꇬꇯꄉꌐ，ꌋꅪꌶꌺꄹꁆꆹꄚꋋꈨꌡꌠꌤꃅꉆꈉꎹꌠꁰꒌꈧꌠꍑꆹꄮꇬꆏ，ꉈꀕꃅꍑꌊꆼꁠꌋꆀꉦꃀꄺꆜꉈꏭꁖꄉꇈ，ꅪꎔꃭꇤꏂꌠꃀꄯꇙꑵꌠꌋꆀꐮꌠꃅꊿꋌꁭꀙꐮꀙꃅꎌꌐ。

ꃷꐕꃮꌺꊨꏦꑴꅉꆹꇫꂓꁱꀋꆹꌠꉬ，ꋋꆹꄐꂘꌤꃅꅉꍗꏓꂶꌠꋍꊨꏦꉪꄎꏿꃅꄯꒉꄺꇬꁳꂓꁱꄉꌠꉬ。ꉜꅊꇈꂿꆏ，ꄐꂘꌤꃅꅉꍗꏓꂶꌠꊿꑫꑌꃷꐕꉬꅊꇈ，ꃷꐕꍗꏓꋋꂷꆹꉬꊰꎖꈎꐥꀐ，ꐥꍂꈎꄜꊋꒉꌠꆹꂘꇐꏲꑘꌤꃅꂷꉬ，ꌤꃅꇬꀋꎪꀋꑴꇈꃅꋒꑽꋒꃅꏦꃤꇬꍬꐛꅹ，ꌶꅉꏲꌋꁥꌠꆹꋌꁆꌊꊋꋠꄮꇬꂿꃆꁵꊪꎻꌠꉬ，ꌋꁵꌶꅐꌶꌺꃅꅍꎹꌠꃅꎁꃅꌠꉬ，ꌶꅉꑭꊂꌶꅐꌠꌶꌺꈨꌠꅿꊫꂫꃰꇌꆹꇁꋍꇇꈐꇬꀀꎍꌐꄷꉉꉆꌠꉬ。ꋋꑌꄡꇗꋍꃀꁨꀋꑌꉌꂵꄅꀋꑌꃅꌤꃅꇈ，ꃄꐎꋍꈓꂷꅑꅷꇁꌠꆏ，ꃷꐕꍗꏓꂴꆽꊇꅉꇯꆐꀁꑌꀐꌠꀍꑐꈧꌠꆹ，ꀋꃅꆏꑐꆴꌊꀎꌃꑊꅗꅍꀙꀐ。ꃷꐕꃮꌺꌋꆀꋋꆹꊿꑫꋍꑵꉬꌠꀑꑊꉜꐛꅹ，ꄚꃷꐕꃮꌺꌤꃅꉆꈉꎹꌠꌤꃆꈧꌠꏭꆹꈍꃅꉈꃅꉌꇬꉜꁨꌠꉬ。

ꃷꐕꃮꌺꆹꃅꐨꑍꄜꅿꅺꇰꄯꒉꈧꌠꇬꆹ，ꋋꆹꀋꆏꃅꇬꉌꀋꒊꌠꉪꐨꑌꇬꎷ。ꀋꃅꀪꈈꌶꅐꄷꆏꉬꇮꃅꐈꇁꀈꈥꀕꌠꐛꌐꀐꇬ，ꏹꍓꁥꎹꇬꆹ，ꃀꅉꋍꎳꉘꀋꇉꃅꀥꇁꉪꊇꃅꑘꂘꑴꀊꂥꊐꐘꌠꌶꅉꇬꎹꇁ。ꃷꐕꃮꌺꆹꀋꂁꀋꁿꃅꃷꐕꍗꏓꇬꉉꅷꐺ，ꀋꃅꐧꋦꊾꌬꌠꌤꃅꅉꆹꉬꇮꃅꎳꀠꅥꌠꉌꃹꌐ，ꋋꆹꈍꃅꑋꊙꎸꌊꅹꇰꌠꇑꈻꄉꇇꀨꄏꐓꌠꁧꌠꉬꄷ。ꃷꐕꍗꏓꉉꇬ，ꏹꍓꄺꁧꌠ，ꋋꍈꆹꉪꊇꑌꇯꍝꃅꉌꇬꉜꁨꌠꉬ，ꉪꊇꈍꄮꇯꆐꄚꃆꂮꐥꌠꌤꃅꅉꈨꇬꅲꇖꋻꀐ，ꋋꆹꌌꍤꆗꋻꌠꌗꉆꀐ。ꉈꑴꉉꄸꇬꑌ，ꑍꄜꎹꆹꉪꌜꇬꃤ，ꐛꅉꆹꄔꊒꄇꈜꄸꈚꌠꇬꐛ，ꋌꆹꈱꆏꊏꆏꅰꇁꄷꌠꅀ？

ꑠꄮꇬꆏ，ꃷꐕꃮꌺꆹꀋꆰꀋꊸꃅꇁꌊꂘꎥꆹꄹꊐꑳꇬꑟꀐ。ꋋꊌꂿꇁꇬꄇꃀꂴꆽꆹꈍꄮꇯꆐꊿꉆꆈꅊꀕꌐꀐ，ꑳꀏꊐꌠꒉꂪꏮꈴꅉꈚꌠꇬꄉꀋꆏꃅꉆꈴꅷꄇꃀꂴꆽꇓꄹꊐꈧꌠꇬꃅꑟꌐ。ꉬꇮꃅꉈꄅꃆꂮꌧꇐꌶꉹꌠꉬꌐ。ꇬꄉꈨꇁꇬꑍꄜꎹꋋꂷꆹ，ꉈꑴꆏꀑꑊꉜꄉꎸꃤꇯꁸꑴꌦꄷ，ꉈꄅꃆꂮꌧꇐꉹꌠꌶꌠꈐꏭꎔꌋꄞꅐꌶꌺꈧꌠꀉꄂꁨꌬꃅꏤꄉꄷ，ꏹꍓꆹꁱꀕꐛꒌꑵꅿꁧꎁꉬ，ꋋꈍꑌꈓꒉꌶꅉꇬꄉꌶꅐꇁꌠꌶꌺꈧꌠꆹ，ꇯꍝꃅꀉꑌꌊꃅꃴꃅꏸꑘꀋꋌꇬꎌꀐ，ꈀꄸꑌꇎꏦꉾꃅꐥꌐ，ꑠꅹꊾꎸꇬꆹꈍꃅꑋꇁꌊꈁꏾꃅꊨꏦꉌꂵꌸꅉꇬꄉꎹꁧꂿꇏꏾ，ꑠꃅꉉꇁꇬꆏꀉꄶꑍꄜꎹꂶꌠꆹꇁꌊꇍꈩꀒꎂꒉꌶꅉꇬꎹꇁꌠꆹꈍꃅꑋꅑꀋꀵꌠꉬꀐ。

ꃷꐕꃮꌺꆹꇁꌊꊂꇊꊂꄽꂫꈚꌠꇬꉆꎌ，ꑓꏮꇁꋍꂷꇈꋍꂷꃅꑓꊒꀕꃅꎖꌐꌠꌷꐋꈧꌠꀉꄶꈴꈌꇬꈴꇁꌠꉜꇬ，ꑊꑍꈺꄂꀕꌠꐊ，ꉈꑴꌷꐋꄹꁆꆏꑊꑍꒉꌦꀕꃅꈴꈌꇬꄉꈛꎂꃅꀥꇁꊂꆈꏮꑷꂿꈴꈌꇬꈴꁧꌠꐥ，ꋋꆹꈍꃅꑋꌞꊿꋀꊇꇬꅱꇬꇁꏦꐛꅹ，ꋍꏯꈴꇁꊋꃤꀋꑍꌠꉬ。ꃷꐕꃮꌺꇁꀉꄶꇬꋍꈪꌺꉆꈭꐨꆏ，ꇤꀠꀕꌊꀨꆷꀋꐥꌠꌡꐛꅹ，ꋋꇅꃅꋋꏮꀠꌊꀥꇬꈴꁧꀐ。

ꃷꐕꃮꌺꉌꂵꈐꆹꇯꍝꃅꑡꀕꏹꍓꃅꑠꄺꁧꀋꏾꌠꉬ，ꋍꅿꉌꉪꐨꆹꇁꀉꄶꒈꂪꁆꏯꉈꄅꎆꏂꑘꇬꐥꁧꅀꇩꉈꐥꁧꏾꌠꉬ，ꍏꇩꊿꆹꇯꍝꃅꃄꃶꌺꑓꋧꄮꋦꌺꁖꅖꇨꀐ，ꄚꊨꏦꃅꄷꄉꏹꍓꂷꄺꇬꆹꑡꈻꇐꂷꐥꂯꆏ。ꃷꐕꃮꌺꋍꊨꏦꀉꄂꃅꇁꌊꈩꅉꄸꉺꂶꌠꏡꁮꇬꑟꇁꀐ，ꈜꎁꃅꁡꊭꏾꇇꄺꑌꄉꌦꉪꌋꉪꋍꃢꉪꈽꏿꎌ。ꏮꇁꃅꈯꇬꉘꁮꂶꌠꉜꇬꆏꋋꆹꂿꃅꈮꁁꇬꅑꎌꑴꌦ，ꄮꈉꑋꏜꃅꇨꑴꌦ，ꉈꑴꆏꌤꑌꃅꅍꀋꊌꃅꐺ。ꃷꐕꃮꌺꆹꃱꇌꃯꇌꃅꁱꈧꅉꏡꁮꇬꏮꈩꐺ。ꀑꐱꃅꄮꈉꋍꂷꐛꏭꐛꀐ，ꑠꄮꇬꆏ，ꄧꀕꃅꐞꍀꑕꑘꂶꌠꋌꉜꂿꀐ。ꐞꍀꑕꑘꌋꆀꌋꅪꌶꌺꑍꂷꆹ，ꋀꌕꑻꌠꆹꇇꎇꐯꌫꄉ，ꉉꅉꒈꅉꃅꂘꎥꆹꄹꊐꑳꋋꁁꏯꉜꄉꇁꀐ。

ꈨꑭꇂꃴꐞꍀꑕꑘꆹ，ꈍꃅꁮꁞꇈꎔꃨ，ꈁꑓꒈꌦꀕꃅꐚꒉꅝꄉꌠꌡ，ꆧꁨꐍꊭꀕꇈꈍꃅꒉꄚꇁꄿꌠꁨꑭꄚꈿꌬꎍ，ꋋꆹꈍꄮꑋꀍꑐꈧꌠꏶꇁꃆꀞꁍꎼꌟꃅꀂꏾꊂꆈꄉꌠꉌꃹꇬꎷ，ꑠꅹꈍꃅꎔꃨꇈꉂꑟꅑꐮꅑꃅꊾꋌꁮꋌꇢꇬꎷ。ꌌꋍꇬꅹꌡꉚꇬꆏ，ꀉꄶꋌꐊꐺꌠꌋꅪꌶꌺꑍꂷꌠꆹꊼꇅꉌꊰꆟꈯꏮꃅꐙ。

ꐞꍀꑕꑘꆹꃷꐕꃮꌺꂶꌠꇇꌌꈂꀸꇬꉱꌊꐺꌠꂿꇬꆏ，ꉌꌤꑓꀖꐆꃅꉉꇬ，ꆏꑓꊒꀕꃅꎖꉚꌠꈴꅐꀕꀐ？ꃷꐕꃮꌺꆹꀒꆺꉈꄉꉉꇬ，ꇬꆹꀋꏾꄷ。ꐞꍀꑕꑘꉉꇬ，ꑞꐛꅹꉬꀋ，ꆏꉆꐥꃅꀒꁨꆹꇆ，ꋋꇅꃅꌐꇁꂯꄉꀐ。ꐞꍀꑕꑘꅇꂷꑠꇬꀉꄂꃅꃷꐕꃮꌺꋋꌌꉌꐡꉌꇿꇱꀋꏦꃅꎌ，ꄷꀋꁧꋋꇅꃅꉪꐝꉅꄉꀐ，ꈍꃅꑋꑓꊒꀕꃅꎖꉚꌠꃅꁧ。

ꃷꐕꃮꌺꅿꉪꐪꑭꄑꁧꈌꆹꈍꃅꎃꐚꌠꉬ，ꋋꆹꐞꍀꑕꑘꂶꌠꌞꃤꐛꁧꏦꌠꉬ，ꀋꄸꄷꐞꍀꑕꑘꆹꊿꇱꁨꊙꌊꁧꇮꇬꆹ，ꋋꆹꈍꃅꂯꆏ，ꃷꐕꃮꌺꉌꂵꊼꇅꐛꀋꐛꐆꃅꐚꇁꇈ，ꇨꆰꇨꊸꌊꑭꁘꐕꐳꃅ，ꌗꐎꇯꊌꀋꅐꃅꋋꀥꇁꂘꎥꆹꄹꊐꑳꈐꏮꃹꆹꀐ。

ꄚꉘꇉꉘꀋꅐꃅꉘꇢꏿꊝꀋꋽꌠꆏ，ꃷꐕꃮꌺꀥꇁꂘꑳ2012ꁨꌠꀃꈈꂲꆽꑟꇁꄮꇬꆏ，ꑓꊒꀕꃅꎖꉚꌠꆹꈍꄮꇯꆐꌐꇈ，ꈴꈌꈚꌠꇬꀉꄂꌶꌺꈍꑌꑼꈧꆹꌤꀋꐥꃅꌧꈿꁉꈿꀉꄶꇬꉆꎍꀐꅊꇈ。ꀂꏾꎇꌊꂘꑳꈐꏭꑌꎌꌠꊿꈧꌠꉜꇬꆏ，ꇬꊎꃙꋒꀁꂥꌺꃅꁮꎏꈨꑌꃅꏈꅷꐺ。ꄚꈐꏭꊿꋋꋒꀋꌧꌠꈍꑌꑼꑌꇬꐊꐺ，ꉈꑴꆏꃷꐕꍗꏓꌋꆀꌶꅉꇬꏲꌋꈍꑌꑻꑌꇬꐊꐺ。

ꃷꐕꃮꌺꑌꄡꇗꉌꂵꀊꒉꐮꀊꒉꇈꈛꎂꃅꋌꇁꄚꈐꏭꃹꆹꇈ，ꅞꇁꃷꐕꍗꏓꅳꀧꏡꁮꇬꉆꄉꃙꋒꀁꂥꌺꃅꊨꏦꅿꉪꐨꉉꎼꇁꀐ。ꃷꐕꍗꏓꂶꌠꆹꄷꀋꈴꐆꃅꄓꇬꉆꇈ，ꉇꉈꃅꃚꋒꀉꂥꃅꋍꇬꅑꀵꏈꅷꐺ，ꆏꀋꃉꌌꑡꃅꁧꌠꉬ，ꄚꅽꎭꈐꂄꌠꆏꃬꎔꍗꏓꂶꌠꆹꀋꃅꄚꇬꐥꑴꌦꌠꉬꅊꇈ，ꑠꆹꀋꉬꑲꆏ，ꀉꑳꆏꆹꀋꃅꋋꃢꆏꇯꍝꃅꀙꌠꉬꀐꄹꏈꅷꐺ。ꃷꐕꍗꏓꂶꌠꑠꃅꏈꅷꐺꄮꇬꆏ，ꀉꄶꅶꁉꏭꄉꇬꊎꌬꉂꌬꇐꎴꑋꃅꄉꌠꃬꎔꍗꏓꂶꌠꆹꑡꌤꉬꌠꋌꐝꉅꌐꀐ。

ꃬꎔꍗꏓꆹꀨꇬꎖꇜꂷꌠꉬ，ꌕꊰꎖꈎꐥ，ꇭꀧꀉꒉꇈꊼꇅꏠꈭꃅꐙ，ꈁꑓꆹꑆꐍꎸꁞꃅꎌ，ꎃꐚꉙꉉꇬꆹꊼꇅꅲꊋꏡꊋꃅꐙ，ꊼꇅꈍꂤꈍꅶꀋꐚꃅꐙꇈꉈꑴꆏꊼꇅꇣꋲꃅꑌꐛ。ꃷꐕꃮꌺꆹꊾꋌꂷꇬꃹꅶꃅꎺꏣꐥꇈꋓꉪꁨꇬꎷꌠꆏꋍꅿꑓꋪꋒꌠꉬ，ꋋꆹꈍꄮꇬꑋꃥꌋꂶꌠꅇꉉꄮꇬꆏꈳꏦꐥꃅꊥꇱꅷꐺꇈ，ꀋꇊꆏꇬꊎꇇꏸꇇꃀꄖꑵꌠꌋꆀꐮꐊꐺꌠꌡ。ꊿꋋꂷꆹꁱꀋꐭꄮꇬꆏꉜꎼꇁꇬꆹꈍꃅꇗꄃꀕꑠꂷ，ꄚꅇꉉꄮꇬꆏꉈꑴꈍꃅꊽꒊꒉꑠꂷꑌꉬꑴꌦ。ꋋꆹꃅꐨꑍꄜꏓꇰꁰꄻꌤꃅꅉꍗꏓ，ꋍꂓꆹꃬꎔꀈꆺꂓꌠꉬ，ꋍꂓꂶꌠꆹꋍꅿꐛꄟꂶꌠꏮꀋꋌꃅꊽꉌꃹꑓꐛꇈꊋꑌꏢꑌꃅꐙ。

ꃬꎔꀈꆺꆹꋍꁁꏯꆏꉻꌤꁱꐘꊐꐣꁙꂶꌠꄻꎳꅷꐺ，ꋍꁁꏯꆏꃷꐕꃮꌺꇬꅲꅷꐺ，ꈨꏀꌤꑘꉁꅉꀕ？ꃷꐕꃮꌺꆹꋍꇅꃅꏸꀋꏦꃅꉉꇬ，ꉁꅉꑴ。ꆎꉜꇬꈍꃅꐙꌠꏹꍓꑲꆀꉾꃪꀉꇨꌠꏹꍓꉬꀋ？ꃷꐕꃮꌺꀱꇬ，ꇬꅉꀋꐙ，ꑞꃅꆏꉢꆹꏹꍓꄺꀋꋻꑴꌦ。ꃬꎔꀈꆺꆹꊼꇅꑬꆏꈭꐨꆏ，ꑓꏮꇁꃷꐕꃮꌺꂶꌠꇬꉜꄉꉉꇬ，ꉐꆂꌈꐮꌈꌠꉬꄷ。

ꊁꆏꐪꊛꄉꉉꇬ，ꉠꅿꉪꐨꆹ，ꆎꆹꉾꃪꀉꇨꌠꏹꍓꂷꐛꏾꀕꀋꄷꌠ？ꃷꐕꃮꌺꀱꇬ，ꉉꄺꀋꅐ，ꐛꏾꌠꉬ，ꌉꈿꋍꑍꈀꄸꂷꌳꈄꀋꃀꂷꐛꀋꏾꇆ，ꑶꋦꋍꑍꈀꄸꂷꌢꈚꀋꁧꂷꄻꀋꏾꇆ。ꄚꃷꐕꃮꌺꅿꉌꃀꈐꏮꆹꑠꃅꉉꐺ，ꌌꐞꍀꑕꑘꌋꆀꐮꅺꌡꉜꇬꆹ，ꏹꍓꆹꑡꂷꌗꄏꂯ，ꉠꉌꃀꈐꇬꉪꌠꆹꐞꍀꑕꑘꂷꌠꀉꄂꉬꌠꀋꂸ。

ꑠꄮꇬꆏ，ꃷꐕꃮꌺꌌꉪꎼꇁꇬꆏ，ꃬꎔꀈꆺꈁꑓꑊꑍꂶꌠꆹ，ꈍꄮꇯꆐꋋꆹꇎꏦꇬꑟꄉꃬꎔꀈꆺꋍꇬꉌꃹꌠꋋꉜꅐꇁꀐ。ꅇꂷꌕꇬꅲꄷꆏ，ꃷꐕꃮꌺꆹꑓꊒꀕꃅꎖꉚꌠꎖꊌꀐ。ꃬꎔꀈꆺꆹꋋꐊꇁꌠꌋꅪꂱꎼꂶꌠꅇꁵꄉꉉꇬ，ꃷꐕꃮꌺꂓꂶꌠꁱꇬꇯꄉꄷ。

ꑬꆏꋍꂷꐛꈭꐨꆏ，ꃷꐕꃮꌺꅉꐚꅜꇬ，ꋌꌋꆀꐞꍀꑕꑘꑌꐮꇰꑓꊒꀕꃅꎖꉚꌠꎖꈴꅐꇈ，ꋀꊇꐯꇰꋓꃅꏹꍓꐛꀐ。ꋍꑊꆹꇯꍝꃅꐰꇑꎭꈐꎔꐮꎔꌠꉬꄷꉉꋭꌠꉬ，ꀋꃅꋋꃢꌶꅉꑭꊂꄚꇬꂓꁱꄉꎖꉚꆹꌠꊿꋍꉐꎖꑻꐥ，ꑓꊒꀕꃅꎖꉚꆹꄷꅇꇰꊪꊌꌠꏃꊰꎖꑽꐥ，ꄚꌌꁨꊙꌬꌠꃷꁨꆹꊯꑻꀉꄂꐥꌠꉬ。

ꌌꊼꇅꉉꀽꄺꅐꌠꆏ，ꀋꃅꋋꃢꁨꊙꌬꇬꆹꌌꄉꑓꊒꀕꃅꀉꄂꎖꉚꌠꉬꅊꇈ，ꁱꎖꄺꀋꅐꌠꉬ，ꋋꆹꃅꐨꑍꄜꇣꋲꃅꏀꀺꄉꌠꏢꁈꀉꏀꏡꉬ，ꋀꊇꉜꐨꃅꐨꆏꌶꌺꈀꄸꑌꄐꐨꌧꐨꐯꀋꇊꌡꌠꇎꏦꇂꃴꄉꇬꆏ，ꀋꉬꀋꉆꌠꆹꃄꄻꄐꅍꉜꌠꉬ。ꄡꇗꑠꃅꄉꉉꉆꌠꉬ，ꌌꎖꌬꌠꎖꈴꅐꄎꈨꌠꑲꆀꇯꍝꃅꀕꐨꑍꄜꏹꍓꃶꐚꀕꌠꐛꄎꌠꉬ。

ꑬꆏꋍꂷꐛꈭꐨꋋꄹꉈꂵꆤꈍꐯ，ꃬꎔꀈꆺꂶꌠꆹꂱꎼꂶꌠꏃꌊꉈꋍꃢꇁꌊꇍꈩꀒꎂꒉꌶꅉꇬꑞꇁꌦꀐ。ꃷꐕꍗꏓꁳꑓꊒꀕꃅꎖꊌꃅꇬꑟꌠꌶꌺꊯꑻꌠꇳꍝꄉ，ꏓꄉꇁꌊꂘꎥꆹꄹꊐꑳꇖꊐꀕꌠꃀꈿꅉꈚꌠꇬꑟꇁꌐꀐ。ꃬꎔꀈꆺꆹꑍꄜꎹꎁꃅꌶꌺꊰꑻꌠꌋꆀꁨꌬꏤꐪꄯꒉꁱꄉꀐ。ꄚꈐꏭꐊꇐꆹꀋꉬꀋꉆꌠꆏ，ꌬꉚꃅꑍꌕꁮꆪꌠꈯꄔꇬꆏ，ꌬꉚꊬꌠꇬꆹꃄꎆꀋꐥ，ꏤꈉꑟꇈꎕꏦꇬꑟꈨꌠꆏ，ꋋꇅꃅꑌꐚꃅꌌꄉꌬꌠꋮꒉꄯꒉꁱꄉꇈ，ꉪꀨꎹꌤꃅꊿꑌꐚꌠꌋꆀꊌꐨꐯꌟꃅꊌꄷ。

ꃬꎔꀈꆺꂶꌠꆹꊛꄉꉘ꒜ꌉꃢꌠꂿꃆꄛꇰꎼꇁꀐ——ꃅꐨꑍꄜꆹ7ꆪꇬꆏꌜꋌꈚꇬꒈꂪꏭꐛꌠꎺꋦꁧꑎꑤꏓꂱꍔꃚꌋꆀꐮꐊꄉꀉꒉꃅꅲꇫꅲꁱꃅꈧꌠꑠꈭꀞꄻꄷ，ꂓꆏꌌꄉ“ꈨꑭꃅꐨ”ꂓꄉꌠꉬ。ꏹꍓꊯꑻꌠꆹꃹꅼꃅꇁꌊꎺꋦꁧꑎꑤꑬꊂꄉ，ꑤꋋꂷꇬꅐꀦꋦꈭꌋꆀꎆꏣꀻꎆꐛꐪꌌꄉꐉꈴꃅꐪꊛꄉꄛꇰꌠꃅ。ꃅꈧꄮꈉꆹꋍꁮꆪꉬ。ꋋꆹꏹꍓꀉꏀꊯꑻꌠꆏꃹꅼꃅꇁꌊꑣꋂꄉꋍꁮꆪꅲꇫꅲꁱꄷꌠꄜ，ꄷꀋꁧꈨꏀꁱꌊꉾꈧꌠꆹꋋꇅꃅꎃꊒꃅꃑꌊꑍꄜꄯꒉꇬꄀꄉꌌꄜꃑꌐꌠꉬ。

ꈀꄸꑌꉌꊢꑓꊢꃅꅲꐛꅹ，ꉌꊈꄖꄑꁁꌠꏯꆹꀉꇨꃅꐥꌐ。ꃀꈿꑳꇬꆈꁨꇤꊭꀕꃅꁱꐭꃚꋒꇬꊌꀋꈨ，ꌙꈈꀕꃅꌗꊏꂷꂯꀋꐥ，ꑱꏢꊯꇁꃄꅉꇬꅞꇬꂯꊾꊌꈨꇁꉆꃅꎌ。ꋌꃢꌶꅐꌠꌶꌺꊯꑻꌠꈐꏭꆹ，ꑍꂷꀉꄂꂿꑘꁡꇤꄉꒆꀉꒉꌠꉬ，ꋍꂷꆏꑤꍰꇓꈓꇬꄉꒆꀉꒉꌠ，ꀉꁁꈧꌠꆹꉬꇮꃅꊗꁵꌋꆀꇌꐔꍈꂯꂿꀋꋻꌠꇓꈓꀉꑳꉬꌐ。ꅹꌡꇬꐞꍀꑕꑘꌋꆀꃷꐕꃮꌺ，ꋀꊇꆹꑘꃅꁡꇤꏭꇣꋲꇤꑞꇨꌠꌋꆀꀒꁨꉜꄉꆹꌶꌠꉜꏾꂿꏾ，ꃄꎆꋍꍈꑋꀋꊌꀋꐥꄷꇬꑌ，ꀉꄉꀉꂿꆹꋀꊇꀋꃅꋋꃢꂿꑘꁡꇤꄉꏹꍓꄺꁧꌠꇬꉌꃹꑓꐛꇈꇬꈐꊟꊋꊡꇱꀋꏦꃅꎌꌐꌠꉬ。

ꈨꑭꃅꐨꅿꁧꀿꐨꇰꀋ꒜ꋋꐘꆹ，ꌷꐋꊈꋋꌌꉪꃅꉨꇐꈤꌐꇁꀋꉆꃅꎌ。ꈨꑭꃅꐨ，ꆍꊇꆹꈨꑭꉬꀐ，ꀋꃅꋋꃢꃅꈧꌠꆹꈻꇐꀉꒉꃅꐥꌠꉬ，ꆍꊇꆽꎍꌠꂿꃆꆹꌢꎭꑤꋋꂷꑬꊂꊻꂷꈍꑋꊰꃪꌠꐳꃅꌣꈚꈝ꒜ꍬꆹꏢꌠꉬ。ꃬꎔꀈꆺꂷꌠꆹꉉꌐꆏꈿꌐ，ꈀꄸꑌꋋꇅꃅꇇꁮꏪꃚꆏꒈꂃꒊꆱꌡꇈ，ꀊꉗꏢꃅꆏꇁꀋꉆꃅꎌ。

ꃷꐕꃮꌺꆹꈯꄿꋋꂷꃅꊋꌗꇤꌊꇇꁮꏪꐛꅹ，ꇇꁮꀃꃀꇯꊼꇅꆅꉺꃅꐙ，ꄚꄡꇗꄝꆏꇁꀋꉆꃅꎌ，ꊁꆏꐞꍀꑕꑘꆹꇇꁮꏪꌠꆏꄉꌠꋋꊌꂿꇬꑳꆀ，ꋋꑌꄚꍬꄉꆎꇬꎭꌠꉬ。ꋋꆹꀋꆏꃅꏭꇁꐞꍀꑕꑘꇬꆈꍰꐺꇬꎷ，ꐭꈜꀋꐚꑠꋍꍈꋑꀋꋒꃅꋋꉜꇁꋍꉌꂵꇬꊐꄉꌐ，ꉬꑴꇆ，ꉂꏣꆹꑠꃅꐚꑵꉬꀐ。

ꐞꍀꑕꑘꑋꄡꇗꃷꐕꃮꌺꇬꉌꃹꐨꍈꑌꐥꌠꉬ，ꃀꈿꌐꄮꇬꆏ，ꈀꄸꑌꃀꈿꑳꇬꄉꁖꇁꌐꀐ，ꐞꍀꑕꑘꆹꈛꎼꂴꆽꐊꇁꇈ，ꈴꈜꏡꌠꇬꆏ，ꉈꀱꋋꇁꉚꀉꄶꇬꉆꎌ。ꐞꍀꑕꑘꒊꒉꄉꉉꇬ，ꉢꂿꑘꁡꇤꁧꀋꋻꑴꌦꐛꅹ，ꀋꃅꋋꃢꆹꀋꎪꃅꎔꎗꃅꇬꊼꇅꎖꉚꆹꂾ。ꃷꐕꃮꌺꆹꐞꍀꑕꑘꂴꆽꄉꈍꄮꑋꑠꃅꉉꏾꌠꉬ，ꑘꃅꁡꇤꆹꈍꄮꇯꆐꉢꒉꋺ，ꄚꆎꌋꆀꐮꐊꄉꒉꑲꆏꀊꅰꃅꐋꀋꌡꇈꉂꏣꉂꑟꅑꇁꌠꉬꀐ。

ꉉꄻꀋꅐꌠꆏ，ꃷꐕꃮꌺꆹꇯꍝꃅꋋꇅꃅꈛꎂꃅꄉꉌꊨꉂꇱꉂꄜꀋꀬꑴꌦꌠꉬ，ꑮꆜꆹꈀꄸꂷꉬꂾꑊꏦꏸꏦꃅꐙꐛꅹ，ꃷꐕꃮꌺꆹꆹꋍꇯꅝꌠꆹꐞꍀꑕꑘꇬꃸꆽꌠꏦꌠꉬ。ꋌꆹꒊꀉꄂꒊꒉꄉꅇꏮꐺ，ꊁꆏꋀꊇꆹꋓꄉꇁꌊꈴꈌꇬꑟꇁꇈ，ꇁꌊꌶꅉꈝꃀꇬꍬꐺꀐ，ꋀꊇꆹꌶꅉꀊꂥꊐꌠꇬꐞꑲꆏ，ꃆꏂꊂꑋꃰꊿꊫꂫꆹꀊꅰꃅꀊꐯꇈꁤꇅꀕꇁꌠꉬ，ꋀꊇꆹꁱꀋꐭꃅꆼꁠꋓꄉꈛꎼꐺ，ꄚꈀꄸꑌꉌꂵꈐꏭꆹꐯꇯꉪꐨꈨꐥꌐꐛꅹ，ꊼꇅꐥꌒꇈꇯꅝꉻꃅꐙ。

ꑍ

ꉢꆹꃷꐕꃮꌺꂷꌠꁨꊙꌊꏹꍓꄺꌠꁮꅉꉉꈻꄮꇬꆏ，ꂴꉢꁳꈨꑭꃅꐨꐩꋊꐛꊂꍈꊼꇅꉉꀽꎻꅊꇈ。

ꑠꃅꑳꆀꉠꉂꇂꅉꌠꄯꒉꉜꐋꆎꆹꁮꅉꋋꂷꉜꀘꐝꉅꇁꄎꌠꉬ。ꉪꊇꈀꄸꑌꇬꅉꐚꋭꌠꆏ，ꄚꋧꃅꇣꄧꋋꂷꇬꆹ，ꐥꇐꑞꑵꉬꄿꂿꐯꇯꇁꀦꌋꆀꁢꊧꁧꄩꐥꌐꌠꉬ，ꀋꉬꀐꇬꌤꑞꐘꇫꅐꌠꌋꆀꀻꎆꌠꆹꐯꇯꄐꏦꏢꐥꌐꑵꉬ。ꈨꑭꃅꐨꆹꀉꁁꀋꉬ，ꈨꑭꃅꐨꅿꁢꊧꆹꁱꀕꇬꄉꇮꃅꊿꎹꌠꃅꅍꀋꊌꌠꃬꎔꀈꆺꒈꄸꉬ。

ꃬꎔꀈꆺꆹꀋꐯꂾꀉꇙꀕꌠꃅꐨꑍꄜꏓꇰꁰꄻꌤꃅꅉꍗꏓꂷꉬ，ꈍꃅꄉꌤꃅꅍꀋꊌꌠꉬꂯ。ꋧꃅꑌꇐꋒꌥꌠꈀꄸꑌꋋꅉꐚꌐ，ꋋꈍꑌꈓꆹꌤꆿꌋꆀꃰꊿꑠꆹꂵꇖꀕꌠꇿꑌꐥꈴꌐ，ꀋꄹꉇꊿꌢꎭꇯꅠꀕꑠꋍꈨꆏ，ꊴꀾꁬꀉꄂꃼꊋꐛꊌꇈ，ꎼꃄꐎꋍꉔꀉꄂꇢꐛꇬꆏꐈꇁꌣꈚꀋꁧꄓꀋꄐꌠꐛꌠꐥ，ꊿꋍꈨꆹꀋꄹꉇꆏꇜꌺꄺꄉꄆꁱꈐꏭꄉꀑꑊꁨꇅꀕꇈ，ꋍꉔꀉꄂꇢꇬꆏꐛꐈꌌꊾꇬꐛꏦꑳꆈꇬꃹꁧꌠꐥ。

ꃬꎔꀈꆺꅿꐛꐈꐨꆹꑠꃅꈌꍓꑓꍓꃅꀋꐛ，ꃬꎔꀈꆺꆹꐩꋊꄮꈉꇱꄻꐛꌠꌳꈄꀋꃀ，ꋍꅿꈁꀁꋌꒉꊰꌠꌋꆀꃅꋊꐛꐨꐮꃆꂮꐥꌐꌠꉬ。ꃬꎔꀈꆺꆹꐧꌷꊐꌠꌶꅐꇈ，ꎖꌊꊌꅉꀋꐥꃅꄉꀱꀂꇬꄉꑘꃅꊖꑣꐥꌠꉬ。ꋍꊨꏦꑴꅉꂷꌠꆹꈌꊝꅱꊝꒆꏦꎃꐛꅹ，ꄚꄉ，ꃅꋊꂴꋎꌠꈬꊰꈎꊬꌠꀨꇬ，ꈭꈪꈜꈪꏣꑟꂷꇱꏃꌊꌜꍰꇓꈓꄉꃅꑘꍈꃅꐺꌠꉬ，ꃅꑘꀊꋨꏢꆹꎃꐚꃅꑘꏢꀋꉬ，ꋋꆏꏹꍓꄺꄉꃹꅼꃅꇁꌊꐧꋦꋍꑞꋍꑵꉹꑘꇬꈴꄉꁌꁵꌠꈨꏀꅲꁱꇈ，ꐈꄉꅇꉉꌠꉬ。ꃬꎔꀈꆺꆹꏹꍓꂓꉻꀵꄉꇈ，ꊾꊏꊿꀸꋠꄉ，ꑍꈓꎖꎆꍈꊌꀐꌠꉬ。

ꃬꎔꀈꆺꅿꁱꀕꌧꇐꆹꈁꐥꌠꃅꐧꋦꃄꄻꅉꇬꄉꅐꇁꌐꌠꉬ，ꌧꇐꄹꁆꅿꇁꀦꆹꅺꌡꇬ《ꉂꐋ》《ꉉꈻꌋꆀꈌꌧ》ꄷꄮꀹꈘꄧꎺꁱꄯꒉꌋꆀꁱꇐꂓꅑꑍꋐꅿꁱꍕꄉꌠꈐꏭꄉꇁꌠꉬ，ꄚꈐꏭꋍꋐꆏ《ꀉꅪꌠꌋꆀꀉꆈꌠ》ꄷꋐꌠꉬ。ꋍꃢꋑꀋꋒꎆꏂꑘꁌꁵꄉꅲꁱꒈꇬꎷ，ꋌꆹꈍꃅꑌꁈꏂꁈꇭꄉꅇꀨꎹꇬꎷ，ꎆꏂꑘꌟꒉꇅꊝꈧꌠꇬꅲꉜ，ꆎꆹꄯꒉꉜꌠꉌꃹꀕ？ꄯꒉꑡꈨꌠꉌꃹ？ꄣꄊꌋꆀꒄꆃꆹꅉꐚꀕꇆꄷ？

ꃅꋊꂴꋎꌠꈬꊰꈎꈎꀨꇬꆹ，ꑣꍔꎆꏂꑘꃅꑆꋋꇂꃴꏓꋍꃱꃅ，ꎆꏂꑘꌧꃀꀉꑌꌠꆏꂿꑘꊿꒆꌺꉬꌐꐛꅹ，ꊿꊇꆹꎆꐥꌣꈚꇈ，ꎆꆳꋙꆳ，ꉈꑴꆏꑮꆜꄡꌐꀋꉆꃅꐥ，ꄡꇗꂿꑘꊿꒆꌺꇬꄉꅐꇁꌠꏹꍓꋋꂷꏭꆏꇫꄙꀋꄐꇬꎷꀐ。ꋍꇬꅲꆎꈋꊰꀍꃈꄚꇱꀋꏦ，ꇅꊝꀉꑌꌠꆹꋍꅇꌕꇬꐕꄏꌠꀋꐥꌐꇈ。ꈀꄸꑌꉉꄺꀋꅐꃅꄜꉺꁌꈍꑋꑟꈍꑋꈁꌠꉉꇁꌐ，ꃬꎔꀈꆺꆹꄚꍬꄉꀑꀋꐥꂪꀋꐥꃅꇗꏦꉌꒉꇁꇬꎷꌠꉬ。ꃬꎔꀈꆺꅿꉐꆂꅆꃅꄧꃅꄧꌠꊋꃤꌌꄉ，ꇮꑳꑞꈚꇬꑟꂿ，ꋙꐚꋠꄷꆏ，ꄜꉺꁌꋍꃪꂶꌠꆹꄚꎧꅝꎸꋠꅉꇬꄉꉉꐛꇬꎷꌠꉬꀐ。

ꊯꇬꏓꇁꋍꇬꃅꉉ，ꄚꃬꎔꀈꆺꅿꀑꇬꄂꃺꆜꃺꄓꊬꌠꄮꇬꆏ，ꇩꏤꆹꄚꍬꄉꏡꀱꉉꀱꃅꀨꈁꉜꇐꁱꀕꌌꄉꋊꍬꋊꄻꌠꃅꀐ，ꌜꊐꌠꀨꈁꉜꇐꁱꀕꄯꒉꈧꌠꆹꌌꋊꍬꌊꀋꇊꃅꐙꌐꀐ，ꀨꈁꃆꂮꌤꃅꌠꊿꀉꑌꈧꆹꐚꀕꈠꀕꃅꋍꁥꃅꐂꀉꁁꌤꃆꎹꄉꃅꁧꅀꈛꎂꃅꄚꍬꄉꌤꃅꅍꀋꊌꆙꅜꌐꌠꉬꀐ。ꃬꎔꀈꆺꆹꐂꇁꀨꈁꎹꈍꑌꁯꅍꊐꋺ，ꄚꀨꈁꎹꈧꌠꆹꉬꇮꃅꐯꊂꈹꄉꂴꊁꃅꑍꊰꐜꀋꈨꆙꅝꌐꀐ。

ꇢꈴꄜꊨꒊꇁꀁꑌꄷꃲꆏ，ꇫꐥꄎꌠꀨꈁꈍꑋꁯꌠꌋꆀꌜꇬꄈꀨꅿꀃꈈꃀꄳꆹꐈꌊꀊꂥꌐꀐ，ꌧꊙꉔꎹꌠꃅꇬꆹꈎꄜ、ꌷꋊꃅꑠꑴꅍꈢꅍꐥꌠꏦꋪꑋꀉꑌꃅꐥꌐꀐ。ꃬꎔꀈꆺꌟꃅꐛꌠꌧꊿꑠꆹꊿꋋꅉꀋꐚꇬꉚꀋꒉꌐꌠꉬꀐ，ꃬꎔꀈꆺꆹꇨꇅꃃꌌꀁꇬꐥꄉꌞꊂꌋꆀꐧꋦꋋꂷꊂꊨꏈꇱꀋꏦꃅꎌ。ꃬꎔꀈꆺꆹꀁꇬꐥꄉꎆꌬꊌꐨꀋꐥꐛꅹ，ꅉꀕꃅꂿꄐꀋꐥꌠꋙꅝꃤꊾꂷꉬꄷꑮꃀꇱꌌꁒꐀꄉꐥꅷꇁꇬꎷꌠꉬ。ꌺꃰꌬꍩꀋꐥꄷꆏꌺꃰꐛꏮꀐꄷꉉ，ꃬꎔꀈꆺꆹꄸꈐꅇꏤꒃꄉꀋꎪꃅꈍꄮꑋꇨꆹꄸꎌꇬꎷꌠꉌꂵꀀꑌꅷꇁꌠꉬ。

ꏮꋩꄮꇬꑞꄮꇬꆏ，ꇓꈓꇬꊿꈧꌠꆹꈀꄸꑌꐮꇬꄉꈁꁠꁵ、ꐯꊩꐮꁱꋠꇖ、ꇗꎹꋚꎷꇬꎷꑵꉬ，ꐛꄟꋌꑵꆹꃬꎔꀈꆺꋌꎼꉪꋚꎑꇁꌦꀐ，ꃬꎔꀈꆺꆹꀒꉭꊂꉫꃅꀑꆊꊼꇅꀕꄷꆏ，ꉪꇁꐚꅪꆿꆉꂷꌠꄀꇁꀐ。

ꐚꅪꆿꆉꆹꃅꐨꑍꄜꅿꏓꄻꊥꃀꉬ。ꃅꐨꑍꄜꆹꌜꋌꈚꇬꀨꍝꀉꆹꁬꉬ，ꃑꃷꁨꀁꑌꇈꈌꋊꌊꉉꀖꌞꊿꆹꇰꀋꇎꑴꇬ，ꄚꀨꍝꀞꐩꋊꆹꉬꊰꎖꈎꐥꀑꌠꉬ，ꀊꋨꄹꈎꀨꍝꅐꃑꄮꇬꇰꆐꇭ꒜ꏐꁱꄉꌠꄯꒉꁱꂷꁰꇷꌬꅷꇁꐛꅹ，ꐩꋊꆹꎵꑳꀕꌠꉬꀐ。ꋋꈍꑋꈓꌜꊐꌠꀨꈁꄯꒉꆹꀁꑌꇁꀐ，ꃅꑘꄜꄉꋓꅔꌠꆏꉈꑴꀊꅰꃅꀉꒉꇁꀐ，ꈀꄸꁈꉬꀋꐚ，ꈀꄸꉪꐨꉬꀋꐚ，ꀨꍝꂓꄺꀱꌊꃅꐨꑍꄜꂓꇬꎭ，ꂓꄺꀱꄉꈭꐨꀨꍝꃑꃷꁨꆹꉀꀋꎆꑴꇬ，ꄚꅲꎼꇁꇬꀋꃋꋋꄮꃤꃅꐛꉈꑴꆏꉇꄅꃤꃅꐙꑴꌦ，ꏓꄻꊥꃀꐚꅪꆿꆉꆹꊿꂿꄷꆏꉉꇬ，ꉇꄅꃤꉬꌠꌧꀕ。

ꐚꅪꆿꆉꆹ，ꉬꊰꎖꈎꐥꀐꌠꁦꋠꄿꀠꂷ，ꉪꐨꆹꇰꇗꌬ，ꄚꄡꇗꃅꀹꀊꏀꌠꉌꃹ。ꊿꑠꃅꐙꑠꂷꆹ，ꄚꄡꇗꊛꄉꌟꒉꌕꈭꄻꀐ，ꋍꇂꃴꌟꒉꀊꏀꇇꀨꊿꈍꑋꑹꈧꆹꋋꇱꍅꄉꇬꎷ。ꄐꅍꐥꌠꇇꀨꊿꄹꁆꆹꈭꈪꈜꈪꏹꄉ，ꏠꊐꉀꐕꌐꀐ，ꄐꅍꀋꐥꈧꌠꆹꋍꏸꑭꇂꃴꐥꄉꌤꃅꌐꑴꌦ，ꌩꃶꃆꄔꆹꌈꌠꌡꃅꐥꌐ。ꀑꁮꌠꊿꆹꉌꂵꐝꉅꇬꑌꇈꉌꂵꑘꒃ，ꂱꑱꌜꊾꌬꏦꉻꋌꑵꉉꄷꆏ，ꑞꈭꀋꁨꃅꐛꌠꉬ，ꃀꌤꍆꄉꀀꐔꌟꃅꐔꌠꌡ，ꈀꄸꍆꆏ，ꈀꄸꃤꐛꈨꉬ，ꅑꅸꋌꐔꌐꄮꇬꑟ。ꋋꆹꇁꉚꅷꋌꎞꑬꆏꄮꇬꑟꑳꆀ，ꑋꅉꉆꅉꋋꂷꆹꊌꏆꊁꇁꌠꊿꈧꌠꁵꄸꉉꉆꌠꉬꀐ。

ꐚꅪꆿꆉꆹꇯꍝꃅꇬꆏꇥꀯꉾꃪꌠꌗꉆ，ꌤꃅꇬꎍꐽꌠꎹ，ꌩꁧꇂꃴꈴꒉꇬꂯꌩꏽꊯꇁꋍꀂꏾꇬꅥꇁꌠꏦ。ꋍꐥꍂꇬꆹꑽꃤꃅꀋꋻ，ꈌꄀꅇꋍꇬꉉꂿꄷꃨꆰꐨꑠꋍꃢꀉꄂꊝꋺ。ꋍꈌꄀꅇꆹ“ꑠꃅꊼꇅꉉ”ꄷꑠꇬ。ꊨꏦꀨꎹ꒜ꈿ，ꉎꊐꌠꌤꃅꅉꐊꄉ꒜ꈿ，ꅀꍔꑠ꒜ꈿꅉꇬꄉꅇꉉ，ꀭꄒ꒜ꈿ，ꈍꃅꄿꂿꈌꄀꅇꋋꇬꅿꌬꐨꇯꍝꃅꋋꌌꇇꏿꎆꈠꌬꈴꇨꀕꑠꇬꉬꀐ，ꀒ，ꌤꃆꋋꏢ，ꑠꃅꊼꇅꉉꂿ，ꄚꊁꆏꌤꃆꀉꁁꏢꉉꂿ。

ꌞꊿꌌꌧꇬꀊꋨꃢ“ꑠꃅꊼꇅꉉ”꒞ꌊꌜꍬꏦꍤꄻꊈꑼꉼꇬꑟ，ꌜꍬꏦꍤꄻꊈꑼꉼꇬꇯꍝꃅꊿꁆꌌꂁꄉꍤꆗꌠꋍꃢꃅꋻ，ꄽꂫꆏꌋꅜꇬ，ꋋꆹꃶꐚꃅꈌꄀꅇꂷꇬꉬꅊꇈ。ꌌꍤꄻꋌꃢꇬ，ꐚꅪꆿꆉꆹꋌꇷꌊꇵꏂꇳꆐꏦꇱꀋꏦꃅꎍꋺ，ꈨꑖꉘꁮꅇꊪꌬꇁꅊꇈ，ꃆꃶꑖꋩꉢꀨꍝꄯꒉꀞꇬꆹꁱꀕꊿꌢꎭꁌꀋꐥꃅꑇꐺꑵꌠꉬ，ꀊꑙꈩꅍꄻꀉꑳꌕꈎꇢꇑꋛꋚꄂꌠꉬ，ꊨꏦꈲꐪꋍꍈꂯꑋꏂꀋꋻꌠꉬꀐ。

ꐚꅪꆿꆉꏓꄻꊥꃀꄺꄮꃅꋊꇬꆹ，ꃅꐨꑍꄜꆹꌜꋋꂷꇬꎆꏣꌋꆀꎆꏣꊿꎁꃅꑆꀮꊋꄑꈭꐨꆏ，ꀉꁁꐴꀖꐨꐥꌠꐧꋦꌤꃆꁱꐘꉬꇮꑠꆹꌌꈍꃅꋓꉪꁨꄉꃅꐺꌠꉬ。ꋍꃢꇬꑣꋂꂘꃀꑠꂷꆏꃄꎆꁯꌠꌤꃆꌌꏓꂱꄯꒉꃅꁱꌊꃅꐨꑍꄜꇫꇇꀨꌠꎹꇁꋺ，ꁰꄻꅉꍗꏓꂶꌠꆹꄯꒉꁱꃑꄷꂯꁱꄉꀐ，ꊁꀨꍝꌌꌕꃢꀕꌠꌡꉜꄮꇬꆏ，ꄚꋌꄽꂫꍤꄻꄮꇬꆏꋌꇱꌉꇧꎭꀐ。ꄯꒉꃑꇬꀋꅑꇬꆹ，ꀂꏾꇬꇛꌺꀎꇓꂷꌠꆹꈍꑋꑍꄻꇬꅑꄉꄎꑴꌦꌠꉬ。ꉢꃀꌠꀐꇬꑌꄡꇗꉢꁳꑽꃤꐆꑴꌦꄷꌦꅀ。ꉢꉜꇬꆍꊇꆹꉌꂵꀋꂄꆈꒉꀕ，ꃛꅉꍆꅉꃅꉆꈉꇑꀐꌠꅀꄷꉉꌐꇁꀋꉆꃅꎌ。

ꃬꎔꀈꆺꆹꐚꅪꆿꆉꇂꃴꄉꏹꍓꄺꋻꌠꉬ。ꏮꋩꑠꋍꃢꇬꆏ，ꋍꃢꃅꈧꌠꍍꊱꁸꃆꂮꀉꄂꃅꂿꄷꄉ，ꊿꑍꂷꌠꌝꀕꈩꐮꁏꇈ，ꁸꐝꂱꑱꅉꁧꀐ。ꀊꋨꃢꆹꃬꎔꀈꆺꂴꅑꄉꏂꇫꇈ，ꃅꐨꑍꄜꂓꅉꌋꆀꏃꄆꁱꄠꇬꈴꄉ，ꐯꇯꄉ“ꈎꏀꋩꑍꄆꁱꀉꇨꃅꏮꇴ”ꃅꈧꌠꀞꄻ。ꊨꏦꃷꎏꎆꏂꑘꌕꊰꎖꁯꌋꆀꍆꅉꏲꉻꏲꂠꏲꌋꈧꌠꆹ，ꐮꆦꄉꇁꌊꆹꄆꁱꈐꏭꄉꒈꆭꀕꃅ，ꈌꁮꑗꁮꍝꄉꏃꑭꊂꏓꂱꈨꌠꏮꈎꏅꉌꌒꄀꐺꇱꀋꏦꃅꎌꌐ。

ꈎꏅꉌꌒꄀꐺꊿꈧꌠꆹꉪꊇꎆꏂꑘꋋꈨꃆꂮꈍꃅꐙꌠꉉꀐ，ꅐꇐꆹꈍꃅꉾ，ꃅꈎꀊꏀꈓꌠꇬꈍꃅꐳꃅꀻꎆ，ꋍꈭꐨꆏꄆꁱꏸꂾꉜꐋꈧꌠꏭ，ꋋꑷꃅꃅꈎꀊꏀꋬꂻꈨꅪꌣꈚꐥꌒꇁꅊꇈꄹꎍꌐ。ꉈꑴꆏꅺꌡꇬꁰꄻꌧ꒜、ꑫꑵꈩꊿ、ꏃꍈꏤꃅꏲꀕꌋꆀꐧꋦꂓꅑꂒꋦꌠꊿꑌꇁꌊꄚꄉꃥꄻꐺ，ꊿꋋꉹꆹꉉꄻꀋꅐꃅꄻꇬꇯꄉꌠꉬ，ꋀꊇꆹꎆꐓꉐꈮꁁꂷꇰꇫꅐꇁꀋꄐꌠꉬ，ꃬꎔꀈꆺꆏꉈꑴꌞꈌꍚꉏꑐꈩꄷꀋꁧꎆꎭꈁꁠꌞꄺꅐꌠꉬ。

“ꈎꏀꋩꑍꄆꁱꀉꇨꃅꏮꇴ”ꃅꈧꌠꀞꄻꌠꆹ，ꅈꇁꉹꁌꈧꌠꉜꈭꐨꆏꉌꂵꇿꌊꒊꌋꀕꄉꉌꃀꊷꆣꀕꌐ，ꉮꀕ，ꉈꑴꉪꊇꏮꈎꏅꉌꌒꄀꅇꂯꄜꏮꇴꀐ。ꀊꄶꈨꏀꌤꃅꊿꈧꌠꈐꏭꊿꈨꌠꉜꈭꐨꆏꄹꁆꆹꇯꍝꃅꑓꂷꅪꇁꀐ，ꋍꀋꃀꌺꈘꆹꀕ，ꉜꅊꇈꂿꆏꉜꆈꃮꐔꑠꋍꏢꒊꄜꋍꂷꋋꇱꃹꒉꋩꀋꎔꇬꎭꄎ、ꀊꉌꐓꁙꆏꍯꉘꋍꁍꋋꇱꁧꏖꍍꆀꇬꎭꌠꉬꅊꇈ，ꑡꏡꁈꑌꉬꇮꃅꏁꄉꌬꌐꀑꇬ，ꈍꃅꄉꉪꇁꏡꁈꋋꏢꌌꄉꋀꊇꅿꐣꁙꇬꎆꃀꀖꄎꌠꇬꀋꄀꌠꉬꂯꀋ。

ꑠꐛꅹꃅ，ꃬꎔꀈꆺꆹꄚꄉꂓꉻꀉꅰꃅꂓꅑꇈ，ꀑꁮꅺꐳꌧꅍꐥꊿꐛꀐ。ꃬꎔꀈꆺꆹꏭꇁꉈꑴꄉꐚꅪꆿꆉꌋꆀꀱꉈꑴꋍꃢꍍꊱꁸꃆꁸꂮꌧꇁꀐ，ꊾꂷꈮꁁꊌꌠꇬꄉꆦꌊꌕꌋꊌꌠꌋꆀꏃꌋꊌꃅꄉꌌꋊꁸꄷ，ꃬꎔꀈꆺꆹꆏꏃꌋꊌꄷ。

ꐚꅪꆿꆉꆹꃃꎺꀋꇬꃅꁶꇁꁱꄜꇬꄀꇈ，ꈂꀸꇬꆏꅇꄸꉐꄸꀋꆏꃅꏈꅷꐺ，ꈍꃅꑋꇬꉬꀋꅲꃅꎌꀐ。ꃬꎔꀈꆺꑌꇨꇅꃃꐛꅹ，ꀊꋨꄮꇬꆹꎆꏂꑘꈍꑌꊯꎖꁯꑠꈨꆏꎆꃀꏮꎻꌤꃅꅉꇬꀋꇁꑴꌦꄉ，ꄔꃛꋋꉉꌦꅐꇁꄎꌠꉐꆂꏡꌠꉘꇉꄉꇈ，ꀥꇁꎆꏂꑘꈍꑌꊯꎖꁯꌠꏤꄉꇇꈤꃅꎆꃀꊯꎖꃪꂷꋍꇱꎴꌊꇁꇈ，ꉬꇮꃅꋍꄹꇁꋍꊨꏦꅿꐣꁙꇬꊐꌐꋺ。ꌤꃆꋋꐘꆹꐚꅪꆿꆉꋋꌌꇨꇅꃃꌊꉌꂵꆅꆙꅜꇈ，ꋋꈭꐨꆏꋍꊨꏦꇭꀧꇫꆹꅉꀕꃅꉌꂵꆅꉃꌠꁬꋌꑠꑵꁦꎆꃅꀵꐺꅷꇁꇬꎷꌠꉬꀐ。

ꌤꆿꆹꑠꃅꄉꃅꑍꃅꉖꐊꇬꈴꁧꀉꑌꈎꇢꀐ，ꄚꃬꎔꀈꆺꆹꉈꑴꋍꃢꐚꅪꆿꆉꇬꀋꂿꀋꉆꀍꃈꄚꆹꄺꅐꌦꀐ，ꃬꎔꀈꆺꆹꇯꍝꃅꁮꂿꐚꂿꆏꏾꌌꀕ，ꃌꂿꌺꂿꆏꊎꉻꀕꑵꌠꉬ，ꌞꊿꂲꆽꄉꇬꆹꑗꈈꀕꇬꎷꇈ，ꋋꆹꈀꄸꑌꇬꅉꐚꌐꌠꑠꂷꉬꀐ。ꋋꆏꏡꁈꀋꐥꌊꁈꋍꁈꈤꀕꄉꆿꃀꁈꋍꆏꈌꎸꑣꑵꌠꉬꀐ，ꑞꃅꄷꆏꊾꎭꆏꉌꊋꏣꀋꎴꑵꉬꅊꇈ，ꐧꇂꃰꊿꄹꁆꆹꒊꇸꇉꏡꁮꇬꄉꀇꐒꌤꌦ、ꄹꁆꆹꈾꋩꄷꉻꇬꄉꀃꃀꂮꌦ、ꄹꁆꆹꇤꈏꏡꁮꇬꄉꈜꈼꌦꌠꐥꑵꉬꅊꇈ。ꀊꋨꄹꉈꃬꎔꀈꆺꆹꈛꎂꃅꇁꌊꐚꅪꆿꆉꄰꅍꑟꇁꀐ，ꋋꂴꆽꆹꄆꅇꂷꑌꅥꐚꅪꆿꆉꆹꁵꀋꀬꌠꉬ，ꋍꏸꏦꌠꆏꄆꅇꆹꂴꆽꅥꎻꒉꄷꆏ，ꐚꅪꆿꆉꆹꈍꃅꑋꉌꂵꊭꑌꄎꑌꃅꊭꄏꄉꋋꇁꉚꈨꌠꐒꏦꌠꉬ。ꄚꉪꈭꎁꊿꈧꌠꅿꉪꇐꉪꈜꇬꈴꄉꌌꊨꇽꄷꇬꆏ，ꌤꀋꐥꆿꀋꐥꇫꆹꈀꏾꃅꌞꅍꆹꒉꑵꀋꉬꌠꉬ，ꉘꀋꇉꃅꋋꇅꃅꌞꊿꅲꇫꅀꌞꊿꅍꆹꌠꑠꆹ，ꈍꃅꑋꁻꌐꂿꃆꑠꆹꐥꌐꌠꉬ。

ꐚꅪꆿꆉꄰꆹꈌꀞꀈꋓꑠꂷꉘꄉꁨꇈ，ꅉꀕꃅꄺꇁꑱꈐꎭꃔꈈꑌꅍꈧꌠꇬꀀꄉꇬꎷꐛꅹ，ꈌꀞꀈꋓꋋꂷꆹꈍꄮꇯꆐꁱꐛꌷꐙꌊꂓꅑꀐ，ꆎꃢꌌꈚꌌꈍꃅꂓꅑꌠꈚꄿꂾ，ꌣꈚꌢꎭꊿꅿꊋꌗꆹꈍꃅꑋꐯꀋꌡꌐꑵꉬ，ꈌꀞꀈꋓꂷꌠꆹꀒꁨꄉꊼꇅꁨꅿꆹꄷꆏꋋꇱꅿꐝꉅꇈ，ꋋꆹꋌꇅꃅꌗꋏꅇꄜꌐꂷꃑꇁꋍꃥꌋꄰꁵꇬꎷꌠꉬ，ꀂꏾꉈꅀꁍꎼꆣꇬꎷ，ꋋꆹꋍꃥꌋꄰꀉꄂꇫꅉꐚꇮꌠꈯꄿꇶꏦꅇꂷꉬ。ꃬꎔꀈꆺꆹꉉꄺꀋꅐꌠꆏꂴꆽꑵꌠꉬꂿꇐꏽ。ꄚꑠꃅꑴꇬꇁꉚꅷꐚꅪꆿꆉꂶꌠꌋꅜꄮꇬꆏ，ꃬꎔꀈꆺꂶꌠꆹꅞꇁꋇꏤꃥꋩꑳꇬꎭꃔꈈꑌꅍꈧꌠꄩꑌꎌꀐꅊꇈ。

ꐚꅪꆿꆉꆹꀋꅞꉖꈊꃀꀋꀀꃅꌋꐚꃅꉌꈲꂸꏧꑵꌠꅥꅷꌋꁁꃬꀮꇴꄮꇬꑟꄉ，ꂵꆤꈐꆏꀀꑌꇴꌒꐮꇴꌒꃅꑭꆏꇈ，ꃬꎔꀈꆺꂶꌠꋀꅍꇁꌠꇱꇶꌾꀀꄖꇬꎭꐛꅹ，ꐚꅪꆿꆉꆹꀑꃀꑓꉱꏂꌊꃱꀋꐚꃅꎌꑴꌦ，ꑓꆫꑌꊉꆱꎌ，ꈁꑓꇬꑋꑊꈜꆹꀉꑌꃅꁦꎆꇁꇈꁠꐬꑍꂷꑋꅑꀐ，ꈍꑋꈓꊌꀋꂿꇬꆏ，ꐚꅪꆿꆉꆹꇯꍝꃅꃀꌠꈤꐙꀙꀐꅊꇈ。

ꃬꎔꀈꆺꆹꀑꑊꀉꄖꌊꑊꋌꇬꀋꈁꑵꌠꉬ，ꏭꊽꈁꑓꐛꐪꐛꐈꄟꇬꉜꄉꁱꐭꇮ，ꐂꇁꐚꅪꆿꆉꄰꀂꇬꃹꇁꄷꌠꆏ，ꀋꆏꃅꍖꑻꅇꈧꌠꉉꌐꇁꀋꉆꃅꎌ，ꄽꂫꆏꇇꇬꄉꉈꄅꇩꏤꎧꑍꏣꌋꆀꉬꋚꎧꑍꏣꋋꀖꇁꄺꆿꏪꅝꄜꄩꅞꄉꇈ，ꊛꄉꉉꇬ“ꑊꏦꀐ，ꎧꁠꆚꈋꑟ”ꄷ。ꐚꅪꆿꆉꆹꀑꑊꄺꋌꀋꁵꋍꇬꑊꀋꏦꃅꉉꇬ，ꉡꆹꆏꊊꂿꄷꆏꉠꏸꏦꇁꇬꎷ，ꆎꆹꉈꑴꑡꏡꁈꀉꏀꌠꐥꌦꀐ。ꐚꅪꆿꆉꆹꑠꃅꃬꎔꀈꆺꇬꅲꅷꐺ，ꀋꃅꆹꇿꇬꄉꇜꒆꎆꄌꎆꃬꐺꀋꄷ？

ꃬꎔꀈꆺꂶꌠꆏꀂꇬꃥꌋꀋꃀꋑꄉꋙꒌꋚꋠꐺꃅꅇꀱꇱꀋꏦꃅꀱꅷꐺ。ꐚꅪꆿꆉꆹꋍꉌꂵꇬꄉꈍꃅꋋꐞꉅꌐꌠꉬ，ꉪꅷꇁꃬꎔꀈꆺꂶꌠꆹꑠꃅꌧꅍꂿꅍꐥꀉꇨꇈ，ꌅꈌꌫꅉꉆꈉꍈꌠꇬꄀꇁꄮꇬꆏ，ꊼꇅꊽꉌꂵꐛꀋꐛꇁꇬꎷ。ꄷꀋꁧꀋꋓꀋꉪꃅꋍꑓꁴꇯꑓꇬꇉꇁꇈꐪꊛꄉꉉꇬ，ꀈꆺꌺꀋ，ꇯꍝꃅꉡꐝꈷꐮꐞꈷꌠꆏ，ꆎꆹꇯꍝꃅꅽꊨꏦꑴꅉꇯꆐꌧꅍꂿꅍꐥꀉꇨꂷꉬ，ꄚꆎꆹꌤꃅꆿꃅꇬꆏꃀꅉꆐꈍꃅꑋꊽꉌꋬꈯꐛꃅꀋꐛꇬꎷꑠꂷꉬ。

ꉌꈲꏮꋩꌐꄷꆏ，ꃬꎔꀈꆺꆹꇁꌊꃅꐨꑍꄜꎹꇬꐥꄉꌤꃅꇁꀐ。ꃬꎔꀈꆺꆹꁸꌊꎆꏣꈨꏀꀯꇬꄉꏹꍓꄺꌠꉬ。ꇯꍝꃅꅇꐚꉉꑳꆏꄚꋍꅿꉆꈉꑋꅉꋋꂷꆹꆐꎹꈻꎷꃆꎹꂮꎹꅍꍈꂯꀋꅑꄡꑟꌠꉬ，ꄚꑠꃅꑴꇬꃬꎔꀈꆺꅿꐛꊈꆹꇨꊸꌊꃀꅉꆐ，ꇯꍝꃅꃬꀮꊷꊸꁨꊰꄂꑵꌠꑠꂷꉬꀐ。ꃬꎔꀈꆺꂷꌠꆹꋍꃢꇁꅉꀕꃅ，ꁖꀊꄶꉈꏮꅊꁧꄉꅲꁰꁧꂿꃆꐥꄮꇬꆏ，ꇁꌊꀊꄶꎆꏂꑘꅀꍔꃚꌟꒉꈧꌠꌋꆀꌧꈿꁉꈿꌠꊜꋽꐨꐥꇁꄮꇬꆏ，ꋍꊨꏦꑴꅉꆹꅉꀕꃅꌅꈌꂒꅉꑠꍈꀋꐥꐛꅹ，ꋋꉜꇬꀑꊰꑊꊰꀑꑊꀋꐥꌠꌡꇬꎷꄉ，ꇯꍝꃅꊼꇅꌞꊽꂴꆽꄉꅇꂷꊒꀕꃅꉉꀋꀬꇬꎷꑞꃅ。

ꉜꅊꇈꂿꆏꀋꉊꂴꆽꋋꀊꄶꇬꐥꄉꌤꃅꋺꌠꑍꄜꎹꈍꑌꁯꌠꆹ，ꈍꃅꉉꈍꃅꄿꂾꄡꇗꌟꒉꂒꅉꁬꃷꒊꑠꍈꆹꎹꄉꄺꉆꇬꎷꌠꉬ，ꀉꁁꄷꀋꁧꌅꈌꑱꅳꁖꒊꍈꂯꀋꐥꌊꄉ，ꀨꀋꐊꒉꎰꀕꃅꂒꉻꀉꄂꀵꐺꌠꌤꏲꅉꍗꏓꍈꑋꄺꉆꌠꉬꅊꇈ。ꐚꅪꆿꆉꉜꇬꑌꄡꇗꃬꎔꀈꆺꌟꃅꁦꋠꀉꇨꌠꑠꆹ，ꌌꄉꉇꃅꀊꄶꐚꀕꌠꈨꏀꄯꒉꀄꊭꑵꌠꀉꄂꁰꄻꇬꆹ，ꇯꍝꃅꊼꇅꁧꈿꆿꈿꐜꅖꑵꉬꀐ。

ꐚꅪꆿꆉꆹꑓꂭꋏꄹꑓꋪꈍꑋꇅꈩꇈ，ꈂꀸꇬꆏꇵꇙꍞꇙꄹꁭꎐꈨꑌꃅꊾꋌꀋꈨꃅꑠꈍꑋꇅꄹꈭꐨꆏ，ꏡꁈꀊꏀꑠꋍꏢꄧꄹꇁꌊꋍꉌꂵꇬꃹꇁꀐ。ꀊꋨꄹꉖꃅꃤꄮꇬꆏ，ꑍꄜꎹꇬꌤꃅꊿꈨꌠꆹꌤꃅꈻꁧꌐꀐ，ꌤꃅꅉꈴꈌꈚꌠꇬꆹ，ꌤꃅꐋꀨꈨꌠꆹꋍꂷꂯꇬꀋꐥꌐꀐ，ꑠꅹꐚꅪꆿꆉꆹꋋꇅꃅꃬꎔꀈꆺꂷꌠꇴꌊꋍꊨꏦꌤꃅꑳꁨꌠꈐꏭꃹꇁꄉꇈ，ꀋꂁꀋꉱꃅꉌꂵꀖꄉꃬꎔꀈꆺꅿꑋꅉꉆꅉꌤꃆꈨꌠꌌꋍꇬꋍꃢꇕꄟꀐ。

ꐚꅪꆿꆉꉉꇬ，ꆎꆹꈍꃅꑋꆏꅉꐚꌐꋭ，ꀋꃅꋋꈍꑌꈓꇬꆹꌤꃅꅉꑠꆹꇿꇬꑌꊿꌐꃅꌐꀋꉆꌐ，ꇿꇬꑌꊿꌧꅍꂿꅍꐥꌠꐮꆽꈯꌐꀋꉆꃅꐥꌐ，ꆎꆹꊿꌧꅍꂿꅍꐥꌠꀉꇨꑵꌠꆹꉬꀕ，ꌧꅍꂿꅍꐥꌠꀉꇨꑵꌠꑠꆹꉬꑲꆏ，ꍑꑴ，ꆎꑴꌠꏟꈯꀕꃅꊼꇅꊋꂵꊋꇱꌦꅊꇈ，ꉠꎁꃅꀉꇨꃅꉈꑴꋍꁊꑍꁊꊋꇤꄉꎆꃀꈍꑋꀧꊼꇅꎹꌦꉏ，ꄚꉠꉆꅉꄉꃷꅉꋋꈚꂵꄺꊼꇅꀉꂥꃅꎻꇁꉏ。ꐚꅪꆿꆉꆹꅇꂷꋋꈨꉉꇬꆏ，ꈁꑓꆹꋍꍈꂯꀋꊸꀋꅪꌠꉬꀐ，ꐚꅪꆿꆉꅿꉪꐪꆹꇯꍝꈍꃅꎃꐚꇈꀋꎪꃶꐚꑵꌠꉬ，ꊨꏦꑴꅉꆹꀉꁁꈍꑋꈓꀉꄂꍣꑲꆏꌤꃅꅉꇬꄉꎞꑬꆏꇁꂯꄉꀐ，ꎞꑬꆏꇁꂯꄉꄮꇬꑳꆀꉆꈉꑋꅉꆹꌌꇁꇙꈩꑠꑵꆹꀋꐥꌐꌠꉬ，ꒉꂥꆏꇉꂥ，ꎆꃀꐥꄷꆏꑊꋌꂯꃼꌊꇁꐂꇓꃴꇁꉆ，ꀊꋨꄮꇬꆏꑍꄜꄯꒉꆹꆏꊂꌕꑍꅐꌠꄺꀱꌋꆏꊂꉬꑍꅐꌠꂯꐛꉆ，ꄷꀋꁧꑍꄜꄯꒉꑋꌌꀉꒉꃅꍑꅐꎻꇁꇈꑍꄜꄯꒉꁌꏤꑋꌌꉀꐕꉆꌠꉬꀐ。

ꀊꅰꃅꀋꉬꀋꉆꌠꆏ，ꋍꃅꐪꑽꑌꑠꆹꄩꏯꌟꒉꈨꌠꁳꑌꊼꇅꊌꂿꇁꉆꌠꉬꀐ，ꑍꄜꄯꒉꑠꃅꀞꄻꌊꃅꇴꃄꇴꃅꂓꅑꇬꎌ，ꐚꅪꆿꆉꑋꀊꅰꃅꃀꌠꆏꀊꅰꃅꀑꐥꑊꐥꌠꉬ，ꃅꅍꂓꆹꀋꄸꄷꄩꋍꐕꆹꐕꊌꄎꑴꌦꇮꇬꆏ，ꎞꑬꆏꈭꐨꆏꄡꇗꁨꌊꉈꑴꌤꃅꇁꑴꌦꌠꉬ。ꐚꅪꆿꆉꉉꇬꉠꉆꅉꄉꃷꅉꋋꈚꂵꄺꊼꇅꀉꂥꆹꄎꄷꆏ，ꈲꐪꈲꏣꆹꈀꄸꑌꐯꇯꁨꌬꌠꉬ，ꉡꆹꅽꇇꀨꄉꏓꄻꊥꃀꇇꀨꊿꂷꂵꅽꇇꇬꊐꅀꁋꑟꀕꃅꃛꏓꄻꊥꃀꂷꂵꅽꇇꇬꊐꉚꂿꄷ，ꆎꆹꑠꃅꄉꒉꑟꆏꈜꁮꇁꇈ，ꑓꀠꀕꃅꐈꇁꃅꐨꑍꄜꅿꊂꋊꄐꌬꊋꃤꐛꌠꉬꀐꍰ。

ꃬꎔꀈꆺꑌꄡꇗꊿꀑꁮꅺꐳꏠꌠꉬꐛꅹ，ꋋꇅꃅꉉꇬ，ꑍꊏꃪꂷꇬꇎꇓꀋꄷ？ꉡꆹꋍꃢꀉꄂꃅꑍꊏꃪꂷꂵꅽꇇꈐꇬꊐꂾꂸ，ꋍꉐꂯꌌꊨꊏꀋꄉꅊꈫ，ꋋꆹꌌꄉꉡꑍꄜꎹꇬꎁꃅꑆꅐꊋꌞꌠꌗꃅꄉꂿꄷ。ꐚꅪꆿꆉꉉꇬ，ꉬꊰꃪꂷꈁ，ꉡꆹꃄꐎꋍꈓꄺꆏꁴꊭꄎꎼꂾ，ꁸꌊꈍꑋꃢꃅꄉꌌꇁꑲꆏꍑꀐ。ꎆꃀꉬꊰꃪꂷꌠꈐꃹꇁꈭꐨꆏ，ꉡꑌꄡꇗꅽꁧꎁꃅꉎꊐꌠꌟꒉꌠꂿꈧꌠꂴꆽꄉ，ꀋꆏꃅꅇꂄꅇꎔꉉꆹꇬꑋꉉꌒꊋꃤꑌꌠꉬꀐ，ꁱꇐꌬꇐꀉꇨꃅꑠꁬꁱꎻꇁꇈ，ꊋꇨꐯꊋꇨꃅꅽꅿꀰꏢꏲꂠꄐꅍꈧꌠꌌꎬꄵꃑꃅꃑꄉꍗꀳꄩꅑꄉꈭꐨꆏ，ꊁꄽꂫꆏꇥꀯꐥꋭꃷꁨꂷꎹꌊꇁꄉꇈ，ꈜꎂꏿꃅꅽꅿꄉꉣꄯꒉꊿꑱꁯꐥꑭꃅꄉꄀꌊꄚꈐꏭꃹꇁꌐꄷꆏ，ꑡꌤꑌꉬꇮꃅꋍꃢꀉꄂꃅꄉꃅꐛꀕꌐꌠꀋꉬꄷꌠꅀ。

ꃬꎔꀈꆺꆹꄚꍬꄉꑬꆏꋍꂷꐛꈭꐨꆏ，ꋋꇅꃅꃄꋩꏪꈜꁋꆹꌠꀋꏮꎺꋦꁧꑎꑤꇬꉜꄉꏹꀥꏾꁧꀐ，ꄚꄉꎺꋦꁧꑎꑤꏓꂱꍔꃚꑤꍈꀉꋶꃄꑗꌋꆀꊛꄉꋍꑍꋍꉔꂷꀋꆏꃅꐮꇖꐯꋯꀐ，ꋋꈨꆹꈨꑭꃅꐨꅿꏂꇫꊂꑊꁮꅉꉬꀐ。ꃬꎔꀈꆺꆹꎺꋦꁧꑎꑤꇬꉜꄉꆹꂴꆽꆏ，ꐚꅪꆿꆉꆹꉉꄺꀋꅐꃅꊫꃛꄮꇬꌌꀁꉘꍈꌬꉆꌠ，ꏓꇰꁰꄻꌤꃅꅉꍗꏓꄷꌟꒉꀎꇓꂷꃑꄺꎻꃬꎔꀈꆺꀂꏾꇬꅑꎻꒉꀐ，ꄷꀋꁧꄚꍬꄉꏓꄻꊥꃀꏃꉻꌬꇇꌒꂶꑌꋖꇫꁴꎼꁧꌠꉬꑴꌦ。ꏓꄻꊥꃀꏃꄷꋌꈚꆹꀋꃅꑳꆀꁦꎆꃅꄺꐛꄉꌠꉬ，ꈀꄸꑌꇬꅉꐚꌠꆏꀋꉊꂴꆽꆹꑠꈚꐜꀋꈨꌠꉬ。ꐚꅪꆿꆉꆹꂁꄉꇇꁆꌌꂿꃅꇬꁿꄉꇈ，ꁧꎆꃅꌤꏲꅉꈨꄻꄚꇱꇬꑋꃀꈿꄺꀋꅐꌠꉬ，ꋍꇂꃴꌤꃅꊿꈨꌠꆹꈍꄮꇯꆐꉬꇮꃅ，ꄚꋋꇅꃅꐛꐈꇬꎷꌠꌤꃆꋌꈨꇬꆹꋑꌦꋻꅑꌐꌠꉬꀐ，ꋋꆏꌤꃅꈉꊸꐨꐥꌠꉬꀋꂸ。

ꎺꋦꁧꑎꑤꆹꃬꎔꀈꆺꅿꀀꃅꀉꆹꈚꌠꉬ，ꃬꎔꀈꆺꆹꌜꍰꇓꈐꑍꄜꄯꒉꉹꇬꀉꑌꈎꐥꋺꀑꐛꅹ，ꎺꋦꁧꑎꑤꎁꃅꄉꄜꉺꁱꇐꀄꊭꀁꎴꑵꌠꆹꀉꑌꈨꁱꋻꀐ，ꎺꋦꁧꑎꑤꅿꌟꒉꌠꂿꈨꌠꌋꆀꋋꆹꄚꄉꐈꇁꉾꃪꌠꐋꀨꐛꌐꀐ。ꎺꋦꁧꑎꑤꇬꌟꒉꌠꂿꈧꌠꆹꌜꍰꇓꈓꄉꃀꈿꒉꊖꆹꑘꐥꇈ，ꇁꌊꃥꈿꅉꇬꀀꄮꇬꆏ，ꃬꎔꀈꆺꂷꌠꇴꌊꋀꊇꐊꄉꋚꋠꒉꅝꁧꇬꎷꌠꉬ。

ꃬꎔꀈꆺꂶꌠꑌꄡꇗꌜꍰꇓꈓꇬꐥꌠꊿꌧꅍꂿꅍꐥꈨꌠꑠꆹ，ꇴꌊꇁꄛꑣꑤꇬꌟꒉꌠꂿꈨꌠꇰꄉꌌꐮꌦꐯꂿꐋꀨꐛꌐꌠꉬ，ꋋꆹꀋꎸꀕꃅꈪꇗꈪꍣꇬꍬꈴꄉꇈ，ꋍꊨꏦꑴꅉꆹꐋꀨꀉꑌꃅꌧꌠꐧꋦꐋꎹꈝꃀꏭꄜꑣꀮꄑꌠꉬ。ꑤꇬꌟꒉꌠꂿꄹꁆꆏꈩꌒꀜꌒꌠꃆꂮꉌꃹꑠꊜꄮꇬꆏ，ꃬꎔꀈꆺꆹꉉꄻꀋꅐꃅ，ꀊꄶꅇꁊꅉꇬꅪꎔꌠꊥꇺꊿꈨꌠꑠꆹꊙꇴꌊꌟꒉꌠꂿꌋꆀꐮꐊꄉꋚꋠꒉꅝꇁꌠꃅꇬꎷ，ꃬꎔꀈꆺꆹꄚꇢꊭꇢꇓꇬꈴꌠꌡꈩꉹꌠꄺꇬꆏꇯꍝꃅꃀꅉꆐꐪꌐꍈꂯꇬꀋꁮꑵꌠꉬꀐ。

ꃬꎔꀈꆺꇁꎺꋦꁧꑎꑤꇬꑟꇁꇈ，ꈜꎂꃅꇁꌊꆀꃅꃥꆦꅉꈚꌠꇬꀀꆹꀐ，ꋋꆹꑤꍔꃚꅿꌐꄉꃥꆦꃥꀀꅉꈚꉬ。ꈨꑭꃅꐨꃆꂮꆹ，ꂴꆽꋍꈓꂾꇰꆐꃬꎔꀈꆺꆹꌌꇁꀉꋶꃄꑗꑤꍈꂷꌠꏭꋍꃢꉉꋻꌠꉬꀐ。ꀊꋨꄮꇬꋋꆹꊭꄎꄉꇬꆏ，ꋍꊨꏦꑴꅉꀊꄶꇬꐥꄉꌤꃅꌠꈐꏭꑍꄜꎹꈚꌠꌋꆀꐮꐊꄉꀞꄻꂿꇯꌠꉬ，ꄚꊁꆏꉘꀋꇉꌠꈐꏭꑍꄜꄯꒉꀊꋨꁬꆹ，ꉎꊐꄜꉺꀯꇱꈢꇬꎭꀞꀋꉆꆙꅜꅊꇈꄉ，ꌤꃆꋌꐘꆏꑠꃅꄉꋍꈓꍈꂷꄉꇤꄉꈻꄚꈴꁧꀐ。ꀋꑍꊂꆏꈭꂴꆽꂷꌠꂿ，ꃬꎔꀈꆺꆹꉈꑴꄆꅇꏡꅥꇁꀉꋶꃄꑗꑤꍈꂷꌠꁵꇈ，ꄡꇗꉈꑴꋍꃢꉉꅷꇁꈨꑭꃅꐨꄷꏂꇫꄉꈨꌠꄀꇁꌠꉬ。ꀉꋶꃄꑗꑤꍈꉜꇬꆏꃬꎔꀈꆺꅿꏂꇫꌠꆹꇯꍝꉾꃪꍜꉘꐛꅹ，ꄚꍬꄉꇬꉌꃹꊩꌬꏾꌠꉬꀐ。

ꎺꋦꁧꑎꑤꆹꃄꁕꏲꁕꀉꒉꇈꀊꐯꌠꑤꂷꉬ，ꁸꌊꄉꈬꉘ、ꉙꃴꌋꆀꐟꈯꃄꁕꑠꌕꁕꃅꄉ，ꊻꂷꆹꆈꌠꉌꈲꀒꋤꑠꇖꊰꎖꃪꐥ，ꀋꉊꂴꆽꋍꃢꇬꆹꇩꏤꊐꌠꌢꎭꑤꀙꐮꀙꂷꉬ，ꅑꅷꋋꈍꑋꈓꑳꆀꌢꎭꀎꇓꂷꌠꇔꇬꎭꌠꑤꑠꂷꉬ。ꑤꍈꀉꋶꃄꑗꉉꌠꇫꈴꄉꅉꐚꅜꇬꆏ，ꋀꊇꆹꀊꄶꌢꎭꀎꇓꂷꌠꅑꎌꇬꄉꆏ，ꀋꎪꀋꑴꃅꍔꃚꌋꆀꑤꑬꊂꉹꁌꈲꐪꈲꏣꏚꏣꑠꆹꀉꇨꃅꐥꌠꉬꄷ，ꄚꉪꅷꈾꅷꃼꇇꃅꌠꎹꄉꎆꍍꌠꊫꂫꂒꅉꈧꌠꄀꐛꅹ，ꑠꃅꄉꌳꈄꀬꅑꍔꆙꉌꒉꌠꉌꊈꌌꄉ，ꋍꈓꀉꄂꃅꌢꎭꀎꇓꂷꌠꆹꇔꇬꎭꀐ。ꀋꃅꎺꋦꁧꑎꑤꆏꐳꈴꄇꈜ、ꉺꍯꈝꃀꑠꐥꈴꌐ，ꇩꏤꊐꌠꄇꈜꆹꑤꑬꊂꃅ200ꂷꎖꉺꆏꐥꀐ。ꎆꏂꑘꆹꀉꅰꀊꀋꑌꑴꇬ，ꄚꋋꈍꑋꈓꅑꅷꇁꌠꆏꏟꈯꀕꃅꆈꌠꁱꀕꌋꆀꈩꆫꑘꌌꀉꇨꃅꄉꀖꁉꐛꅹ，ꑤꑬꊂꎆꐛꆿꂷꊌꐪꆹꀉꇨꃅꐛꐈꌠꉬꀐ。

ꃬꎔꀈꆺꆹꂴꉘꃀꇬꎺꋦꁧꑎꑤꆏꑤꊐꌠꏃꂷꄺꐛꌠꇖꂽꄷꌗꋏꅇꉉꎻꇁꌠꊾꂷꌠꉬ，ꋍꅇꂷꋋꈨꆹꎺꋦꁧꑎꑤꑬꊂꏲꂠꌠꌟꒉꌠꂿꁥꌠꆹ，ꋋꌌꈢꋒꊂꏸꏦꇈꄸꈐꆏꒈꂃꒊꆱꄓꌐꌠꉬ。ꄚꋋꈨꆹꊇꅉꇬꆏꎧꅝꎸꋠꑠꃢꇬꄉꈩꅍꀖꌠꅇꂷꇬꉬꑴ，ꄚꑠꃅꑴꇬꇯꍝꃅꇁꌊꈎꄜꀊꏀꑴꌦꌠꎺꋦꁧꑎꑤꑤꍈꀉꋶꃄꑗꅿꉌꂵꇬꆹꌸꃹꅊꇈ。ꄚꋋꈨꆏꇯꍝꃅꇬꆹꉉꌠꆏꋓꉪꀋꁨꅲꌠꆏꉌꂵꑋꑵꌠꉬꅊꇈ。ꑠꅹꈨꑭꃅꐨꆹꋌꐘꃅꇬꂾꌒꃚꉘꃀꁘꌠꉬꂿꇏꏾ。

ꋍꋬꈭꃅꌌꄉꄜꉺꄜꁊꌠꇬꈴꄉꇈ，ꎺꋦꁧꑎꑤꅿꀋꃅꐛꐨꈧꌠꆹꌌꇁꐉꒆꃅꍔꆙꐧꇁꃰꊿꂾꅞꀨꌐꄉꇈ，ꄚꍬꄚꁠꄉꇈꐧꋦꑡꁆꏯꃅꇁꄚꎺꋦꁧꑎꑤꇬꉜꂄꉜꁨꉌꇬꌐꄷ，ꃬꎔꀈꆺꆹꉈꑴꐪꊛꄉꉉꇬ，ꈨꑭꃅꐨꃅꌐꈭꐨꆏ，ꄡꇗꐪꊛꄉꃅꐨꈍꑋꈨꌌꃅꈩꄉꇈ，ꃼꇇꃅꌠꎹꄉꎆꍍ，ꌞꊿꃅꆏꄔꃛꁱꀕꋩꑍꀞꉆ，ꆎꑌꄡꇗꈾꃚꑸꑽꁱꀕꋩꑍꀞꉆ、ꆈꌠꂚꃨꁱꀕꋩꑍꀞꉆ、ꆈꌠꈎꏅꈎꊒꋩꑍꀞꉆ、ꆈꌠꃢꃅꈚꎔꋩꑍꀞꉆ、ꆈꌠꈍꎞꈍꈩꋩꑍꀞꉆ，ꏓꇁꀑꐱꃅꉉꑲꆏ，ꐪꊛꄉꄎꏒꀕꌠꃅꐨꌋꆀꋩꑍꈍꑋꀞꄻꎻꇁꉆꇈ，ꌜꇬꌟꒉꌠꂿꅿꉌꊋꌌꀉꇨꃅꉀꐕꎻꇁꄉ，ꋀꊇꁳꐴꀕꊇꅉꇬꄉꇈꉪꎺꋦꁧꑎꑤꅿꊋꂫꑌꌠꌧꎺꇁꉌꂵꇬꊐꄉꌐꅊꇈ。

ꈨꑭꃅꐨꅿꉪꅉꑞꅉꆹꈨꏀꄜꉺꌠꉬ，ꄚꎺꋦꁧꑎꑤꆹꀋꎪꃅꑊꀡꌡꌠꍑꑊꄜꉺꁌꎆꃀꃘꊰꃪꂷꆹꃹꁵꄷꅐꌠꉬꀐ，ꋋꆹꌌꇁꑍꄜꄯꒉꍑꑊꁌꌋꆀꃅꈩꊭꄎꄐꏤꎆꃅꄉꌠꉬ。ꎆꃀꋋꃘꊰꃪꂷꌟꆹꎺꋦꁧꑎꑤꑤꍈꀉꋶꃄꑗꋋꌌꊝꀋꌒꃅꌕꑍꌕꉖꎍꀐ，ꀉꋶꃄꑗꑤꍈꋋꌌꃅꇐꁈꀋꊌꌠꆹꎆꅐꉌꂵꈢꆅꏠꌠꀋꉬꃅ，ꁍꎼꌞꊿꇱꒃꇇꈐꇬꊐꏦꐘꌠꉬ。ꀉꋶꃄꑗꑤꍈꆹꇯꍝꃅꈎꄜꀊꏀꑴꌦ，ꇜꒆꈝꃀꀉꎴꐯꀉꎴꇈꊫꂫꃰꇌꀉꇨꅑꐥꑴꌦ。ꑠꐛꅹꃅꉉꄷꀋꅐꌠꆹ，ꋋꆹꄡꇗꊨꏦꎁꃅꂒꉻꍈꑋꉪꌠꉬꂿꇐꏽ，ꎺꋦꁧꑎꑤꇬꄜꉺꌠꆹꋍꊨꏦꇬꄜꉺꌠꌗꌠꉬ。ꄚꃶꐚꐛꐨꆏꎺꋦꁧꑎꑤꑬꊂꊿꂷꐽꏡꃅꇬꋍꈓꌠꎆꃀꊌꐨꆹꃘꄙꂷꎖꀉꄂꊌꑴꌦ，ꑣꋂꇥꀯꈧꌠꅿꃄꎆꆹꊱꁨꃅꄉꊌꃑꁵꀋꄐꌐꑴꌦꌠꉬ。ꆎꆹꈍꃅꄉꀉꋶꃄꑗꑤꍈꁳꈂꀸꁉꄉꉹꁌꈧꌠꏭꅇꉉꂾꄸꌠꉬꂯꀋ。

ꅑꅷꊂꇖꑍꄹꉈꂵꆤꑤꇬꌟꒉꌠꂿꃀꈿꄮꇬꑟꄮꇬꆏ，ꀉꋶꃄꑗꑤꍈꆏꈁꑓꐛꀋꐈꁏꀋꆽꇈꉌꂵꀋꇙꀋꐂꃅꄉꇈ，ꀔꉚꄷꑠꇬꊫꇈꑊꑍꏦꒉꋦꃅꃀꈿꅉꇬꄉꈨꅇꋋꏢꄛꇰꀐ，ꃀꈿꅉꇬꆹꋋꇅꃅꆈꁨꇤꊭꀕꌊꌙꈈꀋꄹꃅꎌ。ꀉꋶꃄꑗꑤꍈꆏꏟꈯꀕꇈꊒꀕꃅꀋꂁꀋꁿꃅꄉꉉꇬ，ꌤꃆꋋꐘꆹꉪꎺꋦꁧꑎꑤꑤꊐꌠꏃꂷꄺꐛꌠꇖꂽꐨ，ꌌꊋꐛꊋꀋꐛꌠꇬꁧꏖꐨꀉꒉꃅꐥꌠꉬ，ꀋꃅꀃꑍꉪꀱꎺꇁꀋꉊꂴꆽ，ꉪꎺꋦꁧꑎꑤꀻꎆꆹꌠꎁꃅ，ꑆꅐꊋꆜꀙꅗꌠꂴꆽꀎꋏꀿꃀꈧꌠꄀꇁꄮꇬꆏ，ꈍꄮꑋꊽꉌꐡꑓꇗꇁꇬꎷꑴꌦ，ꀃꑍꉪꊇꎆꃀꃘꊰꃪꂷꀉꄂꃹꌠꆹ，ꌌꇁꂥꅂꎴꉜꇈꄩꑟꀏꊭꀑꄷꉉꉆꌠꉬ，ꈨꑭꃅꐨꅿꏤꐪꋋꈨꆹ，ꀋꎪꃅꌌꇁꎼꈎꌤꀉꒉꊰꐘꌠꇬꋍꐘꃅꄉꌌꀒꂵꑟꂿꄷꉉ。

ꀉꋶꃄꑗꑤꍈꉉꌐꄷꆏ，ꊾꂷꀋꉬꄷꉌꋲꄉꇫꅲꂷꑌꀋꐥꌐꇈ，ꌤꃆꋋꐘꆹꑠꃅꄉꉌꃹꑓꐛꈴꌐꀐ。ꀉꋶꃄꑗꑤꍈꑌꄡꇗꉌꂵꆹꊼꇅꁦꉘꌺꃅꐛꇁꄉ，ꋍꊨꏦꀉꄂꇫꌌꉪꃅꌗꍈꅐꎼꇁꀐ。ꃬꎔꀈꆺꆹꊛꄉꆀꃅꃥꆦꅉꈚꌠꇬꇖꑍꀀꀐ。ꉬꑍꐛꄹꉈꂵꆤꇅꌠꇬꆏ，ꐕꍯꏫꍯꇷꆹꇁꌊꄉꃬꎔꀈꆺꋌꇱꋩꌊꑤꍔꃚꈐꏭꃹꆹꇈ，ꑌꐚꃅꈨꑭꃅꐨꏤꐪꄯꒉꏤꁱꄉꌐꀐ。

ꃬꎔꀈꆺꑋꄚꄉꉌꂵꁦꉘꀕꃅꐛꇁꇈꉌꂵꈐꏭꄉꈐꇿꏿꌊꇿꆏꇁꀋꉆꃅꎍꌠꉬꀐ。

ꌕ

7ꆪ6ꑍꄹꉈ，ꃅꐨꑍꄜꇱꌌꊥꇬꄉꌠꏹꍓꅲꁱꊤꆹꇁꌊꎺꋦꁧꑎꑤꇬꑟꇁꀐ。ꅲꁱꊤꐊꄉꇁꌊꎺꋦꁧꑎꑤꇬꄉꃅꈧꈿꇁꌠꆏ，ꉈꑴꌜꊐꌠꄚꃆꂮꐥꌠꌟꒉꌠꂿꑠꑌꐊꑴꌦ，ꊻꂷꆹꐮꇰꊰꇖꑻꐥ。ꃬꎔꀈꆺꆹꈩꆫꑘꇪꌦꇬꄉꉾꃪꌠꃥꑌꐕꍯꀉꒉꑠꇷꑭꌬꌊꌬꇁꇈ，ꃥꑌꐕꍯꀉꒉꇷꌠꑍꁁꏯꆏꁱꂷꀉꅪꇈꀉꒉꌠꄛꇴꅇ“ꃅꐨꑍꄜꎺꋦꁧꑎꑤꄉꈨꏀꅲꁱꊤ”ꑠꑍꎆꑕꇬꄀꄉꌐ。ꈝꃀꈪꆏꃥꑌꐕꍯꀉꒉꇷꌠꆹꀋꆏꃅꆈꌠꑵꉙꅲꌒꐮꅲꌒꌠꄺꇬꃑꅷꇁꐛꅹ，ꀋꃅꑳꆀꒉꌶꅉꇬꄉꅐꁖꇁꌠꏹꍓꀊꏀꊯꑻꌠꆹꈍꃅꉌꇿꑓꇿꉌꐡꑓꇗꌐꌠꉬ。

ꃷꐕꃮꌺꆹꑵꉙꅲꌒꈧꌠꈯꄔꄉꀋꆏꃅꑓꋪꁉꌊꏸꃅꏷꌬꀕꃅꄉꇈ，ꀋꆏꃅꈝꃀꈪꑘꃅꁡꇤꃄꈌꃄꏦꈧꌠꉜꆫꅷꐺ。ꐞꍀꑕꑘꌋꆀꌋꅪꌶꌺꑍꂷꆹꇁꂴꆽꏭꐛꌠꑋꅉꑍꎆꀕꌠꇬꑌꇈ，ꋀꊇꆹꀋꆏꃅꉉꒉꏿꅷꐺ，ꊁꆏꋀꊇꆹꇱꄓꄺꇁꉇꑌꅍꀉꂥꈨꌠꇬꆏꄉꀀꑌꇴꌐꀐ。ꊾꀉꁁꈨꌠꑌꄡꇗꀀꑌꇴꌐꀐ。ꃷꐕꃮꌺꂷꌠꀉꄂꋍꇅꑌꀀꑌꇴꀋꏾꃅꎌꄉ，ꈝꃀꈪꃄꈌꃄꏦꉾꃪꑠꊜꇬꆏ，ꀋꆏꃅꇇꌭꄆꅇꅥꇁꋍꀉꂿꁵꇈ，ꄚꇬꆹꇿꇬꉬꃅꅲꅷꐺ。ꋍꀉꂿꂷꌠꆹꀊꄶꀊꋨꁁꏯꄉꋍꑵꋍꑵꃅꉉꇬꇯꌐꀐ。

ꋍꀉꂿꆹꑍꊏꎖꈎꂿꄚꎺꋦꁧꑎꑤꇬꄉꋍꃢꑘꃅꌶꄻꐥꋻꐛꅹ，ꋋꆹꄚꊖꆈꋌꁕꄩꁧꇂꇉꒉꌋꆀꃰꊿꈨꌠꇬꆹꉂꏣꅼꇻꀕꇈꎵꑳꀕꃅꐥꌠꉬ。ꋇꏤꆹꄚꎺꋦꁧꑎꑤꑘꃅꁡꇤꇬꄉꏣꃀꏣꑟꑠꑌꀉꑌꃅꎹꈹꄉꐥꅷꇁ，ꃷꐕꃮꌺꅿꀊꉘꄮꐰꄯꒉꌷꊷꆏꄮꇬꊜꄮꇬꆏ，ꄮꈉꀊꎳꏢꃅꇁꌊꄚꏣꃀꏣꑟꈨꌠꅍꐥꈩꀀꇁꋺꌠꉬ。ꀋꃉꀃꑍꆏꃅꈎꃅꆪꃅꑍꃅꉖꋌꑵꆹ，ꇯꍝꃅꃅꑍꋚꀋꍈ，ꃄꉖꒉꀋꄐ，ꃅꈎꃢꀋꇢ，ꃅꆪꆞꀋꇢ，ꀋꌋꀕꃅꇁ，ꀋꌋꀕꃅꁧ，ꆈꒉꒊꃀꌡꃅꁧꇬꎷ，ꌭꑌꌭꀋꉆ，ꄡꑌꄡꀋꄐ，ꀋꋓꀋꉪꃅꐩꋊꄮꈉꑋꐛꐈꇈ，ꎺꋦꁧꑎꑤꋋꂷꑬꊂꑌꄡꇗꄚꍬꄚꐊꄉꀊꇨꃅꀑꆴꑊꐈꌐꀐ，ꃷꐕꃮꌺꅿꀊꉘꎺꏣꈐꏭꆹꃄꈌꃄꏦꑠꆹꐛꐈꌊꀉꁁꋍꑵꃅꐙꌠꉬꀐꅊꇈ。

ꄮꈉꉬꂷꐛꈭꐨꆏ，ꂵꆤꃀꄮꈉꊯꑌꂷꊰꃏꇅꌠꇬꆏ，ꃥꑌꐕꍯꀉꒉꇷꌠꆹꏀꇽꌊꄉꂵꅷꎺꋦꁧꑎꑤꑤꍰꇓꈓꇬꃹꇁꀐ。ꏦꈬꏦꎫꑍꁁꏯꌠꇬꆏꏓꂱꏠꍤꈨꌠꉆꐛꃅꄉꇈ，ꋀꊇꆹꇨꃅꄐꄉꏀꇽꌊꇁꌠꃥꑌꐕꍯꀉꒉꇷꌠꏭꇗꅉꃅꇱꀋꏦꃅꎌꌐ。ꎺꋦꁧꑎꑤꏓꂱꍔꃚꄇꃀꂴꆽꂾꆏ，ꈍꎴꃅꄉꇬꇯꆐꄺꀊꂥꃅꀊꄶꇬꄀꄉꌠ，ꈮꈜꃅꋩꏦꌠꋓꊝꅇꈨꌠꆹꉜꂿꉆꀐ，ꄻꇂꃺꅉꏯꄀꄉꌠꆏ“ꊋꇨꃅꐛꐪꋉꑘꄺꀱ”ꄷꇬꌠꉬ。ꌶꌺꊯꎖꑻꑠꁥꆏꎆꇌꃅꉆꄉꇈꇇꇬꆹꁬꃨꌌꄉꀛꐂꅉꃅꋀꊇꇬꋩꏦꐺ，ꑵꉙꑵꁥꌠꆏꄇꈜꂱꋯꑍꁁꏯꌠꇬꉆꎍꇈ，ꋍꈪꌺꐛꇬꆏ，ꃥꋩꑵꉙꑵꃚ、ꂶꀱꂿꃚ、ꂢꇉꏈꃃꅥꃚꑠꆹ，ꒈꈾꌠꃅꈾꌊꑤꍰꇓꈓꋋꂷꃅꋌꌌꇿꇬꑌꏑꇌꀕꌊꎓꁨꀕꃅꎍꌐꀐ。

ꇗꏦꇫꄉꃅꄮꇬꆏ，ꑤꊈꎼꏹ、ꑤꍈꑋꆹꑤꇬꏲꌊꀉꒉꉬꁥꌠꏃꂠꌋꅞꇁꃥꋩꃥꏦꅉꈚꌠꄩꌟꒉꌠꂿꑋꅉꀨꄂꈨꌠꇬꑌꎍꌐꀐ。ꃥꋩꃥꏦꅉꈚꌠꈯꄔꇬꆏꁱꄜꀊꎴꀊꋨꂷꇬꆹ，ꀊꄶꌜꇬꄉꇁꌠꌟꒉꌠꂿꈨꌠꅿꑋꅉꉬ，ꌜꏓꄊ、ꌜꍔꑠꌋꆀꌜꊈꄜꉺꀯꇬꆹꎍꊿꈨꌠꑋꇬꐊꐺꌐ。ꄚꇬꉜꆫꇁꌠꉹꁌꏓꂱꈨꌠꆹꌐꃅꌐꀋꉆꃅꐥꐛꅹ，ꎺꋦꁧꑎꑤꍔꃚꄇꂿꑍꋯꏭꈝꃀꏡꌠꆹꋀꊇꇰꇊꌊꆽꃹꆽꑐꄉꁯꃴꂷꂯꈴꒉꅉꀋꊌꃅꎍꀐ，ꈨꑭꅩꌬꀕꌠꁨꑭꌸꌠꇂꃴꄉ，ꊾꈨꌠꄩꆹꀋꇊꆏꑌꋊꌗꈨꌠꌡꌠ，ꃅꇴꃴꂿꀕꑵꌠꆹꀋꆏꃅꇁꄩꏯꏮꄉꃰꅷꐺꌐꇱꀋꏦꃅꎌꌐ。

ꌟꒉꌠꂿꈨꌠꆹꂴꊂꈴꄉꐮꊂꊛꄉꇁꌊ，ꀊꄶꃥꋩꃥꏦꅉꂴꆽꈚꌠꇬꉆꄉꇈ，ꉌꈯꑓꈜꃅꊿꂷꆏꅇꂷꊱꉉꌐꀐ。ꑤꍈꀉꋶꃄꑗꅿꃚꋒꆹꂴꇻꃖꅇꉉꅍꏡꌠꇬꍫꈴꄉꁭꁘꍔꁘꎻꇁꇈ，ꇯꍝꃅꈍꃅꄎꌬꀕꇬꎌꌠꉬ。ꀉꋶꃄꑗꑤꍈꆹꉦꃀꆗꄉꀃꃀꌤꌊꄉꇈꇁꀊꄶꇬꉆꄉꇈ，ꂥꆏꂿꅉꎴꇈꉌꐡꑓꇗꌊꊋꑌꏢꑌꃅꃚꋒꀉꂥꃅꅇꂷꋍꊱꉉꎼꀐ，ꎆꏣꌌꇁꀻꎆꂯꇬꆏ、ꀋꎪꃅꂴꆽꐛꐪꀉꁘꀊꇁꈨꌠꌌꄺꀱꄉꇈ，ꊋꇨꃅꋍꉎꀋꐥꌠꌤꃅꐨꊋꃤꌌꄉꃅꇈ，ꋍꉎꀋꐥꌠꃅꑘꃄꅐꎻꇁꄉꇈ，ꎺꋦꁧꑎꑤꁳꄉꃅꋊꀊꏀꈨꑭꐝꇅꀕꌠꐉꄉ，ꀒꁨꋍꁘꃅꐚꐳꏿꄉꀻꎆꆹꅊꇈꄷ。

ꀉꋶꃄꑗꑤꍈꂷꌠꅇꂷꉉꌐꄷꆏ，ꃥꋩꃥꏦꅉꋋꂷꑬꊂꆹꋋꇅꃅ，ꉌꇿꑓꇿꌠꇇꇤꏪꃚꆹꃅꃴꃄꅉꉼꇬꎌꌐꀐ。ꌟꒉꌠꂿꈨꌠꆹꈀꄸꑌꅇꉉꄮꇬꆏ，ꄚꊒꆽꀕꃅꑤꊐꌠꏃꂷꄺꐛꄷꉉꎼꇁꌠꆹꀋꐥꂾꇐꏽꌐꑴꇬ，ꄚꈀꄸꑌꉌꂵꇬꆏꀋꉉꃅꌧꐝꈷꂥꀘꌐꌠꉬ。ꋋꆹꈍꃅꊿꋌꁭꌠꎺꋦꁧꑎꑤꇬꉹꁌꏓꂱꅿꉌꃀꉪꐨꂷꉬ，ꂁꇐꆹꌌꇁꈁꏾꃅꅔꁖꅔꅐꀋꉆꌠꉬ。

ꅲꁱꊤꅿꀀꅉꈚꌠꆹꎺꋦꁧꑎꑤꑬꊂꃅꇬꂓꅑꋍꉎꀋꐥꌠꆀꃅꃥꆦꃥꈿꅉꈚꌠꇬꉬ。ꋌꄹꉈꂵꆤꇬꆹꈫꒉꉻꒉꌊꋍꉎꀋꐥꌠ，ꌵꎧꌵꎸꐙꌠꆹꑠꇁꄚꃥꈿꅉꇬꄉꈮꇁꈜꅉꃅꄉꌌꀉꇨꃅꀞꄻꀐ。ꌷꐋꊈꆏꄹꁆꆹꑌꃀꌧꊈꎧꀉꅪꌠꅝꐺ，ꄹꁆꆏꎧꆈꐞꇅꀕꌠꅝꐺ，ꄹꁆꆏꀻꏮꌿꎧꏂꇉꀕꌠꅜꐺ，ꄹꁆꆏꅝꇐꐓꂿꀕꌠꅝꐺ，ꈀꄸꑌꉌꇿꑓꇿꃅꎧꅝꎸꋠꌊꈁꑓꂶꌠꆹꅪꁴꀕꌐꈭꐨꆏ，ꊂꄽꂫꇬꆏꇁꌊꂱꑱꀀꅉꈚꌠꇬꄉꋍꃢꑬꆏꆹꇈ，ꂵꆤꈍꐯꂷꌌꄉꀀꑌꇴꌐꀐ。ꈊꃀꆏꄡꇗꐪꊛꄉꉈꑴꋍꃢꀉꂿꁨꂿꀋꎺꃅꀉꇨꃅꄉꎧꅝꎸꋠꌦꀐ，ꌷꐋꊈꆹꉬꇮꃅꀋꇊꇬꆏꌦꀋꁖꊿꀋꌦꇈꑗꈈꀕꌠꌉꈿꑠꋍꃢꇬꊜꌠꌡꌐꀐ。

ꃷꐕꃮꌺꀀꌠꆹꊾꌕꑻꀀꌠꃥꀀꅉꑠꈚꉬ，ꋍꌷꐋꀉꁁꑍꂷꌠꆹꎧꑱꃱꀋꐚꌊꀙꐯꀙꃅꎍꐛꅹ，ꀀꈤꄩꄉꀱꒊꀱꇁꄹꀀꂂꅷꇱꀋꏦꃅꎌ。ꋍꂷꆹꎧꑱꌊꋰꀋꄐꃅꁉꀕꃅꋍꇱꐷꇁꀀꅉꇬꅞꄉꐛꌐꐛꅹ，ꀀꅉꋋꁨꃅꎧꅿꎸꅿꌠꉈꄉꈭꐨꆏ，ꁨꅿꍪꅿꌊꊽꉌꁕꑓꁕꀙꐯꀙꃅꎌꌐꀐ。ꃄꅉꇬꈈꄉꌠꎭꊉꂃ、ꎭꃔꈇꑌꅍꈨꌠꄩꑠꇿꇬꑌꇵꅿꂮꅿꌠꃢꈜꈨꌠꆹ，ꈀꏾꃅꇵꍞꇁꀊꄶꇬꅞꄉꌐꌠꉬ。

ꃷꐕꃮꌺꐊꄉꀀꌠꌷꐋꋋꑍꂷꆹꐯꇯꋓꄉꑘꃅꁡꇤꇬꄉꒆꇁꀉꒉꌠꉬꐛꅹ，ꑠꃅꈫꒉꉻꒉꌠꌵꎧꌵꎸꋠꅝ、ꁧꎳꇤꌃꌠꃥꀀꅉꇬꀀ，ꉈꑴꆏꎔꌋꄞꅐꌠꅊꁧꒈꅉꑠꌌꌬꄺꌠꃅꄮꇬꆏ，ꋍꑊꆹꊼꇅꉌꂵꄷꇙꌌꇙꌊꑘꀋꒃꇈꉌꇿꑓꇿꃅꑋꐛꌠꉬ。ꃷꐕꃮꌺꑋꄡꇗꋌꇅꃅꀀꑌꇴꒈꑘꒃꀋꅲꃅꎍꄉ，ꄆꁱꏸꀻꈜꈨꌠꆹꌌꋍꂷꇈꋍꂷꃅꏭꆦꄉꌌꉜꃑꇱꀋꏦꃅꎌ，ꋍꉌꂵꈐꏮꇬꑌꄡꇗꄆꁱꆹꉜꏾꐯꉜꏾꃅꑋꀋꐛꌠꉬ。

ꏭꇁꄮꈉꇇꈯꂷꌠꊼꇅꉜꇬꆏ，ꄮꈉꆹꈊꃀꈬꂷꇅꌠꇬꂯꀋꑟꌦꅊꇈ，ꃷꐕꃮꌺꆹꈀꏾꃅꄉꀊꄶꀂꄂꀂꄖꑠꈬꄻꈚꄉꈭꐨꆏ，ꀥꌌꀏꏯꃥꈿꅉꋍꊐꀕꌠꃥꋩꅱꇬꅉꈚꌠꇬꄉ，ꇿꇬꄉꌧꑀꃼꅉꊌꃅꅲꅷꐺ。ꃷꐕꃮꌺꆹꌧꑀꅝꄉꎧꑱꎧꌗꈨꌠꌌꊼꇅꍜꐚꃱꐚꏡꉪꌠꉬ。ꌋꅪꁧꃤꃅꊿꂶꌠꆹꑗꈈꀕꃅꉉꇬ，ꄚꃥꈿꅉꄇꃀꇁꃼꁁꌠꏯꉜꄉꈴꆹꑳꆏ，ꀊꄶꈛꏒꈌꀊꋨꈚꇬꆹ，ꊿꋍꁯꀊꄶꄉꌧꑀꃷꅷꐺꌠꉬ，ꀋꃅꋌꇅꇬꆹꈍꃅꑌꀃꈈꀋꈢꑴꌦꋭ，ꆎꆹꀊꄶꇬꊼꇅꉜꆹꉐꄷꉉ。ꃷꐕꃮꌺꆹꊒꀕꃅꃥꈿꅉꇬꄉꁖꇁꀐ，ꃅꃴꇬꆹꃅꏸꐍꐷꀕꌊꊽꉌꐡꑓꇗꃅꎌꌐꌠꉬꅊꇈ，ꃥꈿꅉꇬꌩꏪꌐꒉꇂꃴꃥꈴꈝꃀꈨꌠꄩꆏ，ꃄꆳꀕꌙꀕꃅꁎꇁꊿꌶꇬꆏꈍꃅꁦꉘꀕꃅꎍꐛꅹ，ꇓꈓꀄꊭꋋꍈꅿꈊꃀꐛꐨꆹꄚꄉꀊꅰꃅꎔꃨꌊꈍꃅꊽꉌꐡꇈꎍꐽꋬꂻꌙꈈꀕꌠꉬꅊꇈ。

ꃷꐕꃮꌺꆹꉌꂵꈐꏭꄉꀋꆏꃅꐞꍀꑕꑘꂶꌠꇬꉪꈽꅷꐺꇬꎷ，ꄚꋌꇫꅉꀋꐚꌠꆏꋀꊇꆹꀋꃅꀀꑌꇳꇴꑌꀋꐚꀐ，ꑞꃅꑌꀋꇴꑴꌦꋭ。ꐞꍀꑕꑘꂶꌠꇴꌊꉈꃅꅊꁧꇫꏮꄉꊼꇅꈜꎼꈩꄉꌧꈿꇁꇬꆹ，ꈍꃅꉪꁮꈾꌛꊽꉌꐡꌠꉬ。ꉌꂵꈐꏮꄉꋰꀋꄐꃅꉪꅷꄚꋋꈨꄀꇁꄮꇬꆏ，ꃷꐕꃮꌺꂷꌠꆹꑭꁘꐕꐳꃅꐕꎼꆹꇈ，ꀥꌊꌩꋚꇓꂷꃷꅉꇬꄉꌧꑀꑍꏣꃼꌊꇁꈭꐨꆏ，ꇨꆰꇨꊸꃅꀥꀱꉈꑴꃥꈿꅉꇬꇁꌦꀐ。ꋋꆹꇁꌊꑳꆹꄜꌕꊐꈚꌠꇬꑟꇁꀐ，ꈍꄮꇯꆐꋋꅉꐚꌠꆏ，ꐞꍀꑕꑘꆹꀀꑳ3306ꁨꌠꇬꀀꌠ，ꋋꆹꌋꅪꌶꌺꌕꑻꌋꆀꐮꐊꄉꀀꌠꉬ。ꃷꐕꃮꌺꂴꆽꆹꀃꈈꊪꇖꈍꑍꇅꃴꍑꎼꆹꇈ，ꊾꂷꀃꈈꁉꇁꌠꀋꐥ，ꊁꆏꊛꄉꀅꌳꌺꃅꇬꀕꄹꀃꈈꇬꈍꑍꇅꅥꎼꆹꌦꀐ。ꋍꈪꌺꐛꈭꐨꆏ，ꃇꄵꀕꃅꀃꈉꁉꇁꂷꌠꆹꐞꍀꑕꑘꉬꅊꇈ。ꐞꍀꑕꑘꆹꀋꇊꆏꈍꄮꇯꆐꀃꈈꉈꏭꉆꎍꂷꌠꆹꃷꐕꃮꌺꉬꌠꋋꅉꐚꌠꌡ。

ꃷꐕꃮꌺꆹꃅꀹꈨꑴꇈꑖꈈꀕꌊꀅꌳꌺꃅꉉꇬ，ꉡꆹꆎꇴꌊꉈꃅꅊꁧꇫꏮꄉꊼꇅꈜꎼꈩꄉꌧꈿꁧꂾꄸ。ꐞꍀꑕꑘꂷꌠꆹꊼꇅꑊꏦꐆꃅꒊꒉꇈ，ꀱꇁꀀꅉꈐꏭꄉꃢꈜꈬꒃꈚꇈ，ꃷꐕꃮꌺꐉꄉꇁꌊꀀꑳꀏꊐꌠꇬꑟꇁꈭꐨꆏ，ꇁꌊꃥꋩꅉꄇꄜꄇꃀꏡꁮꇬꉆꄉ，ꃷꐕꃮꌺꆹꑖꈈꌺꃅꁧꃤꃅꌠꅪꎔꃀꂷꌠꇬꅲꅷꐺ，ꈊꃀꌋꐓꄮꈉꈍꑍꂷꄮꇬꆏꀃꈈꈢꃅꅲ？ꀊꄶꁧꃤꃅꌠꅪꎔꃀꂷꌠꆹꀋꇊꆏꋀꊇꅿꉪꐨꆹꋌꅉꐚꌐꌠꀋꏮ，ꀅꌳꌺꃅꉉꇬ，ꇨꊸꄺꀋꅐ，ꆐꑊꀱꇁꄮꇬꆏ，ꀅꌳꌺꋍꇬꑍꇬꇴꑳꆏ，ꄚꇬꆹꊿꀋꀀꃅꄉꃱꈿꄳꌬꇹꄣꌤꃅꅷꃅꄜꌠꉬ。

ꋍꑊꁖꅊꁧꅐꇁꈭꐨꆏ，ꍻꁖꒉꐑꈚꌠꇬꈴꅐꇈ，ꇁꌊꁬꏪꇢꊭꇬꄇꈜꏡꌠꇬꊼꇅꏭꈩꅷꐺꌐꈭꐨꆏ，ꃷꐕꃮꌺꂷꌠꉉꇬ，ꀊꄶꀉꏯꁁꌠꏯꆹꎿꃝꂷꇬꐙ，ꉣꑊꆹꀊꄶꇬꊼꇅꈩꆹꂿꄷꉉꀐ。ꐪꊛꄉꋍꑊꆹꉂꌞꐮꉂꌞꌠꉂꊿꑍꂷꌟꃅ，ꇇꄺꐯꆽꃬꄉꇈꀊꄶꀊꏯꁁꌠꏯꉜꄉꆹꀐ。

ꐞꍀꑕꑘꉉꇬ，ꎺꋦꁧꑎꑤꊿꆹꇯꍝꃅꀹꑳꌐꅊꇈ。

ꃷꐕꃮꌺꉉꇬ，ꐯꑴꇆ，ꋋꆹꉪꊇꆏꏹꍓꉬꌠꋀꊇꅉꐚꌠꉬꒉꄷꀋꂸ。

ꐞꍀꑕꑘꉉꇬ，ꏹꍓꄺꇬꇯꍝꃅꃪꐯꃪ。ꉘꇉꌠꋌꊂꆏꉪꊇꆹꏹꍓꃶꐚꌠꐛꄎꌐꅊꇈ。

ꃷꐕꃮꌺꉉꇬ，ꅽꅇꋋꇬꆹꉉꑽꌠꉬꀐ，ꉪꊇꀋꃅꆹꏹꍓꃶꀋꐚꈨꉬꄷꌠꅀ？

ꐞꍀꑕꑘꉉꇬ，ꉢꉜꇬꉪꊇꀋꃅꆹꇯꍝꃅꄉꃶꀋꐚꌠꌡꇬꎷ。

ꃷꐕꃮꌺꉉꇬ，ꃶꐚꃅꐛꅜꌠꆹꇯꍝꀕꌠꉬ，ꄚꀋꉬꀋꉆꌠꆏꌕꁮꆪꌌꌬꉚꌐꈭꐨꆏ，ꉪꊇꆹꋌꇱꑬꑃꇧꎭꀕꀋꐚꀐ。ꐞꍀꑕꑘꉉꇬ，ꉇꆏꊿꊇꌌꈍꃅꂯꑴꌦ。ꀋꃅꆹꌤꃅꅉꇿꇬꑌꐯꌟꌐ，ꁌꈝꐮꃅꌬꌫꄻꌐ。

ꃷꐕꃮꌺꆹꆧꑭꐍꇅꀕꌠꇂꃴꈝꃀꏡꁮꇬꄉ，ꀋꎸꀕꃅꇓꂵꀄꊭꑠꍈꋋꉅꇇꇬꊐꄉꇈ，ꀅꌳꌺꃅꌌꇁꀊꄶꎿꃝꄩꉜꄉꏟꈯꀕꃅꇵꍞꎼꒉꇈ，ꈂꀸꇬꆏꁭꎐꈨꑌꃅꉉꇬ，ꑡꑌꄡꅲꄡꇭꃅꄉ，ꐥꌒꄻꌒꃅꋍꃢꐥꑲꆀꉉꂾꄷ。

ꊁꆏꋍꑊꆹꏭꈩꅷꇁꌊꃥꈿꅉꋍꉻꈩꅉꇬꎿꃝꂷꌠꄩꑟꇁꀐ。ꎿꃝꂷꌠꄩꆹꄇꋒꇂꈪꈭꌠꌋꆀꊿꑋꅉꉆꅉꑠꑌꋈꄻꄉꌐꐛꅹ，ꈊꆳꆹꁬꆰꅾꉘꌒꐨꀕꌠꋍꇱꁏꌊ，ꀋꆏꃅꇁꊽꅳꁖꈐꏭꃹꇁꇬꎷ。ꑠꄮꇬꆏꆧꑭꆹꀊꅰꀊꅰꃅꐍꇅꀕꌊꊽꉌꐡꑓꇗꇁꇈ，ꇇꁮꀃꃀꇬꇇꈜꈍꑍꏢꅑꌠꂯꉜꂿꉆꇁꀐ。

ꃷꐕꃮꌺꆹꀱꒊꀱꇁꀋꆏꃅꋍꊨꏦꇇꑍꁆꌠꌌꍀꈩꅷꐺ，ꉌꂵꈐꏭꆹꀑꂪꀠꇁꀋꐥꃅꊼꇅꇨꆰꇨꊸꅀꉌꂵꊼꇅꑳꉻꃅꐙꇁꄷꉉꉆꌠꉬꀐ。ꐞꍀꑕꑘꂷꌠꆹꌧꑀꑍꂷꐒꄉꋠꌐꈭꐨꆏ，ꌧꑀꊐꌠꎽꏬꏡꌠꄺꇁꃷꐕꃮꌺꁵꀐ。ꃷꐕꃮꌺꉉꇬ，ꉡꀋꋠꀐꆏꁨꊼꇅꋠꌦꇆꄷ。ꐞꍀꑕꑘꂷꌠꆹꊨꏦꇇꎇꌊꄉꌧꑀꉈꑴꋍꂷꀖꎼꇁꇈ，ꅞꇁꄇꋒꏡꁮꇬꉆꄉꇈ，ꀅꌳꀅꌳꃅꌧꑀꁰꇷꐒꄉꌌꋠꅷꐺꌦꀐ。

ꃷꐕꃮꌺꉌꂵꈐꉪꇬꆹ，ꑮꆜꋋꑵꆹꃀꅉꆐꋚꇢꒉꇢꇨꌐꑵꉬ，ꈊꃀꎧꎸꋚꋍꑗꑘꋠꀐꇬꑌ，ꀋꃅꆹꄡꇗꌧꑀꋍꑗꑘꋠꅝꄎꑴꌦ，ꇯꍝꃅꊽꐬꆠꌠꉬꀐ。ꃷꐕꃮꌺꆹꋰꀋꄐꃅꒈꌦꈩꀨꏿꄉꉉꇬ，ꉡꌋꅜꇬꆍꊇꑮꆜꋋꈨꆹꇯꍝꃅꋚꇢꒉꇢꌐꑵꉬꅊꇈ，ꆍꊇꆹꒆꌊꃮꀠꌟꃅꋅꇁꌠꀋꏦꅀꄷ。ꐞꍀꑕꑘꉉꇬ，ꆎꆹꇯꍝꃅꆏꋋꅉꀋꐚꌠꅀ，ꊿꈧꐚꈧꌠꆹ，ꇯꍝꃅꄉꀃꃀꂮꌠꀋꉬ，ꀊꄶꊇꀮꌋꆗꈧꌠꆹ，ꇯꍝꃅꄉꋚꇢꒉꇢꋠꄎꇨꀕꌠꀋꉬꄹ。ꉡꆹꈍꃅꋠꄿꂾꒆꌊꊇꀮꌋꆗꇁꀋꄐꌠꉬ，ꉪꏤꋋꁯꆹꈧꐚꌠꌦꐳꑌꍔꉬ。ꃷꐕꃮꌺꉉꇬ，ꀔ，ꃶꐚꃅꇬꀋꇊꌡꉺꃅꐙ，ꉡꉪꇬꆎꆹꀑꐱꃅꐥꅷꇁꉬꊰꈎꄮꇬꂯ，ꒆꌊꊇꀮꌋꆗꇁꀋꄐꏭꐛꄷ，ꅽꇭꀧꆹꒆꌊꉾꐮꉾꇈꐛꃀꐧꊭꅑꄉꊿꋌꁭꑵꌠꉬꀐ。

ꐞꍀꑕꑘꆹꋌꇅꃅꇫꅲꀐ，ꉐꑴ，ꈧꐚꌠꆹꀋꉾꌠꉬꀕꀋ，ꌞꊿꌌꉉꇬꌺꃰꄿꏀꈧꌠꆹ，ꑮꆜꊇꀮꌋꆗꇈꁓꅔꀉꄖꆃꆂꀉꒉꈨꌠꄉꉌꃹꑓꐛꌐꑵꉬꄷꀋꂸ。ꃷꐕꃮꌺꆹꈍꃅꅇꂷꉉꇮꌠꉬ，ꋋꆹꋀꊇꆏꏢꏬꀋꄐꌠꃬꍻꌠꊂꀠ、ꃬꍻꀋꄐꌠꃮꌉꌠꊂꀠ、ꑌꃀꌧꊈꑣꅝꀋꄐꌠꆹꑌꃀꌧꊈꏢꄷꉉꌠꊿꀊꋨꈨꏭꉉꄜꌠꉬꀐ。ꃶꐚꃅꉉꇬꆏ，ꉈꄅꇩꏤꊿꈨꌠꆹꈧꐚꉹꌠꑮꆜꑵꌠꉌꃹꌠꉬ。ꃷꐕꃮꌺꆹꎺꇁꈄꏍꐋꌧꈿꁉꈿꅇꈧꌠꄀꇁꀐ，ꉪꇁꀊꄶꅇꆞꀋꈚꌊꇨꀠꅩꍓꀕꃅꌌꈧꐚꉹꌠꑮꆜꈨꌠꇬꀭꄒꌠꅇꂷꈨꌠꄀꇁꄮꇬꆏ，ꋰꀋꄐꃅꋍꉌꂵꈐꏭꄉꈐꇿꏿꒊꒉꀙꀐ。

ꄚꃷꐕꃮꌺꆹꄡꇗꐞꍀꑕꑘꂶꌠꂴꆽꄉꇬꆹ，ꈍꃅꑋꉉꈂꀸꇫꆹꁖꆹꀋꀬꌠꉬꀐ，ꈂꀸꇬꀉꄂꀱꒊꀱꇁꇈꀋꆏꃅꈧꐚꉹꌠꑮꆜꄉꉾꃪ，ꐛꃀꐧꊭꅑꇈꊿꋌꁭꊿꋌꇢꃅꉉꅷꐺ。ꉉꅉꉉꅉꃅꇬꆏꐞꍀꑕꑘꂶꌠꉌꂵꆹꇿꌊꋰꀋꄐꃅꎌꇁꀐ。ꃷꐕꃮꌺꅿꑓꋪꆹꀋꆏꃅꍃꂁꉱꏿꄉꀋꎸꀕꃅꏭꇁꐞꍀꑕꑘꂷꌠꇬꉜꎌꇬꎷ，ꆧꑭꐍꇅꀕꌠꇂꃴꐞꍀꑕꑘꂶꌠꆹ，ꈍꃅꉜꑌꉜꅉꎔꅉꑟꇁꇈ，ꊽꉌꂵꊿꋋꀋꌅꃅꇁꌊꄐꀕꃅꐂꇁꇬꎷꀐ。

ꐞꍀꑕꑘꆹꇯꍝꃅꎔꌋꄞꅐꇈ，ꀂꄂꌋꆀꆞꋍꋬꈭꃅꐯꅑꎌꌠꑠꈬꈚꐺꌠꉬ。ꄷꀋꁧꇊꆏꑠꄮꇬꆏꈊꃀꆹꊼꇅꈜꈼꇁꌠꏦꐛꅹ，ꉈꆏꌠꀂꄂꀊꎴꇈꀂꄖꑠꈬꑌꄺꇬꇰꄉꈚꐺꅊꇈ，ꄚꃷꐕꃮꌺꂶꌠꆹꄡꇗꐞꍀꑕꑘꅿꇭꀧꈯꄿꇖꌋꂷꌠꇬ，ꐛꄟꐛꏦꍈꇿꇬꐛꅑꌠꆹꉬꇮꃅꈍꄮꇯꆐꋋꌌꉪꎻꇁꄏꌐꌠꉬꀐꅊꇈ。

ꃷꐕꃮꌺꂶꌠꆹꑮꆜꈨꌠꅿꇭꀧꈯꄿꃆꂮꇬꌧꈴꅉꐚꐝꉅꌠꌧꇐꂿꇐꇁꀦꆹ，ꋋꆏꈄꏍꇬꄉꇁꌠꀉꄂꀋꉬꃅ，ꉈꑴꆏꄯꒉꌋꆀꄆꁱꄆꒌꑠꈐꏭꄉꄡꇗꌧꇐꂿꇐꏃꁍꆿꇤꒉꃅꊌꅜꌠꉬ，ꄷꀋꁧꇊꆏꋋꆹꉈꑴꆏꑓꋪꑓꊒꀕꃅꄉ，ꌋꅪꌶꌺꂷꅿꇭꀧꇖꌋꋋꂷꃅꇨꀠꅩꍓꀕꃅꐺꌠꑠꑌꊌꂾꋺꌠꉬ。

ꋋꆹꀋꉊꂴꆽꋌꒉꌶꅉꇬꌷꇁꀉꉘꀋꐛꑴꌦꄮꇬ，ꃄꋆꄮꐰꇬꑠꋍꑍꁯꋒꐮꉐꄮꇬꄉꅐꌠꁮꅉꌤꃆꐘꉬꀐ。ꃷꐕꃮꌺꂷꌠꆹꋇꁥꌠꇬꌺꃰꌷꐋꑠꂷꌋꆀꐮꐊꄉꆹꌊ，ꌶꅉꈐꏮꇭꀧꒈꋌꅉꈚꌠꇬꉜꄉꒉꋌꆹꀐ。ꁯꋒꐮꉐꒈꋌꅉꇬꆹ，ꊿꀉꑌꐯꀉꑌꃅꒈꋌꆹꇅꌠꇬꈴꅏꌐꄮꈉꀉꉘꑠꍈꀋꐛꑴꌦꐛꅹ，ꇭꀧꒈꋌꅉꈐꏭꆹꊋꒉꌠꆏꊿꇫꀋꐥꌐꀐꌠꉬ，ꄚꇭꀧꒈꋌꅉꈐꏭꊸꌗꃅꉒꑵꌠꆹ，ꋋꇅꃅꑍꈤꁧꀋꌐꑴꌦꐛꅹꄡꇗꇇꎇꇇꀋꂿꃅꎌꌐꑴꌦꌠꉬꅊꇈ。

ꀊꅰꃅꄚꌶꅉꈐꏮꐛꌠꇭꀧꒈꋌꅉꋋꂷꆹ，ꌌꇁꄺꀱꄉꄮꈉꀉꉘꏡꀋꐛꑴꌦꐛꅹ，ꋀꊇꆹꌺꃰꌋꅪꇿꇬꒈꋌꃅꁨꄀꌊꁸꐝꉅꃅꀋꄉꑴꌦꅊꇈ，ꈀꄸꑌꈁꏾꃅꒈꋌꅉꋍꁨꂷꁉꄉꈭꐨꆏ，ꄚꈐꏭꄉꃢꇔꆞꇔꄉꇨꀠꏾꅪꃅꄉꇈ，ꄚꅊꁧꂪꌦꀉꃴꁬꌠꈻꇁꄚꒈꋌꅉꂴꆽꇊꉱꄉꄷꆏ，ꈀꄸꑌꈁꌒꀕꃅꇁꌊꄚꄉꒈꋌꒉꑻꆹꌐꌠꉬꀐ。ꀊꋨꄮꇬꄚꒈꋌꅉꑠꁨꈐꏭꇬꆹꌋꅪꌶꌺꑠꂷꆏ，ꈬꑍꈬꄅꀕꊯꊪꑍꄀꄃꌠꆏ，ꋋꆹꀅꌳꀅꌳꃅꋍꇭꀧꇖꌋꂷꌠꃅꌌꄉꉜꅉꌩꑻꅉꐺꅊꇈ，ꌋꅪꌶꌺꋋꂷꆹꃄꄵꀕꃅꇭꀧꉦꃀꁀꌠꏯꆹꏭꇁꌊ，ꂪꌦꀉꃴꁬꌠꌌꇊꉱꄉꌠꀃꈈꁁꌠꏯꇬꄐꊒꎌꇈ，ꋋꆏꀂꏾꆏꈎꌊꄉ，ꋍꈂꀸꇬꆹꀋꆏꃅꁭꎐꈨꑌꃅꄉ，ꀑꆗꌺꉂꌠꃆꂮꑵꉙꑠꊱꑋꌌꇬꊎꄉꑵꅷꐺꌠꑋꌡ。

ꃷꐕꃮꌺꆹꂴꆽꇫꂿꐊꆹꌠꉬꐛꅹꃅ，ꀊꄶꀊꋨꇅꇬꆹ，ꄚꄉꌋꅪꌶꌺꋋꂷꅿꇭꀧꇖꌋꆹꋍꍈꂯꀋꋒꃅꋋꇱꉜꇁꋍꑓꋪꈐꏭꊐꌐꀐ。ꌋꅪꌶꌺꀊꋨꂷꆹꈍꃅꑆꐎꎸꁞꇈꊇꀮꌋꆗꅍꎍ，ꋍꉦꃀꇬꁦꀮꃺꃀꑌꂵꑍꍈꌟꆹ，ꇬꊎꃨꈍꀕꃅꎌꌠꁦꀑꂚꃨꃨꎔꑍꀮꌡꐮꌡꇈ，ꈍꃅꀭꉂꀕꇈꏷꀧꀕꌊꄉ，ꉂꑟꅑꐛꅹꐛꑿꈍꑋꆹꈍꃅꑋꋋꂿꉂꑵꌠꉬꀐ。ꀊꄶꑬꆹꑍꁆꌠꈯꄔꇬꐛꋦꌠꌩꐺꀊꋨꁕꆹ，ꈍꃅꆈꊉꀕꇈꁀꆓꀕꑠꋍꁕꉬ，ꌩꏪꆈꊉꀕꁕꌠꄩꆹꃅꄜꄮꇬꐍꇅꀕꌠꍑꒉꌡꌠꀇꐒꈨꌠꆹ，ꀋꆏꃅꇬꊎꀁꋌꏭꉜꄉꊰꅷꐺꇱꀋꏦꃅꎍꌐꑴꌦ。ꃷꐕꃮꌺꆹꉜꅉꉜꅉꃅꇬꆏ，ꉌꂵꐂꌊꀙꄉꈁꑓꊸꌊꅩꁴꀕꃅꐛꇁꇈ，ꀋꎺꀋꈨꃅꋋꇱꏮꀥꇁꒈꋌꅉꀉꁁꑠꁨꇬꃹꁧꌠꉬꀐ。

ꋍꊂꐊꐺꌠꌺꃰꌶꐋꂷꌠꆹꃷꐕꃮꌺꉌꂵꐂꌊꀙꄉ，ꈁꑓꊸꌊꅩꁴꀕꃅꎌꌠꆹꋋꇬꀋꌋꑴꌦꌠꉬ，ꃷꐕꃮꌺꆹꀥꇁꌊꒈꋌꅉꀉꁁꋋꁨꇬꃹꇁꄷꆏ，ꋋꇅꃅꀇꐒꁉꈢꅍꈨꌠꌌꆽꏀꄉꇈ，ꊒꆽꀕꃅꇁꀊꄶꇬꉆꄉꇇꏸꌌꄉꀊꄶꀇꐒꒉꊸꁖꇁꈌꈚꌠꇬꆽꋏꉨꌎꅷꐺꀐ，ꉇꉈꃅꀇꐒꊸꐨꈻꐨꌌꉪꐺꌠꉬ，ꄚꋍꉌꂵꂷꌠꆹꄡꇗꄏꀕꃅ，ꆏꇁꀋꉆꃅꋪꐂꅷꐺꇱꀋꏦꃅꎌꑴꌦ。ꀊꋨꄮꇬꃷꐕꃮꌺꆹꊰꉆꀋꈓꑴꌦꐛꅹ，ꇯꍝꃅꒆꆹꌊꄿꏀꐛꀋꋒꑴꌦꄉ，ꑊꂿꑵꌠꆹꊼꇅꐍꇖꅍꅑꎍꑴꌦꄮꇬꁮꅉꂷꉬꀐ。

ꋋꈭꐨꆏ，ꃷꐕꃮꌺꆹꂵꆤꃀꆏꅉꀕꃅꌶꅉꈐꏭꈝꃀꈪꇬꄉ，ꎔꌋꄞꅐꌠꌋꅪꌶꌺꈨꌠꊌꂿꄮꇬꆏ，ꋋꆹꅉꀕꃅꌋꅪꌶꌺꈨꌠꅿꇭꀧꇖꌋꈨꌠꆹꀋꎸꀕꃅ，ꄺꇁꋍꉌꂵꄷꈐꇬꊐꄉꌌꎥꋯꅷꇁꇬꎷꌠꋻꅑꐨꑠꈨꐥꅷꇁꌠꉬꀐ。

ꀋꃅꋌꇅꇬꆹ，ꃷꐕꃮꌺꌋꆀꐞꍀꑕꑘꑋꆹꇁꌊꄚꊿꄺꄉꌠꎿꃝꈯꄔꇬꐛꌠꄇꋒꇷꌠꄩꉆꄉ，ꋋꆹꐞꍀꑕꑘꌋꆀꆽꁠꋓꃅꉆꄉꏭꇁꈊꃀꌋꁁꐛꐨꉜꆫꄮꇬꆏ，ꋍꅿꇇꇁꑳꁆꌠꆹꀋꇊꆏꎇꎼꇁꐞꍀꑕꑘꅿꀂꄂꈐꏭꃹꇁꌠꌡꀐ。ꐞꍀꑕꑘꅿꂚꃨꌡꌠꉦꃀꇬꄉꉨꌎꅷꁧꀐ，ꋋꆹꀋꆏꃅꀏꏯꉜꄉꉨꌎꅷꒉꇬꎷꇈ，ꋋꉨꌎꅷꄉꌌꉪꎻꇁꇬ，ꐞꍀꑕꑘꅿꑆꎸꆹꁀꆓꀕꇈꉔꇅꏻꃅꎌꌠꉬ。ꇯꍝꃅꑆꌤꎸꌤꑵꌠꉬꇈ，ꁀꆓꀕꌊꉨꇬꄀꄷꆏꀇꐒꁖꇁꌠꌡꇬꎌ。ꋍꅿꇭꀧꆹꀭꉂꋭꅉꆏꀭꉂꃅꎌ，ꁡꉖꋭꅉꆏꁡꉖꃅꎌꐛꅹꐽꊱꃅꎍꌐꌠꉬꅊꇈ。ꀉꑴ，ꃷꐕꃮꌺꆹꄚꄉꋰꋯꌋꆀꋰꀋꄐꃅꌗꅐꌗꏂꅷꐺꀐ。ꋍꉌꂵꈐꏭꆹꈍꃅꌼꂯꇈꇨꆰꇨꊸꌊꊼꇅꏸꏦꐆꃅꐺꌠꉬ，ꄚꋍꇭꀧꇖꌋꂷꌠꆹꀑꀋꐥꂪꀋꐥꇈꀋꌦꀋꌋꃅꐛꐈꌊꀋꆏꃅꑑꃹꏾꁵꀕꃅꎍꇁꀐꅊꇈ。

ꃷꐕꃮꌺꅿꉌꂵꇬꉪꃅꉩꇐꈤꌠꆹꈍꃅꑋꋌꇅꃅꆿꃀꂷꐂꇁꑿꈫꇬꃹꒃꇁꌠꌟꃅ，ꐞꍀꑕꑘꂷꌠꄌꌌꇁꏟꈯꀕꃅꄺꂣꈐꇬꊐꌊꄉꇈ，ꌌꇁꋍꃢꀋꎺꀋꈨꃵꂿꏿꃅꁬꏶꏾꅷꐺꌠꉬ，ꄚꑠꃅꑴꇬꋍꏸꑮꑍꁆꌠꆹ，ꈍꄮꇯꆐꑑꃹꏾꁵꀕꌊꊋꀋꑌꏢꀋꑌꇈ，ꋍꉌꂵꂷꌠꆹꈍꃅꑋꑠꃅꀬꅑꈄꅑꌠꉌꊋꆹꋍꍈꂯꎹꅉꀋꊌꌠꉬꀐ。

ꐞꍀꑕꑘꆹꃷꐕꃮꌺꅿꐛꐈꐨꈨꌠꆹ，ꇯꍝꃅꑱꅳꁖꒊꑠꍈꂯꋌꇬꀋꌋꇬꀋꐚꌠꉬꅊꇈ。ꐞꍀꑕꑘꉌꂵꇬꆹꋍꍈꂯꃷꐕꃮꌺꂷꌠꇬꀋꀀꇬꀋꑌꄷꌠꅀ，ꈍꃅꑋꋍꉌꂵꇬꆹꀊꅰꃅꃷꐕꃮꌺꇬꆹꉂꐮꉂꃅꀋꐛꌠꉬꋭ，ꑮꆜꆹꈍꃅꑋꋍꍈꂯꉋꇷꃅꀋꐛꌠꉬ。ꃷꐕꃮꌺꆹꈍꃅꉌꂵꇬꄉꌂꃆꃮꑭꐛꃅꀀꎌꀙꌠꉬꀐ，ꉌꃀꑬꊂꒈꂃꒊꆱꑵꌠꆹ。ꀋꆏꃅꄓꇁꌦꌤꑍꁧꌦꃅꎌꇬꎷꅷꐺꑴꌦ。

ꀋꃅꋋꇅꇬꆹ，ꐞꍀꑕꑘꆹꉌꇿꑓꇿꃅꇁꌊꄇꋒꄩꉆꎍꇈ，ꇇꎇꇁꌥꀊꄶꋒꄙꌬꈨꌠꇬꀵꄉꇈ，ꀋꆏꃅꃄꈌꃅꏦꉜꆫꅷꐺꇱꀋꏦꃅꎌꌠꉬ。ꋋꊌꂿꇁꌠꆹꀊꏀꇈꇣꋲꑠꋍꈚꉬ，ꀊꄶꇬꆹꇿꇬꉬꀋ。ꃷꐕꃮꌺꂷꌠꆹꋋꇅꃅꑬꄖꄉꊼꇅꏭꇁꇬꉚꈭꐨꆏ，ꈜꎴꅉꇬꁦꀮꈨꌠꈯꄔꇬꆏꄆꄒꂷꇭꃅꏸꌟꃅꏷꌬꀕꌠꇁꀊꄶꇬꄉꌬꅷꐺꌐꌠꉬꅊꇈ。

ꀊꄶꎿꃝꈯꄔꇬꎿꆚꆚꀕꃅꎍꇈꀊꐯꌠꑠꁕꄩꆏ，ꇉꑳꈍꑋꇷꆹꆏꄝꇁꀊꄶꄩꅞꎍꐛꅹ，ꄆꄒꂷꇭꃅꏸꌟꃅꏷꌬꀕꌠꇁꀊꄶꄩꌸꎍꇬꆏ，ꐈꌌꏂꇅꁤꇅꁏꃅꐛꌐꐛꅹ，ꑓꏭꇬꉚꇬꐛꐈꌊꈍꃅꊽꉌꐡꑓꇗꃅꎍꌐꌠꉬ，ꉈꑴꆏꈨꌦꀋꈨꌦꃅꊽꅲꇢꈻꌠꑵꉙꑠꑌꀋꆏꃅꇁꊽꅳꀧꈐꏭꃹꇁꇬꎷꑴꌦ。

ꃷꐕꃮꌺꆹꐪꊛꄉꉉꇬ，ꋋꆹꀊꄶꎺꋦꁧꑎꑤꍰꇓꈓꏡꁮꇬꉆꊯꆽꏦꁧꇂꃴꌒꃪꇁꄿꒊꃀꁨꁧꋮꐛꌠ，ꀉꑳꃈꇢꅿꈁꃏꅜꅉ、ꀛꐂꑵꉙꅉꃅꀊꋨꈨꇬꑠꆹꆷꃅꄟꐛꌠꄿꏀꑮꆜꈨꌠꅿꈩꀜꅉꈨꌠꉬ。

ꐞꍀꑕꑘꆹꉌꐡꑓꇗꌊꉉꇬ，ꎺꋦꁧꑎꑤꆹꇯꍝꃅꈨꌒꀜꌒꑠꈚꉬ，ꋍꍈꂯꂿꑘꁡꇤꆹꀋꌡ。ꉚ，ꉡꉉꇬꆹ，ꋍꍈꂯꇩꏤꊐꌠꌢꎭꑤꂷꆹꀋꌡꀐꅊꇈ。ꊁꆏꋀꊇꆹꆧꑭꐍꇅꀕꌠꇂꃴꄉꄇꋒꇷꌠꄩꄉꉈꃅꈜꎼꄉꑍꏮꏭꈩꏿꌦꀐ。ꃷꐕꃮꌺꆹꀋꆏꃅꁯꇐꅑꌠꆧꑭꐍꇅꀕꌠꇂꃴꄉꃅꇏꄇꄜꀋꋊꃅꐞꍀꑕꑘꇬꊵꑵꍈꃅꏾꇁꇬꎷꌠꉬ，ꄚꋋꆹꇯꍝꃅꀊꄶꏸꏦꃬꑐꋦꌊꉌꂵꇬꆹꉪꀬꇈꃅꐨꆹꇫꃅꀋꀬꇬꎷꌠꉬꀐ。ꀊꋨꄹꉖꈊꃀꀄꂼꂻꄮꇬꆏ，ꋍꅿꀄꂼꈐꏭꆹꁱꅐꁮꐚꒉꀑꒉꂪꇿꇬꑋꐛꂨꀕꃅꇁꄚꇬꀀꈴꇁꌐꌠꆏ，ꊿꋌꁭꌠꐞꍀꑕꑘꅿꈁꑓꂷꌠꀉꄂꌌꀄꂼꂻꐛꇁꅷꊂꄹꉈꌠꃅꄜꀀꌋꀀꐚꀀꄓꇁꄮꇬꑟꌠꉬꅊꇈ。

ꊂꄹꉈꂵꆤꄮꇬꆏ，ꑤꃥꈿꅉꑍꊐꌬꍩꀉꑌꃅꐥꌠꃀꈿꑳꈚꌠꇬꄉꄛꇰꃀꂷꈿꀐ，ꑤꊐꌠꄚꃆꂮꐥꌠꆹꎍꊿꈨꌠꆹꋀꊇꅿꌤꃅꃆꂮꌌꇁꋓꃅꄚꄉꆎꄿꉠꄩꐂꃅꌌꄛꇰꌐꀐ。ꋋꈨꆹꉬꇮꃅꑤꍔꃚꆹꆏꈭꋍꂷꂴꆽꂾꇰꆐ，ꉇꃅꄉꅇꇰꄯꒉꃑꌌꅇꀠꄉꇈꊭꄎꄐꁆꄉꌐꌠꉬ，ꌌꌐꄉꄛꇰꇁꅲꁱꊤꏭꄛꇰꌠꑠꋍꃢꉬ，ꋋꆹꌌꇁꏹꍓꊇꁳꀊꅰꐉꒆꃅꑤꑭꊂꎆꏣꀻꎆꐛꐈꃆꂮꌧꈴꌌꉪꌐꌠꇬꇇꀨꂯꇬꈲꋌꀉꒉꃅꐥꌠꑠꋍꃢꉬ。ꌤꃅꅉꂷꈁꐛꌠꉬꇮꃅꂴꆽꏜꃅꇯꆐꉇꃅꊿꁥꊥꇬꌊꄉꇈ，ꄚꃆꂮꐥꌠꁱꇐꌬꇐꀋꉬꀋꉆꈨꌠꁱꌊꉾꃪꃅꄉꌐꐛꅹ，ꌤꃅꅉꇬꆹꎍꊿꈨꌠꆹꄛꇰꃀꈿꅉꇬꄉ，ꌌꇁꄛꇰꅇꉉꄮꇬꆏ，ꈀꄸꑌꈍꃅꉌꊢꑓꊢꌐꇈꏦꒉꋦꌐꌠꉬ。

ꐞꍀꑕꑘꆹꀋꆏꃅꋍꁁꏯꆏꅳꀧꐓꐔꇵꄉꅱ，ꋍꁁꏯꆏꀋꆏꇇꌌꎺꁱꌠꃅꇱꀋꏦꃅꎌ。ꊁꆏꋋꉉꇬ，ꋋꆹꀋꃅꋋꃢꅲꁱꋋꈨꁱꌊꈨꏀꐛꌠꀉꄂꀋꉬꃅ，ꄷꀋꁧꌌꇁꁱꇐꌬꇐꉾꃪꌠꃅꄉꇈ，ꁱꌊꉌꐡꁱꇐꉾꃪꌠꐛꄉ，ꌌꃑꉎꏯꄚꃆꂮꐥꌠꉜꇐꁱꀕꄯꒉꑠꇬꄀꎻꇁꌠꉬꄷꉉꅷꐺ。ꃬꎔꀈꆺꆹꋍꇬꍖꀴꄉꉉꇬ，ꑮꆜꋋꑵꆹꌤꃅꆿꃅꇬꆏꇯꍝꃅꉌꊢꑓꊢꇈꃅꋒꑽꋒꄉꊽꉌꋬꈬꐛꌠꉬꄷ。

ꀋꃅꋋꃢꅲꁱꇬꆹ，ꈀꄸꑌꉬꇮꃅꌤꌧꃪꃭꃅꄉꂿꃆꁸꐝꉅꃅꄉꌐꀐ，ꌷꐋꈨꌠꅿꇭꀧꊇꁧꐛꐨꇬꈴꄉꇈ，ꋀꊇꆹꁸꌊꃄꍝꐯꀋꌡ、ꃄꁕꐯꀋꌡꌠꑠꈍꑍꁥꃅꄉꌠꉬ，ꐞꍀꑕꑘꌋꆀꌋꅪꌶꌺꌕꑻꆹꑘꊎꑤꍰꇓꈓꇬꐥꄉꅲꁱꇈ。ꀉꁁꈨꌠꆹꉬꇮꃅ，ꁸꐝꌊꀏꏯꅉꂫꊐꌠꑣꍔꇬꉜꄉꁧꌐꀐ。ꅲꁱꁻꌐꎸꀠꆹꇓꈓꇓꉈꋈꄻꉹꌠ、ꈩꆫꑘꉹꌠ、ꂿꑘꃼꇇꑘꉹꌠ、ꎆꏣꆿꂷꉹꌠ、ꁱꀕꂘꇐꉹꌠ、ꆅꉁꆅꄻꉹꌠꌋꆀꀋꉬꀋꉆꌠꇮꑘꎆꏂꑘꉹꌠꃅꑠꆹꀋꐊꅍꀋꐥꌐꌠꉬꀐ。

ꃷꐕꃮꌺꆹꁸꌊꑤꍰꇓꈓꌋꆀꉺꆏꉬꊰꂷꇢꅉꇬꐛꌠꈬꉘꃅꄷꇌꄙꍔꈚꌠꇬꅲꁱꆹꌠꉬ。ꇌꄙꍔꆹꎺꋦꁧꑎꑤꑬꊂꉘꉚꑘꀋꉬꀋꉆꌠꅉꃀꈚꌠꉬ，ꄚꉘꉚꑘꉹꌠꅲꁱꄛꉻꌠꃆꂮꆽꎍꌠꂿꃆꆹꇁꃷꐕꃮꌺꅿꀂꏽꇬꅑꎍꌐꌠꉬꀐ。

ꇖ

ꃷꐕꃮꌺꆹꇌꄙꍔꇬꄉꅲꁱꁧꂯꄹꉈꌠꃅꄜꄮꇬꆏ，ꈍꄮꇬꇯꆐꋍꅿꅓꁧꅓꎹꈨꌠꆹ，ꎴꏣꉔꇅꏻꃅꄉꇈꇁꌊꃥꈿꅉꑳꀏꊐꌠꇬꑟꇁꀐ，ꋋꆹꋍꅿꅓꁧꅓꎹꊐꅍꐣꁙꂷꌠꄺꇁꇤꀊꄶꁧꃤꃅꏓꈉꈚꌠꇬꄉꇈ，ꌗꃀꌗꌺꐮꑘꀋꒃꃅꐚꀥꏿꇁꑳꄹꊐꌕꊐꀕꌠꇬꉜꄉ，ꐞꍀꑕꑘꂷꌠꎹꆹꀐ。ꋋꆹꐞꍀꑕꑘꎹꆹꄮꇬꆏꉇꉈꃅꌤꃆꑠꋍꐘꅲꅷꐺ，ꀋꉊꒉꌶꅉꇬꄉꄺꇁꐞꍀꑕꑘꉚꄉꉜꋺꌠ，ꉂꏣꃆꂮꁱꌠꌧꈿꁱꇐꀊꎴꌠ《ꇊꃤꅿꌩꏪ》ꋐꌠꆹ，ꆎꉜꋻꋺꀐ，ꆎꉜꌐꌒꀐꃅꐞꍀꑕꑘꇬꅲꅷꐺ？ꐞꍀꑕꑘꂷꌠꉉꇬꆹꈍꑋꏾꀉꄂꁏꄉꉜꋺꑴꌦꃅꇬꅇꀱꅷꐺ。ꃷꐕꃮꌺꂷꌠꆹꑡꒉꄷꉬꃅꇫꅲꅷꐺꇱꀋꏦꃅꎌ？

ꐞꍀꑕꑘꂷꌠꆹꉉꀬꉉꀋꀬꃅꄉꉉꇬ，ꉡꈨꇁꇬꌧꈿꁱꇐꀊꎴꀊꋨꋐꆹ，ꌺꃰꌋꅪꈯꄔꇬꎲꃆꎲꂮꃆꂮꌌꁰꄻꄉꋐꉬꄷꄉ，ꑠꅹꉡꆹꀊꅰꃅꇬꊼꇅꉜꏾꐮꉜꏾꃅꀋꐛꌠꉬꄷ。ꃷꐕꃮꌺꂷꌠꆹꋋꇅꃅꈁꑓꀉꅪꇁꇈ，ꉉꀬꉉꀋꀬꃅꄉꉉꇬ，ꑠꈨꇿꉬꂯꀋ。ꊁꆏꃷꐕꃮꌺꂷꌠꆹꐪꊛꄉꄚꄯꒉꋋꋐꃆꂮꆹꊌꀋꉉꀐ。ꃷꐕꃮꌺꉉꇬꉡꆹꁸꌊꇌꄙꍔꇬꁧꀐꄷ。

ꄚꄉꐞꍀꑕꑘꂷꌠꆹꊼꇅꃷꐕꃮꌺꇬꐞꁧꀋꄚꏭꃅꐛꇁꇈ，ꋋꇅꃅꋍꇬꊼꇅꉌꌒꊐꌠꌗꃅꉉꇬ，ꉪꊇꆹꑘꊎꇁꑤꍰꇓꈓꇬꐥꇈ，ꄡꇗꂴꆽꃥꈿꅉꈚꌠꇬꀀꑴꌦ。ꑤꍰꇓꈓꇬꐥꄉꅲꁱꇫꆹꀊꅰꃅꐚꄎꄷꆹꀋꅐꐛꅹ，ꄮꈉꊜꋽꐨꋋꍈꒃꉈꌊꇇꈐꇬꊐꄉꇈ，ꌌꇁꏟꈯꀕꃅꄯꒉꊼꇅꉜꄯꒉꊼꇅꀘꁱꇐꊼꇅꁱꉆꌠꉬꀐꄷ。

ꃬꎔꀈꆺꂷꌠꆹꈍꄮꇬꇯꆐꉉꋺ，ꀏꏯꅉꂫꊐꌠꇬꄉꅲꁱꁧꇬꆹ，ꀑꐱꃅꊨꏦꆹꎆꃀꋍꍈꂯꃹꅐꄺꀋꅐꌠꉬ，ꋠꁌꅝꁌꈩꁌꀀꁌꑠꆹꉬꇮꃅ，ꀊꄶꅲꁱꆹꅉꈚꌠꇬꌤꃅꅉꈨꌠꇱꀵꇬꎭꌐꌠꉬ。ꄚꑠꃅꅺꀋꅐꃷꐕꃮꌺꂷꌠꆹ，ꄡꇗꎆꃀꉬꉐꂷꆹꀵꐺꌠꉬ，ꋋꆹꋍꉻꃥꑌꐕꍯꑵꌠꑋꄉꇁꌊꇌꄙꍔꇬꑟꆹꀐ。

ꇌꄙꍔꋋꂷꆹꂓꑌꇌꄙꂓꀋꁧ，ꇯꍝꃅꇬꆏꀋꉊꂴꆽꇯꆐꑋꑿꄅꆈꐛꃅꐥꅷꇁꇈ，ꇌꄙꑿꃪꃅꌌꄉꉘꉚꅷꇁꇬꎸꌠꍔꑠꂷꉬ。ꎺꋦꁧꑎꑤꑬꊂꃅꄉꇬꆹꎇꃀꍅꑓꀉꇨꐯꀉꇨꃅꉘꉚꌠꀨꇬꇊꀨꇬꎍꌠꍔꂷꉬꅊꇈ。ꇌꄙꍔꇬꆹꁆꌊꆽꎍꄉꃷꐕꃮꌺꇬꋩꏦꌠꌤꃅꅉꆹ，ꍔꋋꂷꇬꅿꁱꀕꍉꈚꌠꇬꉬꅊꇈ。ꃷꐕꃮꌺꆹꇁꌊꄚꇬꑟꇁꈭꐨꆏ，ꍉꍈꀉꐩꃅꆜꌋꆀꐮꇰꑳꋍꁨꇬꄉꀀꋠꏿꌠꉬꅊꇈ。

ꀉꐩꃅꆜꆹꄚꇌꄙꍔꇬꊿꒆꌺꂷꉬ，ꋍꐥꍂꆹꁱꀙꌌꄉ，ꀋꆏꃅꈨꏀꄜꉺꁱꇐꁱꅷꇁꇬꎷꑠꂷꉬ。ꄚꄡꇗꋍꃢꋍꃢꇬꆏꉌꐡꁱꇐ、ꌧꈿꁱꇐꃅꑠꑌꁱꑴꌦꌠꉬ，ꋍꂓꆹꅉꀕꃅꇁꀊꄶꉎꊐꌠꑍꄜꄯꒉꌋꆀꉜꇐꁱꀕꑠꇬꅑꇁꇬꎷꐛꅹ，ꀉꐩꃅꆜꆹꇌꄙꍔꑬꊂꃅꄉꇬꆹꊿꂒꊿꈨꇎꒊꄜꉛꈩꇎꑠꋍꂷꉬꀐ。

ꃷꐕꃮꌺꆹꇁꌊꇌꄙꍔꑟꇁꊁꄹꉇꌠꂵꆤꄮꇬꆏ，ꀉꐩꃅꆜꆹꂴꅑꄉꃷꐕꃮꌺꂷꌠꏃꌊꄁꀏꑘꃅꁡꇤꄉ，ꇌꄙꍔꅿꒉꃴꅐꑘꉘꉚꌠꌋꆀꎇꃀꍅꑓꉘꉚꈨꌠꃆꂮꉜꆫꅲꁱꁧꀐ。ꀉꐩꃅꆜꆹꋍꅿꏦꇍꀾꃷꁨꁱꒌꍑꅍꇷꌠꒃꇁꆽꁠꏦꄉꀵꌊꁧꇈ，ꁖꀏꏯꅉꂫꊐꌠꁧꂯꄮꇬꆏ，ꋀꊇꇁꌊꍔꃚꋙꃅꑳꇣꄸꂷꌠꂴꆽꄉꇈ，ꌩꏦꊼꇅꀁꃚꑠꑍꏢꎹꄉꈭꐨꆏ，ꅅꃅꌌꄉꌩꏦꑍꏢꌠꇬꌩꑭꌩꇇꈨꌠꆹꉬꇮꃅꏙꇬꎭꌐꄉꇈ，ꌌꊼꇅꉔꇅꏻꇙꃅꄉꌬꌒꈭꐨꆏ，ꊿꂷꋍꏢꃅꁸꄉꌌꇁꇈ，ꌌꇁꄯꁯꌗꃅ，ꄘꅉꄙꅉꃅꈛꍫꁧꀐ。ꀉꐩꃅꆜꉉꇬ，ꈬꉘꈝꃀꑠꇬꆹꁦꀮꇉꀮꑠꀉꑌꇨꇈꈜꈪꈜꍣꇨꌐꒉꄷꃅ，ꀊꅰꈴꌒꐮꈴꌒꃅꀋꐛ，ꈬꉘꁡꇤꑠꇬꁦꇬꆏꄡꇗꁧꐂꇉꈴꒉꈫꃪꅂꌐꑴꌦꐛꅹ，ꌩꏦꋋꏢꌌꄉꄯꁯꄺꄉꄙꅉꃅꁧꇬꆏꀊꅰꃅꊼꇅꐙꄏꌎꆜꃅꀋꐛꌠꉬ。

ꈬꉘꃅꄷꃅꃴꇬꆹꄅꆈꀕꏸꀕꌠꋍꄀꇈꋍꄀꃅꀀꐛꈴꌐꐛꅹ，ꋍꇅꋋꇅꇬꆏꈨꑭꅩꌬꀕꃅꎌ，ꋍꇅꋋꇅꇬꆏꉐꍑꌺꁍꀕꁌꃅꐛꇁꑞꃅ，ꂿꃅꆹꑤꍰꇓꈓꇬꌟꃅꊷꇨꐯꊷꇨꃅꀋꐛꀐ。ꈬꉘꃅꄷꆹꃄꀑꃅꌗꈍꃅꁦꉘꀕꌐꌠꉬ，ꇉꅶꒉꐑꆹꎱꀕꄹꂾꃚꌒ，ꉌꊭꉌꇓꆹꉙꁊꇖꈭꀕꌊꊽꉌꐡꑓꇗ，ꁬꃨꆹꃨꈍꀕꌊꅾꉘꌒꐨꀕꌐꌠꉬꅊꇈ。

ꈝꃀꈪꄉꀊꑙꈍꑋꑌꋀꊇꊌꂿꇈ，ꃷꐕꃮꌺꆹꇯꍝꃅꈯꇿꏿꇬꎌꌠꉬꀐ。ꀉꐩꃅꆜꉉꇬꋍꊨꏦꀃꅉꆹ，ꄚꈬꉘꁡꇤꄉꒆꀉꒉꌠꉬꐛꅹ，ꋋꆹꈍꄮꇯꆐꀊꑙꈨꌠꊌꂿꇬꆹꃆꀞꇂꁮꈨꊌꂿꌠꀋꏭ，ꋍꍈꂯꇣꋲꐨꀋꐥꌠꉬꀐꄷ。

ꋇꑊꆹꊰꎖꉺꆏꑠꈨꈛꎼꈜꈴꄉꇈ，ꂴꊂꃅꇁꌊꍶꑿꉘꉚꅉꑠꌕꈚꇬꉜꈴꌐ。ꂵꆤꃀꆹ，ꇁꌊꃪꆈꐦꄂꉬꄷꆈꌠꑶꇽꁡꇤꑠꈚꇬꄉꆀꃅꏦꃤꇬꈴꄉꌵꋠꏢꋠꇈ，ꄹꃥꀕꌋꈀꄸꑌꋓꄉꈮꇁꈜꅉꃅꋍꃢꌧꇁꁈꈨꒉꃅ，ꋍꏿꌧꇁꐯꇰꌐꇈꈛꎂꃅꄚꄉꑬꆏꌠꉬ。ꃷꐕꃮꌺꆹꄚꑶꇽꁡꇤꇬꃷꇎꃷꇤꈨꌠꅿꌧꈿꅉꇬꄉꌬꍬꐥꌠꈨꏀꁰꄮꌬꇐꆹꈍꑋꎹꊌꇇꈐꇬꊐꄉꌠꉬꀐ。

ꅑꅷꁯꋒꐮꉐꄮꈉꌕꂷꇅꌠꑞꄮꇬꆏ，ꋍꑊꆹꃪꆈꐦꄂꒊꃀꂠꌠꇬꍬꄉꀱꉈꑴꇌꄙꍔꇬꉜꄉꈻꇁꇈ，ꈛꎂꏿꄉꇁꌊꃪꆈꐦꄂꒊꃀꀏꐰꊙꌠꐛꅉꑠꈍꑋꈚꇬꄉ，ꀋꆏꃅꐪꊛꄉꒊꄜꇉꋍꌊꄉꉑꋗꌺꌋꆀꉜꌺꃅꑠꉘꉚꅉꈍꑋꈚꇬꑌꉜꄉꅲꁱꌊꇁꌠꉬꌦꀐ。

ꈝꃀꈪꇬꄉꈁꊌꂿꊌꈨꇁꌠꆹ，ꑡꑌꃷꐕꃮꌺꉜꇬꆹꉬꇮꃅꇣꋲꐋꀋꌡꌐꌠꉬ。ꑶꇽꁡꇤꑍꂷꐛꐨꑌꐯꀋꌡꌐ，ꄹꁆꆏꊖꁍꌦꏮꀻꑳꆈꐷꀕꌠꐊ、ꄹꁆꆏꊖꁍꌦꏮꉄꇓꑳꉼꏑꀕꌠꐊ、ꄹꁆꆏꉄꇓꊖꀍꀠꑳꅩꌦꀕꌠꃅꑠꀋꐊꅍꀋꐥ，ꐕꍯꄇꈜꂱꋯꏭꑍꈚꌠꑠꇬꆏ，ꄡꇗꆹꄹꊐꑳꌕꊐꇖꊐꃅꋈꄻꄉꌠꑠꑌꌐꃅꌐꀋꉆꃅꐥꌐꌠꉬꅊꇈ。

ꃷꐕꃮꌺꆹꇯꍝꃅꑘꃅꁡꇤꐥꐨꐥꄷꆹꋒꌥꐮꋒꌥꌠꉬ。ꋋꆹꀋꉊꂴꆽꋍꀉꂿꎺꋦꁧꑎꑤꇬꄉꋍꃢꑘꃅꌶꄻꐥꋻꄮꇬ，ꋋꆹꇁꌊꏣꃀꏣꑟꈨꌠꅍꀀꈩꆹꋺꐛꅹ，ꄡꇗꃷꇎꃷꇤꀉꑳꈨꌠꑌꐊꄉꇂꁮꌋꆀꃮꑿꑠꑌꆫꋺꌠꉬ。ꄚꋋꀋꃅꇁꌊꑘꃅꁡꇤꇀꌦꄮꇬꆏ，ꌌꉪꐨꌋꆀꉜꐪꆹꀉꒉꃅꐯꀋꌡꌐꌠꉬꀐ，ꄚꇬꑘꃅꁡꇤꆹꉌꈲꃅꄷꑘꃅꁡꇤꌋꆀꐯꀋꌡꃅꊼꇅꌢꎭꑴꌦꅊꇈ。ꀉꐩꃅꆜꉉꇬꅽꏣꃀꏣꑟꀊꋨꈨꆹꀊꄶꐟꈯꃅꄷꀀꌐꌠꉬ，ꄚꇬꆹꈬꉘꃅꄷꉬꐛꅹ，ꐥꐩꐥꄷꇎꏦꆹꊼꇅꀋꇎꀋꃅꅉꐥꑴꌦ，ꄚꀕꇬꀀꌠꆀꃅꆈꌠꆹꃰꊿꈯꄔꇬꉂꏣꎵꑳꀕꌠꐥꌐꇈꀋꎪꀋꑴꀋꐈꀋꋓꌐꌠꉬ。

ꀉꐩꃅꆜꆹꈝꃀꈪꇬꄉꀋꆏꃅꇌꄙꍔꅿꎆꏣꀻꎆꃆꂮꌋꆀꊿꀹꃅꀺꃆꂮꑠꆹ，ꌌꇁꀋꆏꃅꌧꈿꇁꃷꐕꃮꌺꂷꌠꇰꅷꐺꇱꀋꏦꃅꎍꌠꉬꐛꅹ，ꃷꐕꃮꌺꋋꌌꑓꇢꑓꇱꆹꊼꇅꀉꐯꆹꌠꉬꀐ。ꀉꐩꃅꆜꉈꑴꄡꇗꒊꌋꀕꃅꉉꇬ，ꄚꇬꈬꉘꃅꄷꀉꑳꆹꋍꂷꉚꋍꂷꃅꀑꁮꅺꐳ、ꌳꉔꌳꄏ、ꈪꑌꇔꍣꌐꌠꉬ。ꋀꊇꈯꄔꇬꆹꋍꀂꇬꀉꄉꀉꂿꇬꄎꐕꂄꄉꄯꒉꁱꂷꀘꇎꏦꐥꈨꌠꆹ，ꄯꒉꁱꂷꀘꄷꆏ，ꉬꇮꃅꎖꌊꇍꈩꀒꎂ、ꍰꄖꇓꈓ、ꀙꏣꇓꈓꃅꑠꒉꌶꅉꇬꊌꁧꌐꌠꉬꄷ。ꃷꐕꃮꌺꆹꄚꅇꂷꋋꈨꊌꈨꈭꐨꆏ，ꇯꍝꃅꈁꑓꀉꊸꅪꌊꑊꏦꅇꉉꀋꀬꇁꇈ，ꉌꂵꈐꏭꆹꈍꃅꑋꅇꀨꋋꈨꌌꐪꊛꄉꉈꑴꉉꀋꏾꌠꉬꀐ。

ꌧꈿꅉꌧꈿꅉꃅꇬꆏ，ꋍꑊꆹꀋꋓꀋꉪꃅꇁꌊꑶꇽꁡꇤꀉꁁꑠꂷꇬꃹꇁꀐ。ꀉꐩꃅꆜꆹꃷꐕꃮꌺꂷꌠꏭ，ꆏꆹꆈꌠꀘꂿꌠꑊꈎꌋꆪꍆꌠꃆꂮꑠꆹꑇꑆꃅꉉꅷꐺ，ꄚꑶꇽꁡꇤꋋꂷꇬꆹꈎꌋꆪꍆꇬꀉꇨꌠꀙꃀꀉꁌꌭꈈꐂꇓꄷꑠꂷꄚꀀꌠꉬ，ꉡꆏꏁꇬꊼꇅꈎꌋꆹꉚꂿꄷ。ꃷꐕꃮꌺꂷꌠꉉꇬꆹ，ꉡꆹꁁꑇꁁꀋꑇꐆꃅꐛꅷꇁꇬꎷꌠꉬ，ꑞꃅꄷꆏꆈꌠꀘꂿꌠꑊꌧꇐꑇꇐꃆꂮꆹ，ꇯꍝꃅꉉꇬꆏ，ꀋꃅꋋꄮꈆꑪꇮꇐꃆꂮꇬꉉꀽꀋꄐ，ꀋꃅꋋꄮꈆꑪꇮꇐꑋꄡꇗꆈꌠꀘꂿꌠꑊꌧꇐꑇꇐꃆꂮꇬꉉꀽꅐꇁꀋꄐꑴꌦꄷꉉꅷꐺ。ꉉꅉꉉꅉꃅꇬꆏꃷꐕꃮꌺꋍꑊꆹꇁꌊꀙꃀꀉꁌꌭꈈꐂꇓꄰꐷꈭꈐꏭꃹꆹꀐ。

ꉜꅊꇉꂾꆏ，ꀙꃀꀉꁌꌭꈈꐂꇓꄰꅍꄉꈎꌋꆪꍆꇁꌠꊿꑠꆹꌐꃅꌐꀋꉆꃅꐥꌠꉬꅊꇈ。ꄚꄉꀉꐩꃅꆜꆹꇁꌊꀙꃀꀉꁌꌭꈈꐂꇓꏡꁮꇬꄉꁭꎐꈨꑌꃅꈍꑍꇬꉉꇈ，ꈀꄸꑌꏆꇁꂴꆽꃷꐕꃮꌺꂷꌠꃤꌋꌠꉌꃹꈴꌐꀐ。ꀙꃀꀉꁌꌭꈈꐂꇓꆹꃷꐕꃮꌺꏭꑡꂓꌠꊼꇅꅲꉚꈭꐨꆏ，ꎧꏸꁠꆚꅝꇁꈂꀸꇬꊐꄉꇈ，ꐪꊛꄉꀋꆏꃅꑓꋪꂭꄉꈍꑍꇬꈼꀘꇈ，ꄚꄉꃷꐕꃮꌺꃤꃆꂮꈨꌠꌊꇁꋋꇰꌐꀐ。

ꀙꃀꀉꁌꌭꈈꐂꇓꈎꌋꆪꍆꎼꇁꇬ，ꃷꐕꃮꌺꆹꉌꈎꌺꒆꌩꀮꈌꁈꊌ，ꃅꃴꌦꌋꐰꇑꊌ，ꀋꎪꀋꑴꐰꇑꊌ，ꉪꇐꀉꐯꃅꉪ，ꉪꀽꏡꀽ，ꈀꊋꋋꊋꃅꐛ，ꈌꍓꑓꍓꃄꑌꐛ，ꎆꊌꋚꊊ，ꃢꊌꈚꊌ，ꌞꃤꑌꋠꏾ，ꋍꃤꑌꌟꍈꄎꃅꐛ，ꉌꂵꍂꁁꈐꎭ，ꍂꁁꉈꆏꌒꆹꇮ。ꑌꑿꐰꇑꊌ，ꑌꁨꑿꈚ，ꑌꑿꃅꅲꇮ；ꑳꐮꁦꁏꌕꂷꌋ，ꀑꊂꋍꂷꀜ，ꀑꇬꇓꂵꌟꃅꈈꐰꇑꊌ；ꐧꊂꋍꂷꀜ，ꇇꇐꒊꊝꌟꃅꊰꐰꇑꊌ；ꑭꊂꋍꂷꀜ，ꑬꑃꇓꂵꈈꐰꇑ，ꈛꎼꈝꃀꎴꐰꇑꊌ，ꇇꌭꌩꁧꈈꐰꇑ，ꑓꋪꉘꁮꌟꃅꌬꐰꇑꊌ，ꈌꅑꈌꑳꐰꇑ……

ꏟꈯꀕꃅꃀꌠꀿꃀꐉꄉꂴꆽꆏꃮꁮꀉꆈꂷꌋꆀꃬꀮꀉꅪꂷꌌꄉꑞꈌꀱꇈ，ꊁꆏꐪꊛꄉꒀꅰꀉꐎꁨꅪꑠꂷꌌꄉꂄꃅꎔꏿꃅꋍꑶꌺꇖꌠꒌꋊꆠꁠꀘꑲꆏ，ꀋꃅꎼꈎꆏꌤꃅꑌꌤꐛ，ꎆꎹꑌꎆꐛ，꒿ꅇꇪꀮꂿ，ꂘꅇꈭ꒰ꇖ，ꀿꅇꎷꈌꋯꌠꄚꇬꐊ，꒜ꅇꂷꋶꒉꌠꄚꇬꐊ，꒿ꇐꂘꇐꄚꇬꐊ，ꌷꇐꊰꑋꑟꌠꄚꇬꐊ，ꎷꈌꎟꑣꉆ，ꀿꅇꎟꑣꀋꉆ，ꂷꋶꆴꉆꇬ，꒜ꅇꆴꀋꉆ。ꑮꒃꋒꋈꑳꊂꌿꌺꎺꌺꑠꆹꄘꑐꀕꇁꑌꇮꄷꉉꇱꀋꏦꃅꎌ……

ꃷꐕꃮꌺꆹꀙꃀꀉꁌꌭꈈꐂꇓꈎꌋꆪꍆꎼꇁꌠꅇꂷꈨꌠꅲꌐꈭꐨꆏ，ꉌꂵꈐꏭꄉꀋꆏꃅꈐꇿꏿꇈ，ꀙꃀꀉꁌꏭꈀꎭꀕꄷꉉꈭꐨꆏ，ꉌꂵꇿꌊꋋꇅꃅꇇꌭꄆꅇꂷꋋꇱꅥꇁꋍꀉꂿꁵꀐ。ꀉꐩꃅꆜꌋꆀꑌꇁꉆꌠꊇꃅꃷꐕꃮꌺꎁꃅꈀꄸꑌꉌꂵꇿꌐꌠꉬ。ꈎꌋꆪꍆꌐꈭꐨꆏ，ꃷꐕꃮꌺꌋꆀꀉꐩꃅꆜꑋꆹꄡꇗꐪꊛꄉꈛꎼꈜꈴꁧꌦꀐ。

ꃷꐕꃮꌺꆹꇁꌊꇌꄙꍔꇬꑍꀕꌕꑍꐛꈭꐨꆏ，ꇯꍝꃅꂶꉐꀉꇨꃅꐛꇁꀐ。ꈬꉘꃅꄷꃅꎸꄮꐰꇬꐛꌠꂶꉐꑠꆹ，ꋋꇅꃅꆏꇁꊊꑠꑵꉬ，ꋋꆹꉪꊇꈬꉘꃅꄷꀀꋺꐥꋺꌠꊿꈨꌠꆹꈀꄸꑌꇬꅉꐚꌐꑵꉬ。ꃷꐕꃮꌺꌋꆀꀉꐩꃅꆜꑋꆹꇁꌊꁱꀕꍉꈐꏭꄉꈩꂷꑣꐕꑵꌠꈩꅷꐺ。ꏢꁮꇬꐛꌠꍔꍔꃚꇬꌤꃅꊿꈨꌠꆹ，ꌤꆿꀋꐥꄉꆷꃹꄮꇬꆏ，ꋍꃢꋍꃢꇬꆏꇁꌊꄚꁱꀕꍉꋋꂷꇬꄉ，ꀉꐩꃅꆜꏤꐊꄉꌧꈿꁉꈿꉉꒌꏿꇌꑆꂨꇁꌐꌠꉬ。ꈀꄸꑌꄚꃷꐕꃮꌺꅿꇀꅉꐪꐘꈨꌠꆹꈍꃅꑋꐝꉅꌐꌠꉬ，ꄚꑤꄆꁱꄠꈐꏭꄉꋍꅿꈁꈯꑓꂷꑊꑍꂷꌠꆹꊌꂿꋺꌐꌠꉬꐛꅹ，ꋋꆹꁆꌊꄚꇌꄙꍔꇬꄉꄜꉺꄛꇰꌤꑘꃅꇁꌠꉬ。

ꌞꊿꄹꁆꉉꇬꆹ，ꑞꈨꄜꉺꄛꇰꅍꈨꅑꂯꆏꄷ，ꁌꀋꁵꄣꀋꁵꃅꅇꆿꀉꄂꉉꄉꇌꑆꂨꇬꆹꑞꈨꌬꍩꐥꂯꆏ，ꉪꊇꅿꎭꏿꅧꈠꁌꃄꎆꍈꌠꂯꋋꇅꃅꃑꇁꇇꈐꇬꊐꇁꀋꄐꇬꎷ。ꀉꁁꉈꑴꋍꂷꉉꇬꆏ，ꐯꑴꇆ，ꁌꀋꁵꄣꀋꁵꃅꅇꆿꀉꄂꉉꄉꇌꑆꂨꌠꆹ，ꌟꒉꌠꂿꈨꌠꁳꄩꏯꉜꄉꅂꆹꌊꌟꒉꀉꒉꌠꄺꆹꄏꌠꎁꃅꌐꌠꉬ，ꌟꒉꀉꒉꌠꄻꉆꄺꌒꌠꎁꃅꌠꉬ。ꅺꌡꄉꉪꊇꍔꍔꃚꈚꌠꀉꄂꂯꌌꉉꇁꄹꌶꍰ，ꀊꄶꉪꍔꈚꌠꈐꏭꐛꌠꌞꆈꌠꉌꈲꋙꋠꅉꇬ，ꋚꁌꀉꄂꂯꈍꑋꈍꑌꃅꌌꊒꀋꄐꃅꁯꌐꑴꌦ，ꉬꈎꃘꈓꎖꁯꐛꀐꌠꂯꌌꌞꊿꊒꌐꀋꄐꃅꎍꑴꌦꌠꉬ。ꉡꉜꇬꆏꇯꍝꃅꋋꈨꆹꌌꇁꈨꏀꌤꃆꀋꉬꀋꉆꇈ，ꅉꂫꊐꇬꇣꋲꐋꀋꌡꌠꌤꃅꄉꁱꌊꄜꉺꄛꑣꄉꌌꇁꄚꅺꅑꌠꋋꈨꌐꄡꑟꋭꌠꉬꀑꍰ。

ꀉꐩꃅꆜꆹꏭꇁꋀꊇꊼꇅꉜꈭꐨꆏ，ꃬꂵꃬꊭꌺꏃꄉꐷꈭꑬꊂꑭꀖꇬꏶꇁꈨꌠꈹꇬꎭꌠꀋꏯ，ꋀꊇꆹꉬꇮꃅꀉꐩꃅꆜꇱꏅꈹꇬꎭꌐꀐ。ꀉꐩꃅꆜꆹꈁꈯꑓꆜꃅꏭꇁꃷꐕꃮꌺꊼꇅꉜꇈ，ꃷꐕꃮꌺꂷꌠꆹꅇꀋꉉꃅꀊꄶꇬꉆꎌ，ꀉꐩꃅꆜꑋꄡꇗꀊꄶꊿꀊꋨꈨꌌꉉꌠ，ꅇꂷꈨꌠꆹꌌꊼꇅꑌꉉꀽꊨꀽꃷꐕꃮꌺꂷꌠꆹꀋꇰꌐꌠꉬ，ꀋꇊꇬꆏꉌꂵꄷꈐꄉꀊꄶꌤꃆꀊꋨꆹꉬꇮꃅꉬꉗꃅꐛꌠꌤꃶꐚꌠꉬꄷꉉꌠꌡ。

ꉬ

ꂶꉐꆹꊛꄉꈍꑋꑍꐛꇈ，ꄡꇗꉈꏮꈜꎴꅉꇬꆹꁧꀋꉆꃅꎍꑴꌦ。ꋋꄹꉈꆏꃷꐕꃮꌺꂷꌠꆹꌤꆿꃅꅍꀋꊌꐛꅹꃅ，ꌤꀋꐥꈩꀋꄿꄉꃅꋋꇁꌊꄚꇌꄙꍔꍔꃚꐛꅉꏦꈬꏦꎫꈨꌠꇬꋍꏭꉈꃅꈛꎼꄉꈩꆫꆹꀐ。ꋋꄹꉈꆹꇤꍤꇤꄻꄹꉈꌠꀋꉬꐛꅹꃅ，ꏦꈬꏦꎫꇬꊿꆹꊼꇅꀂꑌꃅꐥꑠꋍꑍꉬ，ꏦꈬꏦꎫꇬꑍꃀꑍꊂꌫꌠꎊꈬꃷꅉꈨꌠꇫꑌ，ꄡꇗꃼꇇꆹꀊꅰꃅꉾꃪꅍꀋꐥꃅꎍꌐ。

ꋋꆹꎙꋚꋠꌐꄮꈉꇅꌠꇬꉬꐛꅹ，ꄇꈜꑍꋮꐛꌠꆈꌠꉌꈲꋙꋠꅉꈨꌠꇬꆹ，ꋍꁯꋍꑷꈁꐛꅉꃅꄡꇗꊿꋧꊿꀞꇬꊎꏟꏈꐮꏟꏈꃅꎍꌐꑴꌦ。ꈛꎴꃅꇢꄉꈴꆹꄮꇬꆏ，ꊿꈨꌠꅿꏟꏈꅇꉉꃚꌋꆀꉌꈲꂸꏧꑵꌠꅥꈩꃚꆹ，ꀋꆏꃅꇁꌊꊽꅳꀧꇬꃹꇁꇬꎷꌠꉬ。ꃷꐕꃮꌺꆹꉌꋲꀕꇈꉌꌤꅑꎌꌠꉌꃀꍈꀉꄂꀵꌊꄉ，ꇁꌊꄚꋍꁯꄰꅿꀃꈈꁭꑭꑟꇈ，ꀂꏾꎇꌊꄚꈐꏭꊼꇅꉜꆹꄮꇬꆏ，ꆈꌠꌋꅪꑠꂷꆹꃙꋒꀉꂥꃅꄿꏀꌺꀋ，ꉆꐥꃅꈴꀒꁨꈐꏭꄉꂸꏧꅥꈩꇁꃅꀒꇴꑟꀐꅊꇈ。

ꃷꐕꃮꌺꂷꌠꆹꀒꆺꉈꄉꂸꏧꅥꈩꀋꇮꃅꉉꇈ，ꀊꄶꆈꌠꌋꅪꀊꋨꂷꆹꉌꂵꀋꇿꐅꃅꇌꄙꍔꇬꀉꄂꐥꌠ，ꂱꑱꃅꄷꀉꄂꐥꇈꀋꃅꀃꑍꆸꈐꆹ，ꌌꌬꑴꌦꌠꆈꌠꉙꇬꌌꇁꁭꎐꈨꑌꃅꑡꑣꉉꅷꐺꀋꐚ，ꃷꐕꃮꌺꆹꀊꅰꇫꅲꐝꉅꊨꄅꃅꀋꐛꃅꎌ。ꑞꃅꑌꑠꃅꉉꇬꑋꐥꋭ，ꅥꈩꆹꀋꇮꑳꆏꄚꇬꅽꀋꁌꀋꁧꂷꌠꉜꇁꄷꌠꅀꄷ。ꆈꌠꌋꅪꀊꋨꂷꇱꁒꐀꊼꇅꄀꈭꐨꆏ，ꃷꐕꃮꌺꉪꄉꇬꆹꋋꇅꃅꆹꏮꌊꀱꁧꂿꄷꌠꉬꀐ。

ꄚꃄꄵꀕꃅꑠꄮꇬꆏ，ꋙꋠꅉꌍꑓꈐꏭꆏꊾꂷꆹꃷꐕꏹꍓꄷꋍꂒꇴꐺꀐ。ꉜꅊꇈꂿꆏꃷꐕꏹꍓꄷꋍꂒꇴꌠꆹꍔꍔꃚꇬꐥꄉꌤꃅꌠꐙꈌꀈꏣꄙꆜꂷꌠꉬꅊꇈ。ꀋꑍꊂꃷꐕꃮꌺꄧꀕꃅꇁꌊꇌꄙꍔꇬꑞꇁꀊꋨꄹꉈ，ꍔꍔꃚꄰꋍꇬꌵꏢꄉꎧꅝꎸꋠꄮꇬꆏ，ꐙꈌꀈꏣꄙꆜꂷꌠꑋꄡꇗꊝꀕꃅꄚꐊꄉꃥꈯꃥꈜꎧꅝꎸꋠꌠꉬꅊꇈ。

ꐙꈌꀈꏣꄙꆜꆹꃷꐕꃮꌺꏭꀒꁨꈐꏭꈩꇁꃅꇴꌠꉬꅊꇈ。ꃷꐕꃮꌺꂷꌠꆹꒈꌦꀕꃅꈴꌊꈐꏭꃹꆹꇈ，ꅞꇁꏢꁮꋍꁁꏯꑠꈚꇬꑋꄉꄚꊿꋧꊿꀞꅉꈨꌠꇬꉜꅷꐺ。ꐙꈌꀈꏣꄙꆜꆹꀊꄶꑱꏲꃥꌋꀋꃀꂷꌠꏭꉆꐥꃅꆿꒉꍔꊸꄉꃝꌊꃷꐕꃮꌺꄐꇁꄷꅇꀵꎻꒉꇈ，ꄡꇗꐪꊛꄉꉉꇬ，ꅽꀋꃀꌺꈘꆹꀕ，ꆎꆹꏪꐦꌺꒆꉆꊯꁧꀋꂿ，ꀒꎂꌺꒆꅚꍃꁧꀋꂿ。ꆎꆹꇯꍝꃅꈌꑓꃮꑓꅑꅀꑡꃅꇆ，ꑓꅑꁧꀋꂿꑓꅑꊿꀋꌧ，ꋋꆹꌜꇬꄉꇁꌊꉪꊇꇌꄙꍔꇬꇁꌠꏹꍓꂷꉬ。ꋋꆹꉪꊇꇌꄙꍔꃆꏂꊁꑌꀻꎆꀒꁨꇁꌠꎁꃅ，ꌓꅲꂨꇁꌠꄹꃥꀉꒉꋍꉎꀋꐥꂷꌠꉬꀐ。ꄚꇬꑌꇁꉆꌠꂸꏧꅥꈩꐋꀨꈨꌠꆹꐙꈌꀈꏣꄙꆜꅿꉉꅇꉉꌠꅲꌐꈭꐨꆏ，ꈀꄸꑌꄓꄉꑋꅉꏆꇁꃷꐕꃮꌺꑌꇱꀋꏦꃅꎍꌐ。ꇁ，ꀒꁨꋍꇅꅥꈩꇁꄷꉉꌐꇱꀋꏦꃅꎌꌠꑌꐊ。

ꃷꐕꃮꌺꂷꌠꆹꒈꌦꀕꇈꑗꈈꀕꃅꉉꇬ，ꉡꆹꇯꍝꃅꄉꂸꏧꆹꅥꈩꀋꇮꌠꉬꄷ。ꉉꌐꈭꐨꆏ，ꄚꋍꉌꂵꈐꏭꆹꃶꐚꃅꄚꇌꄙꍔꇬꄉꂸꏧꅥꈩꌠꊿꈨꌠꅿꇷꉻꃅꒊꃅꇁꌋꆀꊋꌗꐛꄟꆹ，ꉬꇮꃅꃷꐕꃮꌺꂷꌠꋌꇷꋌꇰꋌꃪꌐꌠꉬꀐ。ꋋꆹꑤꍰꇓꈓꀉꒉꅉꇬꉹꁌꈨꌠꂸꏧꅥꈩꌠꌟꃅꀹꑳꃅꀋꐛꌐꌠꉬ。ꄚꇬꆹꀊꌃꌆꃅꈀꄸꑌꋓꄓꏿꄉꇁꂸꏧꅥꈩꌐꌠꉬꅊꇈ，ꊾꂷꂴꆽꌠꁱꄜꄩꆏꎆꃀꈍꑋꈍꑋꃅꄺꇁꀊꄶꇬꅞꄉꌐꌠꉬ。ꑳꁨꈁꐛꅉꇬꃅꊿꐛꎍꌐ，ꄷꀋꁧꇊꆏꀊꄶꂸꏧꁱꄜꀉꒉꑵꌠꉬꌐꇈ，ꋍꋋꇙꈩꄉꂸꏧꂷꀕꌌꏓꇱꀱꉆꌐꌠꁱꄜꑵꌠꉬꌐꅊꇈ。

ꃷꐕꃮꌺꂷꌠꆹꋍꈪꌺꍈꂸꏧꅥꈩꌠꉜꆫꈭꐨꆏ，ꋍꉜꇬꆹꀈꈥꀕꃅꄮꈉꈨꌌꂃꈩꆿꈩꇈꁢꊧꀋꐥꌠꉬꀐ。ꑠꄮꇬꆏꐙꈌꀈꏣꄙꆜꂷꌠꆹꃷꐕꃮꌺꆹꄻꀋꈴꇁꌠꋋꇱꉜꅐꇁꇈ，ꑠꄮꇬꆏꄧꀕꊜꋽꃅꎆꃀꀉꑌꑠꈨꑌꋋꇱꅥꊋꄉꐛꅹ，ꋋꆹꏹꍓꋋꂷꏃꌊꍔꑬꊂꊼꇅꏭꁧꂿꄷꄉꒉꄸꍈꎹꄉꇈꈭꐨꆏ，ꑣꄓꏿꄉꋍꄓꇁꃷꐕꃮꌺꌋꆀꐮꐊꄚꋙꋠꅉꋋꈚꇬꐞꁧꀐ。

ꐙꈌꀈꏣꄙꆜꆹꀋꆏꃅꇁꌊꃷꐕꃮꌺꇬꅲꐺ，ꑞꑵꈨꌠꉌꃹꀋ？ꃷꐕꃮꌺꉉꇬꆹꄿꐨꃅꄹꌷꄷ，ꐙꈌꀈꏣꄙꆜꆹꏭꇁꄚꇌꄙꍔꈭꇍꆈꍮꉜꐺꇬꑋꄡꇗꋋꉪꇬꈩꌒꅉꑠꈚꇬꀋꐛꌐꌠꌡꀐ。ꑠꄮꇬꆏꐙꈌꀈꏣꄙꆜꅿꑓꋪꆹꋋꇅꃅꇁꌊꃷꐕꃮꌺꅿꇭꀧꇖꌋꂷꌠꇬꉜꉚꇈꄤꎖꀋꆏꃅꈭꐨꆏ，ꐪꊛꄉꉉꇬ，ꇯꍝꃅꄿꏀꊿꄾꂷꉬꀐꅊꇈ。ꃷꐕꃮꌺꆹꋋꇱꉜꅷꊼꇅꉌꂵꐛꀋꌒꑊꏦꐆꃅꐛꆹꀐ。ꄚꐙꈌꀈꏣꄙꆜꆹꒈꌦꀕꋋꇱꏶꇁꃷꐕꃮꌺꅿꆽꁠꇁꑳꁆꌠꏯꊼꇅꄀꈭꐨꆏ，ꐪꊛꄉꒈꌦꀕꃅꉉꇬ，ꑷ，ꉌꋬꈬꐛꃅꄉꑷ，ꉡꆹꆏꏁꌌꈩꌒꅉꑠꈚꇬꉜꄉꈩꁧꂾ，ꆎꆹꉪꄚꇌꄙꍔꇬꅲꁱꇁꌠꏹꍓꉬꐛꅹ，ꄉꉻꌬꎆꌌꄉꌵꏢꉆꌠꉬ，ꉡꁴꑌꄡꇗꆎꐊꄉꋍꃢꄉꉻꌬꎆꈲꊌꌒꐨꍈꊼꇅꌬꈩꆹꂿꄷ。

ꊁꆏꐙꈌꀈꏣꄙꆜꂷꌠꆹꑠꃅꄉꃷꐕꃮꌺꂷꌠꋋꇱꏃꌊ，ꈛꎂꏿꄉꇁꌊꇌꅐꍔꄇꈜꁰꅐꏭꐛꌠꄚꀂꏾꒈꋌꅉꋌꑷꅍꃹꇁꀐ。ꀂꏾꒈꋌꅉꋋꂷꉇꉻꆹꋽꃆꄻꌊꈍꃅꉓꁱꅩꐂꊾꁧꊿꃪꄩꐱꐺꌠꉬ。ꈴꇁꀃꈈꈐꏭꃹꇁꄷꆏ，ꄇꄤꀉꒉꇢꊭꈚꌠꇬꆹ，ꊾꄙꊿꉐꃅꇁꄚꇬꄉꀂꏾꑐꐺꌐꅊꇈ，ꉉꌦꒈꌦꄹꌧꈿꁉꈿꌐꇁꀋꉆꃅꎍꇈ，ꃼꇇꆹꃀꅉꆐꉾꌊꈍꃅꍄꑐꀕꃅꎌꌐꌠꉬ。ꌕꊰꎖꈎꐥꇈꃀꅉꆐꎔꌊꊿꋌꁭꑴꌦꌠꌋꅪꀂꏾꑐꅉꇬꏲꂠꊿꂷꌠꆹ，ꋋꇅꃅꁖꇁꐙꈌꀈꏣꄙꆜꋍꑊꇬꈮꇁꈜꅉꃅꋩꏦꇁꇱꀋꏦ，ꄷꀋꁧꐮꈯꐮꈜꉉꌐꒉꌐꇁꀋꉆꃅꎌ。

ꐙꈌꀈꏣꄙꆜꅿꌧꄜꎻꇁꌠꈯꄔꇬꄉꅉꐚꅜꇬꆏ，ꄚꄿꏀꌺꏦꋋꂷꆹꀉꋶꃄꑗꑤꍈꇱꁨꌋꌊꇁꌠꌜꇬꑍꄜꄯꒉꅐꃑꅉꇬꐥꌠꈨꏀꄜꉺꌠꏹꍓꂷꉬꇈ。ꀋꃅꋋꃢꆹꉇꃅꇁꌊꄚꉪꊇꇌꄙꍔꇬꄉꊿꀹꃅꀹꐋꀋꌡꌠꊼꇅꌊꎖꉚꇁꌠꉬꄷ。ꇬꊎꀂꏾꑐꑋꃅꄉꌠꄿꏀꈍꑍꑼꌠꆹ，ꉉꄷꀋꅐꇈꋋꇅꃅꊖꁍꑊꈷꇓꈐꏭꇫꈴꄉ，ꇬꁌꒉꇬꁭꇈꉈꑴꆏꉌꉅ（ꈻ）ꃴꆅꌠꑓꋪꑓꑟꑠꌞꏭꇁꋍꇬꉜꇱꀋꏦꃅꎍꌐ。ꃷꐕꃮꌺꑋꄡꇗꅇꂷꑞꈨꉉꇬꄉꍑꂯꌠꋋꇬꀋꌧꄉꊼꇅꐛꀋꌒꐆꃅꐛꇁꇈ，ꈂꀸꇬꆹꊼꇅꒈꌦꀕꄷꒊꒉꑴꇬ，ꄚꉌꂵꈐꏭꆹꈍꃅꑋꀏꒉꄩꆹꄹꐛꀋꐛꃅꎍꌠꉬꀐ，ꄚꊰꆹꈍꃅꑋꇬꅉꀋꐚꌠꆏꐙꈌꀈꏣꄙꆜꆹꂁꈢꆈꄉꑡꈨꃅꐺꌠꉬꀋꐚꈨꌠꉬ。

ꋍꑊꇁꌊꑳꄹꊐꄩꑍꊐꌠꇬꑞꇁꈭꐨꆏ，ꐙꈌꀈꏣꄙꆜꆹꂷꌠꆹꉉꄷꀋꅐꃅꈌꃅꈌꃨꉆꐪꌧ、ꃆꇭꃅꃨꏪꈜꌧꌠꌟꃅ，ꀊꄶꑮꆜꅩꃅꈨꌠꏭꊼꇅꌗꋏꀠꏲꄉꉆꐥꃅꀒꁨꇁꃅꇹꄣꅷꐺꅊꇈ。ꄚꋍꈂꀸꇬꆹꀋꆏꃅꉉꇬ，ꄿꏀꌺꏦꋋꂷꆹꈀꄸꉬꌠꆍꊈꇬꅉꐚꀕꀋ，ꋋꆹꀉꋶꃄꑗꑤꍈꅿꊿꉬꑴ，ꀋꎪꃅꌟꃅꄹꃥꄿꏀꌺꏦꇭꀧꀉꒉꋋꂷꀨꎹꆽꃴꋒꃅꄉꀐꄹꊡꀱꅷꐺ。ꄚꑳꄹꊐꑍꊐꀕꌠꋋꈚꇬꆹ，ꉬꇮꃅꀧꑌꌠꉬꌐꐛꅹꃅ，ꄚꈐꏭꆹꋽꄻꌊꀊꅰꃅꑺꀽꀕꇈꑱꌆꋽꎔꇬꎌꌐꌠꉬꅊꇈ。

ꌋꅪꀂꏾꑐꅉꇬꏲꂠꊿꂷꌠꆹ，ꀍꑐꆹꀊꎳꃅꉘꄻꇁꋍꆽꁠꇬꉱꄉꇈꊼꇅꉙꌊꏂꂿꀕꃅꄉꂷꉬ，ꋋꅇꉉꇬꆹꃙꋒꈍꃅꑖꈈꀕꇈꐚꒉꌟꃅꐓꂿꀕꌠꉬ。ꅇꉉꇬꆹꉬꇮꃅꃷꐕꃮꌺꆹꀊꅰꃅꇫꅲꑳꀋꌧꇫꅲꑳꀋꇮꌠꃅꄷꅇꉙꈨꌠꉬꌐꅱꀋꅐ，ꄚꋍꅿꉜꌒꌠꇭꀧꐛꄟꂷꌠꌋꆀꇇꏸꇇꃀꄖꌠꐛꐨꇬꈴꄉ，ꋋꉉꌠꅇꂷꇬꐊꇐꆹꑡꄜꌠꋋꇅꃅ，ꊿꇱꉪꈴꇈꉪꐛꐝꉅꇁꄎꌠꉬ。ꋋꆹꇁꌊꋍꑊꇬꊼꇅꅲꅷꐺ，ꂴꆽꏭꀂꏾꂷꂷꌠꒈꋌꇈꊁꆏꈁꑓꂷꌠꒈꋌꄉꌌꉨꌎꇬꄉꆏ，ꊾꆹꋋꌌꀊꅰꃅꊼꇅꉌꊋꀉꇨꇈꊋꑌꏢꑌꄉꁦꉘꀕꃅꐛꇁꌠꉬꄷ。ꐙꈌꀈꏣꄙꆜꆹꌋꅪꀂꏾꑐꅉꇬꏲꂠꊿꂷꌠꇬꊼꇅꅑꁧꀵꐆꃅꉉꇬ，ꆎꆹꋋꈨꉈꑴꅲꄷꅐꑴꌦꄸꌠꅀꀋ，ꉣꑊꆹꋍꋬꈭꃅꀕꌐꑵꌠꈁꌐꌠꉬꀋꇊ，ꐙꈌꀈꏣꄙꆜꆹꉈꑴꋍꃢꇁꌊꌋꅪꂶꌠꅳꀧꏢꁮꇬꄉꀅꌳꌺꅇꂷꁦꎆꋍꇬꑍꇬꉉꌦꇈ，ꃸꅐꌫꎆꃆꂮꆹꍔꍔꃚꇬꌗꇬꁳꇁꅊꈫ。

ꊁꆏꃷꐕꃮꌺꌋꆀꐙꈌꀈꏣꄙꆜꑌꆹꇁꌊꑳꋍꁨꇬꄉꀅꌳꀅꌳꃅꀂꏾꒈꋌ、ꈁꑓꒈꋌ、ꂱꊨꄵꌠꃅꀐ，ꑡꑌꉬꇮꃅꌌꋍꂟꊰꐚꃅꌠꌡꃅꄉꇈꌌꒈꌺꈴꎴꀋꈘꏡꃅꀕꌐꀐ。ꊁꇊꊁꄽꂫꇬꆏ，ꋀꊇꆹꊨꏦꀃꅉꃅꇁꌊꂱꑱꅉꋍꁨꀉꄂꃅꐛꌠꒈꋌꑳꑠꁨꈐꏭꃹꆹꌐꀐ。ꒈꋌꑳꆹꀉꒉꐯꀉꒉꌠꉬ。ꒈꋌꑳꄇꄤꂴꆽꆹꆭꑆꉈꑋꎇꀀꅍꀉꒉꐯꀉꒉꑠꂷꄺꄚꇬꅞꄉꇈ，ꉈꑴꆏꀉꁁꌫꉂꌬꈾꌬꅍꑠꆹꌐꃅꌐꀋꉆꃅꐥꌐꑴꌦ。

ꃷꐕꃮꌺꆹꄡꇗꉘꃀꃢꌠꋋꈨꊌꂿꋺꌠꉬ，ꑡꂓꌠꂓꆹꇴꎻꇁꀋꄐꑴꇬ，ꄚꀑꐱꃅꋍꅿꌬꍩꑡꐥꌠꆹꈍꃅꑋꋋꅉꐚꌐꌠꉬꏭꐛ。ꌋꅪꀂꏾꑐꅉꇬꏲꂠꊿꂷꌠꆹ，ꋋꇅꃅꑮꆜꀊꏀꅪꎔꑠꑍꂷꋋꇱꇴꌊꇁꇈ，ꈎꄜꆹꃷꐕꃮꌺꌋꆀꐮꀋꇊꃅꐙ，ꋀꊇꑌꄡꇗꋌꉖ꒜ꅨꄉꌐꌠꉬ，ꄚꈐꏮꋍꂷꆹꂱꑆꃰꇍꈭꇈꀄꊭꌺꃅꐛ，ꂱꀯꆹꉙꌊꅩꃅꅪꇉꀕꃅꊼꇅꊽꐬꆠꏭꃅꐛꎌꌠꉬ。

ꑮꆜꀊꏀꋋꑍꂷꑌꄡꇗꅇꂷꇬꑋꀋꉉꃅꎌ，ꋍꑊꆹꈍꃅꄹꃥꇬꁌꒉꐮꁌꒉꃅꎍꌠꌡꇬꎷ。ꌋꅪꀂꏾꑐꅉꇬꏲꂠꊿꂷꌠꀉꄂꋍꇅꆏꇁꈐꏭꃹꇁꌥ，ꋍꇅꆏꁖꅊꁧꈴꁧꌥꃅꐺ，ꇿꇬꑞꇬꆏꈍꃅꄉꃅꄹꑮꆜꀊꏀꑍꂷꌠꇬꅇꁵꄉꌌꊡꀱꅷꐺꇬꎷ。ꋀꊇꆹꄚꅇꂷꋋꈨꌌꉉꐺꊡꀱꌠꈯꄔꇬꄉ，ꈀꄸꑌꋓꄉꇈꀊꅰꎕꏦꇬꀋꑟꌠꉌꈲꁊꈴꅇꉙꈨꌠꌌꉉꅷꐺꌐ。ꑮꆜꀊꏀꑍꂷꌠꆹꀅꌳꌺꃅꋓꄉꃷꐕꃮꌺꂷꌠꇬꁧꃤꃅꍑꒃꇁ，ꃮꀠꌉꌠꀋꏭꇁꀊꄶꆭꑆꉈꑋꎇꀀꅍꂷꌠꄩꀀꄉꇈ，ꌌꇁꀋꆏꃅꉨꌎꃴꑣꃴꏠꅷꐺꀐ。ꃷꐕꃮꌺꅿꇭꀧꇖꌋꋋꂷꃅꋋꌌꈍꃅꑳꀙꇈꇯꍝꃅꄚꄉꋍꉎꀋꐥꃅꁦꉘꀕꃅꐛꌐꌠꉬꀐ。

ꑠꄮꇬꆏꑮꆜꋍꂷꆹꃙꋒꀂꂥꌺꃅꃷꐕꃮꌺꏭꅲꇬꅷꐺ，ꈀꄸꂷꊏꄚꇬꐥꇈꇬꄉꅽꉌꃹꀋꄷ？

ꃷꐕꃮꌺꉉꇬ，ꅽꑡꉬꀋ？

ꑮꆜꂷꌠꆹꐪꊛꄉꉉꇬ，ꆎꆹꉣꑊꈀꄸꂷꌠꄉꉌꃹꆏ，ꆎꇬꉌꃹꂷꌠꊏꄚꇬꐥꄉꇈꂿꇆ？

ꃷꐕꃮꌺꆹꋋꇅꃅꄚꄉꑡꑌꋋꐝꉅꂥꀘꋍꌧꇁꀐ，ꋍꂷꆹꈍꃅꑋꊏꄚꇬꐥꄉꇈꑳꆀꍑꌠꉬ，ꋋꑵꌠꆹꌞꊿꌌꁮꅉꃅꌧꇬꎷꌠꒈꃬꌀꀴꋓꄉꒈꋌꑵꌠꉬꀐ。ꃷꐕꃮꌺꅿꉌꂵꂷꌠꆹꌼꇑꌼꀠꃅꐂꇁꇈ，ꈁꑓꂷꌠꊸꌊꅩꃅꅪꍠꀕꇁꀐ，ꊼꇅꑮꆜꂷꌠꇫꅇꀱꂿꄷꇬꆏ，ꄚꋍꈂꀸꆹꈍꃅꑋꅇꀋꇁꅇꀋꊌꀐ。ꊁꆏꑮꆜꋍꂷꆹꌙꈈꀕꃅꁖꉈꏭꈴꁧꇈ，ꀃꈈꁬꌠꎤꈏꊐꊐꄉꀐ。ꊏꄚꇬꐥꇈꌠꆹꑮꆜꀊꋨꂷꌠꆹꆹ，ꂱꀯꉙꌊꅩꃅꅪꇉꀕꃅꄉꂷꌠꉬꅊꇈ。

ꑮꆜꂷꌠꆹꆈꁨꇤꊭꀕꇈꌙꈈꀕꌊꑡꑌꉉꄷꀋꅐꃅ，ꋍꊨꏦꅿꃢꈜꈨꌠꋋꇱꇔꇨꎭꌐꈭꐨꆏ，ꐪꊛꄉꇁꌊꃷꐕꃮꌺꅿꆞꏣꏡꌠꑌꋍꇱꇔꇬꎭꀐ。ꃷꐕꃮꌺꆹꀋꆏꃅꎇꇁꀊꄶꄩꀀꄉ，ꀋꇊꆏꇬꊎꀋꆷꃛꃅꑓꋪꂭꄉꉌꊋꀉꇨꇁꃅꌠꉌꂵꑠꌌꉘꉚꌠꌡ，ꋋꑌꄡꇗꅇꂷꆹꋍꇬꑌꀋꉉꌠꉬ。ꑮꆜꂷꌠꑋꄡꇗꅇꆹꋍꇬꂯꀋꉉꑴꌦꌠꉬ，ꋋꌌꉪꇁꇬꎷꆹꇿꇬꑌꋍꅿꌗꅐꅾꉘꈨꌠꀉꄂꉬꌐ，ꄚꊁꆏꋍꅿꑗꑟꀕꌠꃙꋒꈨꌠꆹꀅꌳꀅꌳꇁꋍꅳꀧꇬꃹꇁꇬꎷ，ꃙꋒꋋꈨꆹꈍꃅꊿꋌꁭꇈꉂꑟꅑꌐꌠꉬ。

ꋀꊇꆹꋓꄉꐂꇁꀇꐒꈐꏭꊐꄉꇈ，ꇨꀠꅩꀧꍓꃅꒈꋌꀐ，ꒈꊸꃅꌗꈨꌠꆹꆈꇐꀕꃅꄓꌊꋍꑊꄩꉱꈴꇁꌐꀐ。ꋋꇅꇬꆏ，ꃷꐕꃮꌺꂷꌠꆹꀋꋓꀋꉪꃅꎺꇁꀉꐩꃅꆜꌋꆀꐮꐊꄉꃪꆈꐦꄂꈚꌠꇬꆹꇈꇁꀱꇁꄮꇬꆏ，ꇁꌊꀊꄶꈝꃀꈪꀙꃀꀉꁌꌭꈈꐂꇓꄰꅍꄉ，ꈎꌋꆪꍆꌤꃆꐘꌠꄧꄹꇁꋍꉌꂵꇬꃹꇁꌐꇈ，ꃷꐕꃮꌺꉜꇬꆹꇯꍝꃅꀄꂼꂻꌠꌡꇬꎷꅊꇈ。

ꒈꃬꌀꀴꌟꃅꋓꄉꒈꋌꌐꇈ，ꋀꊇꆹꈛꎂꃅꇁꌊꄚꈐꏭꐛꌠꊿꑍꂷꋓꄉꀀꇎꌠꀀꈤꂷꌠꄩꑞꇁꀐ。ꊿꑍꂷꋓꄉꀀꇎꌠꀀꈤꋋꂷꌠꄩꄉꇬꆏ，ꃷꐕꃮꌺꌌꉪꇁꇬꆹꇯꍝꃅꀄꂼꂻꌠꌡꌠꀉꄂꀋꉬꃅ，ꄷꀋꁧꉈꑴꆏꅏꊧꆽꇨꑠꋒꅑꄉꐙꇁꃅꃴꇬꃹꁧꌠꌡꀐꌠꉬꅊꇈ。

ꃷꐕꃮꌺꆹꀋꉊꂴꆽꆹꉂꈩꇿꈩꌤꃆꐘꌠꆹꈩꀋꋻꑴꌦꐛꅹ，ꋋꆹꀋꇊꆏꀊꅰꃅꇬꐝꉅꂥꀘꃅꀋꐛꑴꌦꌠꉬ。ꋋꆹꎺꇊꄧꀕꃅꋋꎺꄉꌠꆏꒉꌶꅉꇬꐥꄮꇬ，ꄮꈉꐯꀋꌡꃅꌐꐯꀋꌡꑠꑍꃢꑍꈚꇬꄉ，ꌋꅪꌶꌺꑍꂷꌋꆀꋍꃢꉂꈩꇿꈩꀋꇊꌠꁮꅉꇫꀧꌠꐥꋺꀋꇊꌠꉬ。ꄚꉬꇮꃅꈩꌊꊋꐛꀋꋒꌐꌠꉬ，ꑞꃅꄷꆏꊨꏦꋀꊇꐮꇰꉂꈩꇿꈩꎖꋪꆹꋍꍈꂯꀋꐥꌐꌠꉬ。

ꀊꋨꃢꇬꆹꋽꇐꑫꇬꌋꅪꌶꌺꂷꋍꑊꆹ，ꈍꄮꇬꇯꆐꐮꉌꃹꑓꐛꄉꃅꏸꏂꐷꀕꌠꈊꃀꑠꉔꆏ，ꋍꑊꆹꇇꎆꐯꆽꃬꄉꇁꌊ，ꌶꅉꉈꎭꏪꏂꅙꀕꑠꏬꇬꄉꉂꈩꇿꈩꆹꇈ，ꌋꅪꌶꌺꂷꌠꆹꋋꄌꂣꈐꇬꊐꄉꇈ，ꀏꏯꏾꋒꐯꌌꄉꈩꂯꄉꄮꇬꆏ，ꌋꅪꌶꌺꂷꌠꆹꋋꇱꇷꌊꈍꃅꅰꈻꑋꆐꀋꉬꃅꑳꉩꇬꎷꄉ，ꄚꄉꂸꐕꂸꁁꌊꁁꈩꁁꀋꈩꃅꇫꎭꋺ，ꃷꐕꃮꌺꆹꄚꄉꇯꍝꃅꈍꃅꉌꊰꑓꊰꇈꇨꇅꃃꌠꉬꀐ，ꄚꄉꋋꆹꊁꆏꌋꅪꌶꌺꂷꌠꇬꅲꇫꀋꅲꆘꅝꀐ。

ꃷꐕꃮꌺꆹꈍꄮꇬꇯꆐꂁꇁꀊꄶꉌꂵꈐꏭꄉ，ꀋꆏꃅꊜꋽꄮꑠꃢꊙꎹꌊꄉꐞꍀꑕꑘꌋꆀꋍꃢꉂꈩꇿꈩꏾꅷꇁꇬꎷꌠꉬ。ꄚꑠꃅꑴꇬꇯꍝꃅꃰꊿꆹꉌꂵꉪꅉꐛꀋꉆꅊꇈ，ꋋꆹꄡꇗꄮꈉꊜꋽꄮꑠꃢꆹꎹꊌꀋꋺꇬꎷꑴꌦꌠꉬ。ꋋꅉꐚꌠꆏꐞꍀꑕꑘꆹꆳꀋꁉꅪꍈꉬꑴꌦꌠꉬ，ꋋꆹꇯꍝꃅꐞꍀꑕꑘꇬꆹꉂꅉꌠꉬ，ꋋꆹꐞꍀꑕꑘꇬꀨꎹꆽꃴꇬꎷꌠꉬ，ꌞꌺꃰꌶꌺꈨꌠꁳꐞꍀꑕꑘꇬꆹꊫꃛꆽꃝꆽꑣꇁꀋꉆꇬꎷꌠꉬ。ꑠꐛꅹꋍꊨꏦꑴꅉꑋꈀꏾꃅꐞꍀꑕꑘꇬꆹ，ꇨꆰꇨꊸꀋꀺꀋꑴꌠꑠꃅꐨꆹꀋꃅꀕꄉꐥꅷꀃꑍꑟꇁꌠꉬ。ꋋꆹꉈꃅꌧꈿꁱꇐꀊꎳꌠ《ꇊꃤꅿꌩꏪ》ꃅꑠꃼꌞꌊꐞꍀꑕꑘꁳꉜꄺꇁꎻꌠꉬꇈ，ꋍꉌꂵꇬꉪꃅꉪꄉꇬꉘꇉꌠꆏ，ꐞꍀꑕꑘꂷꌠꆹꇬꐝꉅꂥꀘꇁꐘꌠꌤꆏ，ꃰꊿꉂꏣꋋꑵꆹꑡꃅꌠꇫꄉꑬꄒꄉꃅꅷꁧꑵꉬꈨꌠꉬꀐ。

ꋋꄹꉖꈊꃀꃅꃤꁋꇅꌠꇬꆏ，ꂶꉐꑌꆎꄉꀋꐛꀐ，ꉘꁮꂷꌠꆹꀱꁧꄚꀱꁧꀋꄚꃅꐙꐤꁮꄉ，ꁯꋒꈨꑭꅩꃅꅪꇉꀕꌠꊎꇁꀊꄶꁰꅐꀉꁁꏯꄀꅑꎌꑴꌦꅊꇈ。ꃅꎸꄮꐰꅿꃅꃤꆹꄚꄉꀋꇊꆏꋋꇱꈻꌊꉈꃅꀊꎳꇁꌠꌡꇬꎌꀐ，ꇌꄙꍔꍔꃚꀃꈈꏢꁮꂴꆽꂾꐛꌠꈯꄔꈝꃀꋋꏢꆹ，ꄚꎻꄚꈴꐺꌠꊿꈨꌠꌋꆀꌒꇍꍯꏮꇉꌕꂷꅑꈨꌠꆹꀅꌳꀅꌳꃅꀉꑌꇁꇈ，ꄷꀋꁧꊼꇅꇯꋧꁞꏟꏈꌊꒉꈾꃅꈾꌠꇯꌡꇬꎌꀐ。ꃷꐕꃮꌺꂷꌠꆹꄇꈜꏢꁮꇬꍬꄉ，ꀅꌳꀅꌳꃅꀱꍔꍔꃚꐛꅉꇬꉜꄉꏮꆫꈩꅷꀱꇁꇈ，ꋍꇭꀧꇖꌋꋋꂷꃅꃶꈢꏢꈢꌊꊋꀋꑌꇈꐙꑌꐚꄎꀙꌠꉬꀐ。

ꀱꇁꌊꁱꀕꍉꇬꑞꄸꆏ，ꋋꇅꃅꈊꍫꋠꄮꈉꉬꀐꅊꇈ，ꃷꐕꃮꌺꆹꊭꄎꄉꍔꌺꇓꍔꒃꌊ，ꄚꏢꁮꇬꐛꌠꍔꃚꋙꃅꑳꇬꄉꋚꄺꋠꆹꂿꄷꄮꇬꆏ，ꄚꃅꄵꀕꇈꇨꆰꇨꊸꃅꀥꌊꉈꑴꇁꌠꀉꐩꃅꆜꂷꌠꇱꇊꌭꄉꀐꌠꉬꅊꇈ。ꀉꐩꃅꆜꆹꉌꈯꑓꈜꇈ，ꉘꀋꇉꃅꊿꇿꏿꃅꇇꇬꆹꀋꆏꃅꑍꄜꄯꒉꑠꁬꌌꉈꈩꅉꃅꄉꉉꇬ，ꃬꀮꊷꊸꁨꊰꄃꇨꊸꆏꃀꌠꀋꐕ，ꂴꆽꇨꊸꃅꋚꄡꋠꃅꄉꇆ，ꆎꉜꉐ，ꉪꊇꑤꇬꅿꋍꋬꈭꉻꑫꃅꄉꌠꈨꏀꄛꇰꈨꌠꆹ，ꀃꑍꆏꄚꑍꄜꄯꒉꇬꅑꇁꀑꄷꉉꇱꀋꏦꃅꎌꌠꉬꅊꇈ。

ꃷꐕꃮꌺꆹꑍꄜꄯꒉꁬꌠꋋꊪꌊꄚꈴꑳꑲꒌꇂꃴꉆꄉꌌꀒꉜꑟꀐ。ꃅꐨꑍꄜꀋꃅꆏꊂꋍꑍꄹꉈꅐꌠꑍꄜꄯꒉꁬꌠꆹ，ꉘꃀꏾꌠꇬꅑꌠꈨꏀꆹꉬꇮꃅꎺꋦꁧꑎꑤꇬꅿꈨꏀꄛꇰꌠꀉꄂꉬꌐꇈ，ꎺꋦꁧꑎꑤꀕꍰꇓꈓꐛꐨꁱꒌꋽꎔꑠꁬꌌꄉꇈꈻꀊꎳꀉꒉꃅꄺꂴꆽꇬꆼꍅꄉꌠꉬꅊꇈ。ꈨꏀꁱꇐꈯꄔꇬꆹꎺꋦꁧꑎꑤꑤꊈꎼꏹꐛꆪꏁꐂꌋꆀꑤꍈꀉꋶꃄꑗꑌꅿꎖꏦꈴꌠꊨꏦꁱꒌꑍꁬꄻꇬꄀꎻꇁꇈ，ꁱꒌꇬꌟꒉꑍꂷꌠꆹꈍꃅꇧꀱꋦꇈꊋꌗꐛꄟꆹꀉꇨꌠꉬꀐ。ꑍꄜꄯꒉꉜꊿꀘꊿꈨꌠꆹꈍꃅꑋꑓꇙꀕꇈꈝꐯꃅ，ꄚꁱꒌꋋꑍꁬꇬꄉꈛꎂꏿꃅꃄꁕꋋꁕꌠꅿꎆꏣꇇꇐꆹꀉꇨꃅꌄꆣꌢꈚꐝꄿꇁꌠꊌꂿꄎꌠꉬꀐꅊꇈ。

ꋋꆹꌌꇁꋍꋬꈭꉻꑫꃅꄛꇰꌠꈨꏀꁱꇐꉘꃀꁬꌠꉬ，ꏓꇱꄉꎺꋦꁧꑎꑤꅿꎆꏣꇇꇐꀻꎆꆹꌠꃆꂮꌌꀑꐳꃅꄛꇰꌐꌠꉬꀐ。ꂓꄀꄉꌠꆏꉪꀨꎹꏹꍓꃬꎔꀈꆺ，ꌶꎖꌷꌺꈀꄸ、ꈀꄸꏤ，ꉬꇮꃅꈨꑭꃅꐨꅿꏹꍓꉬꌐ。ꃷꐕꃮꌺꆹꇯꍝꃅꉌꂵꇿꌊꋰꀋꄐꌠꉬꀐ。ꄚꊼꇅꐜꅖꀋꇎꀋꂪꌠꆏꀊꄶꂱꑱꑣꍔꊐꌠꇬꃼꌊꄉꉜꌠꑍꄜꄯꒉꆹ，ꉬꇮꃅꄈꅿꑍꄜꄯꒉꈨꌠꀉꄂꉬꌐꅊꇈ，ꃅꐨꑍꄜꄯꒉꆹꍔꄨꊇꇬꀉꄂꋍꁬꃼꌊꄉꉜꑲꆏ，ꀉꁁꆹꈍꃅꎹꇬꂯꋍꁬꎹꅉꀋꊌꌠꉬꅊꇈ。

ꀉꐩꃅꆜꆹꐪꊛꄉꉉꇬ，ꑤꊈꄜꉺꀯꆹꁱꐘꃑꄉꅇꁵꎻꇁꇬ，ꉪꊇꁳꊫꃛꄮꋋꇅꇬꆹ，ꑣꍔꂷꈁꐛꅉꃅꃅꐨꑍꄜꄯꒉꁬꌠꃼꄉꉜꌐꄷꅇꇰꎼꇁꀐ，ꑬꆏꊂꂷꌠꇬꅑꅷꁧꌠꆏ，ꑤꎭꈴꏳꆹꁦꎆꃅꃅꐨꑍꄜꄯꒉꑍꁬꌌꇁꂱꑱꑣꍔꍔꃚꈨꌠꇬꁵꇁꌐꌠꉬꄷ。

ꃷꐕꃮꌺꆹꉌꂵꇿꐮꇿꃅꄆꅇꏢꅥꇁꑤꍰꇬꐥꇈꌠꌷꐋꈨꌠꁵꂿꄷꊭꄎꄉꀐ，ꄚꇇꌭꄆꅇꃚꋏꌐꂷꈨꌠꆹꀊꅰꀋꉾꐛꅹ，ꋋꇅꃅꀥꌊꍔꃚꀃꈈꂴꆽꄇꈜꏢꁮꇬꉆꄉLCꌌꄉꋍꏅꌬꌠꄆꅇꅥꀐ。ꋋꆹꐞꍀꑕꑘꌋꆀꌧꈿꄮꈉꄉꆹꀊꎳꌐꌠꉬ，ꐞꍀꑕꑘꆹꃥꈿꅉꀀꅉꁨꌠꇬꄉꄆꅇꅥꀱꉈꑴꎻꇁꌦꌠꉬ，ꄆꅇꅥꁌꆹꃥꈿꅉꇬꀵꌠꉬꐛꅹ，ꋍꑊꆹꈮꇁꈜꅉꄹꀅꌳꀅꌳꃅꌧꈿꅷꀋꑟꅉꀋꐥꀐ。ꐞꍀꑕꑘꉉꇬꆹꈀꄸꈀꄸꆹꁱꀐ，ꑡꑣꈨꁱꄉꀐ，ꑬꆏꊂꂷꌠꇬꆏꑍꄜꄯꒉꇬꅑꇁꄷꉉꅷꐺ。

ꃷꐕꃮꌺꑋꄡꇗꈬꉘꃅꄷꍶꑿꉘꉚꃆꂮꈨꏀꄛꇰꑠꁬꁱꄉꇈ，ꋋꆹꄆꅇꅥꇁꃬꎔꀈꆺꁵꇈꉉꇫꇰꀐ，ꈊꍬꋠꌐꈭꐨꆏꍔꍈꄰꅍꄉꀉꒆꅉꃅꌡꎭꍝꁵꃑꇁꑍꄜꎹꇬꁵꂿꄷ。ꃬꎔꀈꆺꆹꀋꃉꆏꉈꀱꌜꍰꇓꈓꇬꑟꇁꀐ，ꃷꐕꃮꌺꆹꋋꏮꈨꏀꁱꇐꁬꌠꉜꌐꈭꐨꆏꌌꊼꇅꀋꋽꌠꇇꄻꃅꄉꄺꀱꄸꇈ，ꄷꀋꁧꉘꇉꌠꆏꊨꏦꁱꄉꌠꈨꏀꆹ，ꉆꐥꃅꄺꑍꄜꄯꒉꇬꄀꎼꇁꄉꊨꏦꑴꅉꊌꂾꄎꑞꉂꌠꌤꃆꍈꌠꉬ。

ꋋꊂꃄꐎꈍꑋꑍꌠꈯꄔꇬꆹ，ꃷꐕꃮꌺꆹꐪꊛꄉꀉꐩꃅꆜꌋꆀꐮꐊꄉꃹꅶꃅꇁꌊꑘꃅꁡꇤꑟꆹꇈ，ꋂꂷꈁꐛꅉꇬꃅꆹꇈꌌꇁꅲꁱꌐꌠꃅꀐ。ꂿꑘꊿꅿꇎꏦꆹꇯꍝꃅꊽꒌꉪꅉꈯꄔꈐꏭꀋꋌꃅꊼꇅꀋꉾꀋꃪꑴꌦ，ꅫꏻꀕꌠꊖꁋꑳꇬꀀꇈ，ꇁꌊꑱꈐꑞꇁꄷꆏ，ꊖꋒꌋꆀꀉꁁꅾꉘꀋꌒꑠꆹꀋꆏꃅꇁꌊꊽꅳꁖꇬꃹꇁꇬꎷꄉ，ꊿꋌꌌꏢꌉꅲꌉꀙꐮꀙꌠꉬ。ꃀꌠꌋꆀꀉꑳꌺꑠꈚꐺꌠꃢꈜꑠꆹꄮꐰꐥꃅꀋꐛꌐ，ꃅꈎꋍꈓꇖꄮꐰꌠꃅꈀꉬꆏꃢꈜꑍꈬꌙꈬꀉꄂꐥꌐꇈ，ꆈꌠꇐꀳꇬꌟꃅꀃꃀꃱꏬꉼꍶꑆꇇꋩꉼꌐꌠꉬꅊꇈ。

ꃷꐕꃮꌺꆹꊨꏦꇭꀧꐣꁙꇫꄉꎆꃀꉬꉐꂷꌠꋋꇱꁸꇁꊼꇅꌢꎭꑴꌦꌠꑶꋦꈍꑌꁯꌠꁵꇬꎭꀐ。ꀉꐩꃅꆜꆹꇬꇉꁨꐞꄑꄉꉉꇬ，ꇌꄙꍔꆹꁦꀮꁧꀮꇁꐯꊛꎍꌐ，ꊾꂷꌠꐽꏡꃅꇬꆹꃄꅉꑍꂿꎖꀋꊌꑠꈚꉬ。ꀋꉊꂴꆽꃅꋊꇬꆹꇯꍝꃅꑭꅑꇌꄙꍔꁦꀑꂷꌠꈋꉈꐂꀋꋻꇈ，ꃀꀋꌠꃅꑊꑆꍕꌐꇈꑓꅑꑓꀋꂿ（ꉌꈲꁱꂷꀋꌧꌠꄜ）ꑠꈚꉬ，ꀋꃉꀃꑍꆏꇩꏤꏦꃤꇗꅉꁆꅉꉾꃪꇈꂿꑘꊿꆹꊋꒉꌠꆏꇓꈓꑠꇬꄉꊋꃅꎆꎹꁧꌐꇈ，ꑠꃅꄉꋀꊇꅿꐥꐨꐥꄷꆹꋍꑍꋍꉙꃅꉾꃪꆹꌐꐛꅹ，ꑶꋦꉹꁌꆹꌢꈚꈝꃀꐥꌒꄻꌒꌠꇬꍬꆹꌐꀐ。

ꃷꐕꃮꌺꆹꈝꃀꈪꄉꀉꐩꃅꆜꌋꆀꋓꄉꌗꏿꇈꉉꇬ，ꉡꉜꇬꆹꀋꎪꀋꑴꃅꄚꉹꁌꐥꐨꐥꄷꃆꂮꑠꃶꐚꐨꐥꌠꈨꏀꑠꍈꁱꄡꑟꋭꌠꉬ。ꀉꐩꃅꆜꆹꏭꇁꑶꇽꁡꇤꇬꉹꁌꀀꑳꈨꌠꉜꄉꇈ，ꀅꌳꌺꃅꌗꇬꊼꇅꏂꇈꉉꇬ，ꋋꈨꆹꇯꍝꃅꆎꇬꀋꌧꌠꉬꀐ。ꃷꐕꃮꌺꐪꊛꄉꉉꇬ，ꃶꐚꐛꐪꃆꂮꄛꑣꁱꎻꇁꇬꆹꌌꇁꄜꉺꌠꀋꉬꄷꌠꅀꄷ。ꀉꐩꃅꆜꆹꁱꀋꐭꇈ，ꀂꏾꈎꄉꈝꃀꋍꐕꈛꎼꈭꐨꑳꆀ，ꋋꇅꃅꉉꇬ，ꌟꒉꏲꌋꆹꋍꅿꏲꌋꏢꁈꐥꌐꌠꉬ。ꉈꑴꉉꄷꇬꑌ，ꈨꏀꌤꃆꆹꉡꈍꑋꈓꃅꀐ，ꋋꆹꉢꇬꐝꉅꂥꀘꌐꌠꉬ。

ꃄꐎꈍꑋꑍꅑꅷꇁꇬꆏ，ꋍꑍꇀꅉꀕꃅꇁꌊꂵꆤꈍꉐꄮꈉꇖꂷꇅꌠꇬꀑꂪꑞꄮꇬꆏ，ꃷꐕꃮꌺꆹꇁꌊꍔꃚꄇꃀꂴꆽꐏꉆꄉꇈ，ꌞꎭꊿꂷꌠꑍꄜꄯꒉꌞꎭꌊꇁꌠꇁꉚꇬꎷꅷꇁ。ꑍꄜꄯꒉꆹꌞꌌꇬꑟꇁꇬꎷꑴꇬ，ꄚꑠꃅꑴꇬꊝꇉꀕꃅꆏꈭꋍꂷꌠꇬꆹ，ꃅꐨꑍꄜꄯꒉꇬꆹꎺꋦꁧꑎꑤꅿꈨꅇꃆꂮꆹꇬꅑꇁꊌꀋꂿꇬꎷꀐ。ꃷꐕꃮꌺꁱꄉꌠꈨꏀꁱꇐꀊꋨꁬꑋꄡꇗꑭꐪꁖꇤꍈꂯꊌꀋꂿꆙꅜꀐ。ꃷꐕꃮꌺꆹꄚꇬꍬꄉꉌꋲꀕꇈꉌꀋꒊꌊꉪꄅꏿꌐꇁꀋꉆꃅꎌꇁꀐ。ꈀꄸꑌꋓꄉꍔꃚꋙꃅꑳꇬꄉꋚꋠꌐꐛꅹ，ꋋꈍꑋꑍꆹꉬꇮꃅꌤꃆꋋꐘꊂꌌꇁꈋꍣꉉꅍꐥꌊꆏꌐꇁꀋꉆꃅꎍꇬꎷ。

ꑠꅹ，ꍔꍈꂷꌠꆹꋰꀋꄐꃅꄆꅇꏡꅥꇁꌟꒉꂷꅿꂱꎼꂷꌠꁵꄉꌌꀒꅲꑟꀐ，ꉐꑴ，ꈍꃅꎼꌠꉬꀋ，ꐛꆪꎼꏹꌋꆀꀉꋶꑤꍈꑋꀉꄂꑊꑍꇬꊼꇅꅔꁖꌠꀦꇁꈭꐨꆏ，ꈍꃅꄉꊁꈨꌠꆹꑞꃅꐪꊛꄉꐜꀋꈨꆙꅜꌐꌠꉬꇆꄷ？ꑤꇬꂱꎼꂷꌠꑋꄡꇗꊨꄅꐝꉅꌊꉾꃅꇬꅇꀋꀱꃅ，ꁭꎐꈨꑌꌊꊿꋋꅲꐝꀋꉅꇈꀋꇊꆏꑠꃅꉉꌠꌡ，ꄩꏯꊐꌠꌟꒉꏲꌋꅿꌤꃆꑠꆹꆍꊈꇬꄡꅲꇬꄡꏲꇆꄷ。

ꃷꐕꃮꌺꋀꊇꆹꊼꇅꃮꀀꀧꌗꁖꂷꀋꏭꉌꊰꊋꊰꇁꌐꀐ。ꂱꑱꑣꍔꇫꄉꅲꁱꐺꌠꌷꐋꈨꌠꆹꈀꄸꑌ，ꄆꅇꅥꌊꐮꁴꄉꄚꌤꃆꋋꐘꇬꅲꇫꌐꇈ，ꈀꄸꂷꑋꇬꉉꐝꉅꂥꀘꀋꄐꌐ。ꑠꅹꈀꄸꑌꋍꑍꇀꅉꀕꃅꈉꊸꃅꑍꄜꄯꒉꈨꌠꇁꉚꎍꇬꎷ。

ꃘ

ꀋꃅꆹꀱꉈꑴꄉꃬꎔꀈꆺꂷꌠꃆꂮꊼꇅꉉꇁꉜꐋꊈꇰꄡꑟꀐ。ꇯꍝꃅꌤꃆꆹꋍꍈꂯꆏꇁꌊꊽꉌꂵꉪꅉꄉꅉꇬꑟꇁꉆꌠꌟꃅꁣꀋꐥꃅꀋꐛꌐꌠꉬꅊꇈ。ꈨꑭꃅꐨꅿꋍꉻꑫꋬꈭꃅꄛꇰꌠꉘꃀꃢꌠꄺꇁꑍꄜꄯꒉꇬꄀꎼꇁꈭꐨꆏ，ꄚꈀꄸꑌꈬꑍꈬꄅꀕ、ꊯꊪꑍꄀꄃꃅꉪꇬꀋꑟꇈꊨꉈꊨꁖꇈꊋꋠꊜꊋꌠꌤꃆꐘꅐꀐ。ꀊꋨꄹꉈꂵꆤꈍꐯ，ꃅꐨꑍꄜꎹꏓꄻꊥꃀꌤꃅꅉꇬꆹꄆꅇꊪꇖꂾꇁꇈ，ꐚꅪꆿꆉꆹꋍꎳꉘꀋꇉꃅꌜꈨꏀꅏꄻꏳꇬꅥꎻꇁꌠꄆꅇꂷꊩꊌꀐ。ꀊꄶꊿꇬꋒꀋꌧꇈꏦꒉꋦꌠꃚꁙꃚꋒꉉꌠꊿꑠꂷꆹ，ꅇꂷꇣꇁꏦꆽꇈꅇꁵꌠꌟꃅꐚꅪꆿꆉꏭꉆꐥꃅꐙꀥꏿꄉꈨꏀꅏꄻꏳꇬꋍꏮꇁꄷꉉꀐ。

ꐚꅪꆿꆉꆹꂴꌌꉪꇁꇬꆏ，ꈍꃅꑋꎺꋦꁧꑎꑤꅿꄛꇰꌠꆹꃆꐆꑘꐆꐘꌠꉬꀐ，ꑠꅹꋋꆹꋋꇅꃅꊿꀊꋨꂷꅿꅇꃅꄉꉥꑣꌺꃅꇁꌊꌜꈨꏀꅏꄻꏳꇬꑟꇁꇈ，ꄚꃆꂮꐥꌠꆽꎍꊿꀊꋨꂷꌠꆹꇁꌊꃃꋤꀕꃅꋍꇬꌤꃆꀕꂮꉉꌐꈭꐨꆏ，ꐚꅪꆿꆉꆹꄡꇗꀱꑍꄜꎹꇬꀋꇁꃅ，ꈛꎂꃅꋋꀱꋍꀂꇬꉜꄉꁧꀐ。

ꂵꆤꈍꐯ，ꃅꐨꑍꄜꎹꏓꄻꊥꃀꌤꃅꅉꈚꌠꆹꄡꇗꈢꇯꏢꀕꃅꄉꇈꊿꂷꑌꇬꀋꐥ。ꃬꎔꀈꆺꆹꅞꇁꏓꄻꊥꃀꌤꃅꅉꇬꎭꃔꈇꑌꅍꈨꌠꄩꑌꄉ，ꇁꉚꅷꁯꋒꐯꉐꄮꈉꇖꉬꂷꇅꌠꇬꑟꈭꐨꑳꆀ，ꇇꌭꄆꅇꏡꅥꇁꐚꅪꆿꆉꄰꀂꇬꊿꈨꌠꅲꇈ，ꋍꀂꇬꊿꈨꌠꉉꇬꆹꐚꅪꆿꆉꆹꎇꇁꀊꄶꀀꈤꄩꀀꄉꀀꑌꇴꑴꌦꄷ。ꎇꃀꀈꃀꒉꀋꑭ、ꊾꂿꃀꌠꁌꀋꐥ，ꌦꇁꂯꇬꑋꄡꇗꀀꃅꀀꇎꇁꀋꉆꇬꎷ。ꃶꐚꃅꑡꌤꃆꐥꌠꆹꄡꇗꈍꃅꑋꊼꇅꌌꇁꉪꊇꇬꌗꋏꄡꑟꌠꉬ。

ꃄꐎꈍꑋꑍꐛꈭꐨꑳꆀ，ꐚꅪꆿꆉꂷꌠꆹꅐꉈꏮꁖꇁꌠꉬ。ꑡꃆꂮꉬꌠꉡꁴꃀꀉꒉꂷꈿꄉꑳꆀꉉꇁꄜꃑꈀꄸꑌꇰꌐꄷꌠꅀ，ꉬꇮꃅꈀꅑꆏꅑꌐꌠꉬ，ꌤꃅꆿꃅꇬꆹꄮꈉꌗꄉꃅꑲꀋꌧ。ꆎꆹꏟꈯꀕꃅꀋꑍꊂꋋꊭꇬꍏꑷꊐꌠꑍꄜꄯꒉꑠꊼꇅꁏꃑꄉꉜꉏ，ꇯꍝꃅꅇꌐꆲꃚꇨꐯꇨꌐꌠꉬ，ꇿꇬꑌꋓꄉꀊꐯꈭꃅꅺꇰꐛꐪꃅꐺꌠꊨꀖꀠꂘꐺꌐꀐ。ꀊꅰꃅꊜꀋꋽꌠꆏ，ꂴꆽꄹꉖꌠꆏꍏꑷꄆꁱꃑꅉ“ꏓꈌꅲꇫꅇꉉ”ꌟꆹꋋꈨꏭꊨꏈꌐꄷꌦꆏ，ꊂꄹꉈꌠꆏꉪꊇꅿꑍꄜꄯꒉꆹꎺꋦꁧꑎꑤꃆꂮꄜꇯꌠꄻꃑꇬꄀꎻꇁꀐ。ꇯꍝꃅꑠꃅꄉꊽꒊꅍꐥꌠꌤꃆꑠꆹ，ꆎꉜꇬꉠꀑꑊꆹꌌꇿꇬꄉꂁꉱꄉꁧꉆꂯꀋ。

ꃬꎔꀈꆺꉉꇬꆏꀊꅰꃅꑠꃅꆹꀙꀋꃚꄿꇆ？ꐚꅪꆿꆉꆹꈁꑓꆈꌊꆈꃅꆈꏸꀕꃅꉉꇬ，ꊼꇅꄺꊛꄉꄡꃅꀕꆏꄉꄷ。

ꃬꎔꀈꆺꆹꄡꇗꏡꁈꆹꀋꐥꌠꉬꀐ，ꋍꉌꂵꈐꏭꄉꏸꏦꃬꑐꋦꄷꑠꇬꊨꏈꇈ，ꉡꂷꌠꆏꄹꆷꌊꐳꈌꉇꈌꇬꉆꄉꈭꐨꆏ，ꅽꊨꏦꆹꂁꍃꇁꀊꄶꊂꆈꏭꀀꄉꇈꀑꐕꆹꀋꀬꌠꀌꀠꎭꉻꂷꄻ。

7ꆪ18ꑍꂵꆤꈍꐯ，ꎺꋦꁧꑎꑤꍔꃚꌤꀞꅉꈚꌠꆹꄆꅇꅥꇁ，ꂱꑱꑣꍔꇬꄉꅲꁱꐺꌠꌷꐋꊇꈨꌠꏭꅇꇰꇬ，ꋋꄹꉈꁯꋒꐯꉐꆏ，ꈀꄸꑌꑤꍰꇓꈓꃥꈿꅉꇬꉜꄉꇁꌐꄷꅇꇰꄉꉉꇬ，ꀃꂰꈊꃀꄮꇬꆹꃀꀋꉬꀋꉆꑠꂷꈿꂿꄷ，ꈀꄸꑌꀋꇁꀋꉆꌐꄷꀠꎻꒉꌐꀐ。

ꇁꉚꅷꁯꋒꐯꉐꄮꈉꉬꂷꀉꁁꇅꌠꑟꄮꇬꆏ，ꌷꐋꊇꆹꉬꇮꋓꃅꆳꎟꈛꄜꃅꂱꑱꑣꍔꇬꄉꀱꇁꌐꀐꐛꅹ，ꋍꂷꈀꋒꀕꃅꈁꑓꇬꄉꉜꎼꇁꇬꆹ，ꊼꇅꐙꄏꁁꄏꌊꐺꌐꌠꉬ。ꄹꁆꆏꌒꇍꍯꂂꇓꌕꂷꅑꌠꑋꄉꀱꇁꌠꐊ，ꄹꁆꆏꋍꉻꃥꑌꐕꍯꑋꄉꀱꇁꌠꐊ，ꅺꌡꇬꃷꐕꃮꌺꂷꌠꆹꈝꃀꈪꄉꐕꍯꈍꑌꑵꃅꌌꏭꆦꄉꀱꇁꌠꉬꐛꅹ，ꇁꌊꃥꈿꅉꇬꑞꇁꄮꇬꆏ，ꈍꄮꇯꆐꐙꄏꁁꄏꌊꀙꐯꀙꃅꎌꌠꉬꀐ。

ꈀꄸꑌꇁꐮꂿꌐꄮꇬꆏ，ꋍꂷꋒꀋꋒꃅꃄꊸꇱꆗꌊꈁꑓꂷꌠꆹꈣꐚꐆꃅꐛꌐꇈꆈꃅꆈꏸꀕꌐꀐꅊꇈ。ꄚꈐꏮꌋꅪꌷꐋꑍꂷꅿꀍꑐꇤꌠꆹꒉꋌꐜꐛꅹꊼꇅꂯꒊꅑꂮꅑꌐꇈ，ꀋꉊꂴꒉꌶꅉꇬꐥꄮꇬꀋꏭꃅꁨꐞꄑꇈꊿꋌꁭꃅꀋꎍꀐ。ꈀꄸꑌꋓꄉꇁꌊꃥꈿꅉꄇꄤꈐꏭꉆꄉꌧꈿꁉꈿꐺꌐꇱꀋꏦꃅꎌ，ꇁꌊꀊꄶꇬꉆꄉꃥꈿꅉꁧꃤꃄꅉꁳꀀꅉꄐꁆꄐꁸꌠꇁꉚꎍꌐꌠꉬ。ꃷꐕꃮꌺꆹꇁꌊꄚꇬꑞꇁꄷꌦꆏ，ꈛꎂꃅꇁꌊꑳꌕꊐꌠꇬꄉꐞꍀꑕꑘꎹꆹꀐ，ꄚꐞꍀꑕꑘꏤꀀꌠꑳꁨꌠꅿꀃꈈꆹꈢꇯꃅꇰꏢꀕꃅꎌ。ꋋꆹꄡꇗꀱꇁꌊꃥꈿꅉꄇꄤꇬꉜꄉꇁꌦꇈ，ꄚꄡꇗꐞꍀꑕꑘꂷꌠꆹꊌꀋꂿꑴꌦꐛꅹ，ꋍꉌꂵꈐꏭꆹꊼꇅꀋꆏꃅꀋꎪꀋꑴꎌꅉꎍꃅꀋꐛꇁꀐ。

ꋍꈪꌺꐛꈭꐨꆏ，ꎺꋦꁧꑎꑤꍔꃚꎭꂵꂱꎼꂷꌠꆹ，ꇵꏂꇳꆐꏦꄹꇁꌊꄚꃥꈿꅉꇬꑞꇁꀐ，ꋋꆹꇁꌊꃥꈿꅉꄇꄤꇬꃹꄷꆏ，ꈮꈜꇈꀋꆷꃛꃅꇁꌊꌷꐋꊇꌋꆀꐮꇇꉩꐺꌐꇈ，ꒈꌦꀕꃅꉉꇬꆍꊇꆹꎭꏿꀙꀐꄹꉉꇱꀋꏦꃅꎌ。ꀀꅉꈨꌠꄐꁆꄐꁸꄉꌐꈭꐨꆏ，ꈀꄸꑌꂱꑱꊨꏦꃢꈜꑠꆹꒃꌊꂱꑱꀀꅉꇬꉜꄉꆹꌐꀐ。ꎭꂵꂱꎼꆹꑖꈈꀕꃅꐪꊛꄉꉉꇬ，ꈀꄸꑌꂱꑱꀀꅉꇬꄉꀂꏾꊼꇅꀬ、ꈁꑓꊼꇅꋌꇈ，ꄮꈉꊰꃏꂷꐛꈭꐨꆏ，ꀋꎪꃅꇁꌊꃥꈿꅉꁧꃤꃄꅉꄇꃀꂴꆽꄉꐯꏑꇁꌐ，ꐕꍯꆍꊇꋩꌊꀊꁁꑠꈚꇬꄉꈊꍫꋠꁧꂿꄷ。

ꃷꐕꃮꌺꆹꊨꏦꎊꈬꈨꌠꄺꇁꊨꏦꀀꑳꁨꌠꇬꅞꄉꈭꐨꆏ，ꋋꆹꄚꆎꄮꈉꋌꍈꌌꄉ，ꉈꑴꋍꃢꀥꌊꀊꄶꑳꌕꊐꌠꇬꐞꍀꑕꑘꏤꀀꁨꌠꇬꑞꇁꌦꇈ，ꐞꍀꑕꑘꌋꆀꐮꐊꄉꀀꌠꌋꅪꌶꌺꈨꌠꆹ，ꈀꄸꑌꋓꄉꇬꊎꈊꍫꋠꌠꎁꃅꀑꄻꑊꄻꅷꀋꆷꃛꃅꐺꌐꌠꉬꅊꇈ。ꄚꈐꏮꌋꅪꌷꐋꋍꂷꉉꇬꆏ，ꐞꍀꑕꑘꆹꉘꀋꇉꃅ，ꊸꇨꌊꐀꆐꌸꇈ，ꂵꆤꈍꐯꆹꑅꎸꀉꂥꃅꊸꐛꅹ，ꀋꃅꆹꆅꉁꅉꇬꄉꄈꒉꊐꁧꀐ，ꀃꌐꊀꈊꃀꄮꈉꏃꂷꉆꂷꇅꌠꄮꇬꆏꀱꇁꄎꌠꉬꄷꉉ。ꃷꐕꃮꌺꅿꉌꂵꈐꏭꆹꄚꍬꄉꊼꇅꈥꇊꏢꆹꌊꈥꇤꀕꃅꎍꇁꀐ。

ꄮꈉꊰꃏꂷꐛꈭꐨꆏ，ꃥꑌꐕꍯꎔꌋꄞꅐꑠꇷꆹꇁꌊꆎꀊꄶꃥꈿꅉꄇꂿꏡꁮꇬꅞꄉꀐꅊꇈ。ꉈꑴꀉꁁꋍꇷꆹꌐꄉꀉꋶꃄꑗꑤꍈꑋꌠꃖꄠꑪꑸꏧꇷꌠꉬ。ꀉꋶꃄꑗꑤꍈꆹꐕꍯꈐꏭꑌꄉꇈ，ꀋꆏꃅꇇꌭꄆꅇꌌꄉꌞꊿꇬꅇꉉꅷꐺ，ꉜꎻꇁꇬꆹꀋꆷꀙꐯꀙꌠꌡ，ꋋꆹꇯꍝꃅꋍꑍꏲꃆꃪꃅꀞꑵꌠꉬꀐ。ꈊꍬꋠꅉꇬꁧꂴꆽꆹ，ꎭꂵꂱꎼꂷꌠꆹꇁꌊꃥꑌꐕꍯꇷꌠꈐꏭꃹꇁꇈ，ꃙꋒꀉꂥꃅꉉꇬ，ꀋꃅꉪꊇꇬꁧꅉꈚꌠꆹ，ꈭꈋꅉꎿꃝꂓꈚꉬꄷ。

ꈭꈋꅉꎿꃝꆹꎺꋦꁧꑎꑤꇬꈩꆫꅉꑠꋍꈚꉬ，ꈭꈋꅉꎿꃝꆹꀇꐒꄩꈊꃀꃷꎏꑠꐥꌐ，ꀊꌃꀕꃅꂱꑱꃅꄷꐛꑆꋦꌠꌊꋚꀉꄂꐥꅉꑠꈚꉬ，ꆍꊇꁨꌋꌊꄚꇬꊼꇅꈌꑟꆹꂿꄷꌠꉬ。ꄽꂫꆏꄡꇗꐪꊛꄉꅲꌦ，ꊿꆹꇁꌐꌒꀐ？ꊿꄹꁆꉉꇬꆹ，ꐞꍀꑕꑘꆏꆅꉁꅉꇬꁧꀐꄸꉉ。ꎭꂵꂱꎼꉉꇬ，ꋋꆹꉢꅉꐚꀐ，ꋋꆹꇬꀋꇁꀐ，ꋋꁴꑖꑣꌺꃅꈍꑋꑍꂷꊼꇅꑬꆏꄉꇫꑌꍑꑴꌠꉬꑴꄷ。

ꐪꊛꄉꌞꌐꄉꌌꀉꋶꃄꑗꑤꍈꑋꌠꃖꄠꑪꑸꏧꇷꌠꆹꂴꆽꐊꄉꇽꏀꎼꆹꀐ，ꐕꍯꈨꌠꆹꑤꍰꇓꈓꄉꁖꇁꈭꐨꆏ，ꁮꐚꁆꏯꉜꄉꁧꀐ，ꃄꎸꄮꐰꈊꃀꄁꏂꄂꅪꈨꌠꆹꀅꌳꀅꌳꃅ，ꇁꌊꀊꄶꊼꇅꆈꃅꋍꃅꎌꌠꁦꀮꇉꀮꈨꌠꄩꌸꉱꎍꌐ。ꈊꆳꆹꀅꌳꀅꌳꃅꁏꇁꊽꈁꑓꇬꌸꇁꇬ，ꈍꃅꁦꉘꀕꇈꆲꌙꀕꃅꎌꌠꉬ。ꃅꏸꈍꑋꂷꆹꇁꌊꀊꄶꀉꂥꇈꈜꎳꅉꇬꐛꎍꌠ，ꁦꀮꇉꀮꈨꌠꄩꄉꏹꌬꏷꌬꃅꊽꑓꐛꈌꐛꇁꇬꎷꌠꉬꀐ。ꋍꈪꌺꐛꇬꆏꇁꌊꑤꍰꇓꈓꌋꆀꉺꆏꏃꂷꉆꂷꇢꅉꇬꐛꌠꈭꈋꅉꎿꃝꇬꑞꇁꀐ。

ꈭꈋꅉꎿꃝꆹꈬꉘꃅꄷꋍꐛꋌꐙꃅꐛꇈꌠꎿꃝꂷꉬ，ꀊꄶꎿꃝꈯꄔꇬꄉꁦꌺꈍꑋꊰꂷꋉꐛꄚꅞꄉꇈ，ꎿꈯꇬꁦꌺꈨꌠꆹꉬꇮꃅꂪꌦꀉꅪꌌꉱꄉꌠꁁꑳꋉꐛꃅꄉꌐ，ꉜꎼꇁꇬꀋꇊꆏꋍꉎꀋꐥꃅꐥꌒꀀꌒꌠꎿꄩꐥꌒꁍꑠꈚꌡ。ꊼꇅꈜꎳꎼꎿꃝꄩꆹ，ꆳꂾꇉꑳꌺꑠꀉꑌꄺꀊꄶꄩꅞꄉꌐ，ꆳꂾꇉꑳꌺꀊꋨꈨꆹꀉꅪꌠꐊ，ꀉꏂꌠꌋꆀꀉꃴꌠꑌꐊꑴꌦ。ꆳꂾꇉꑳꌺꀃꈈꈧꌠꆹ，ꉬꇮꃅꈢꇯꏢꀕꃅꄉꌐ，ꑲꒌꇂꃴꆹꄆꄒꂷꇭꀉꅪꌠꄺꇬꄔꇬꄀꄉꐛꅹ，ꉜꎼꇁꇬꊼꇅꂵꇖꀕꃅꐚꇈꊽꉌꐡꑓꇗꌠꉁꄟꍈꂯꀵꐺꌠꉬ。ꃷꐕꃮꌺꆹꑓꋪꏭꇬꊼꇅꉜꄷꆏꋋꉜꐝꉅꀐ，ꋋꆹꀊꋨꄹꉖꈊꃀꐞꍀꑕꑘꌋꆀꀊꄶꃥꈿꅉꄇꋒꄩꉆꄉꊌꂿꌠꆳꂾꇉꑳꌺꀊꋨꈨꉬꅊꇈ。ꃷꐕꃮꌺꆹꋌꐛꋍꃅꐙꃅꀊꄶꆳꂾꇉꑳꌺꇷꌠꅿꌬꍩꌋꆀꐊꇐꆹꋋꅉꐚꌐꌠꉬꀐ。

ꈭꈋꅉꎿꃝꈊꃀꃷꎏꈚꌠꇬꆹꇯꍝꃅꈍꃅꊿꋧꇈꈩꌒꀜꌒꃅꎌꌠꉬ。ꎾꋯꆹꋍꑟꋍꑵꐕꍯꑠꌐꃅꌐꀋꉆꃅꆎꀊꄶꇬꅞꄉꌐ，ꎿꃝꈯꄔꇬꁦꌺꂷꈁꐛꅉꃅꄹꃥꐛꈴꌐ，ꊿꒈꃚꏈꃚꆹꎓꁨꄹꆎꇁꀋꉆꃅꎌꇈ，ꀋꇊꆏꄆꒌꈐꏭꄉꑆꊋꀮꎁꋚꋠꃀꈿꌠꀋꏭꎍꄉ，ꄷꀋꁧꇊꆏꉜꉚꋯꀋꂿꃅꎍꌐꌠꉬꅊꇈ。

ꏹꍓꀊꏀꋋꁥꆹꇁꌊꄚꈐꏭꁦꀮꋍꂷꄩꑟꇁꀐ，ꋋꆹꑤꍔꃚꅿꌋꏤꄉꌌꃥꌵꅉꑠꈚꉬꅊꇈ。

ꋚꋠꄜꈍꑍꂷꌌꇁꎆꇌꃅꄺꀊꄶꇬꅞꄉꈭꐨꆏ，ꂴꆽꇫꂿꇬꐛꑆꋦꌠꋂꄮꆹ“ꉛꀂꏾꄔꇉꆼꋠ”ꑵꌠꉬꀐ。ꃅꎸꊷꄮꄔꇉꆼꋠꌠꋠꇈ，ꌿꎧꒉꈺꄂꀕꑵꌠꅜꇬꆹ，ꇯꍝꃅꐋꀋꌡꇈꈍꃅꊽꉌꇿꑓꇿꌠꌤꃆꐘꉬꀐ。

ꀉꋶꃄꑗꑤꍈꆹꋚꋠꂾꂴꆽꆏꎧꍔꅝꌠꌌꈈꄹꃥꄐꌠꆈꌠꏦꃤꇬꈴꄉꇈ，ꋍꅿꇓꍔꇬꆹꎧꈈꌊꐛꂨꀕꊐꄉꇈꄌꌊꄓꇬꉆꄉꈭꐨꆏ，ꄎꌬꀕꇈꃅꀹꈨꑴꃅꄉꋍꃢꅇꂷꊱꉉꇈ，ꄽꂫꆏꌷꐋꊇꁥꌠꆹꎭꀋꐒꅦꀋꏦꃅ，ꈀꄸꑌꃹꅶꃅꇁꌊꎺꋦꁧꑎꑤꑬꊂꄉꅲꁱꆹꈨꌠꃆꂮꏭꈀꎭꀕꀐ。ꋋꆹꇯꍝꃅꉘꇉꌠꆏꈀꄸꑌꋓꄉꎺꋦꁧꑎꑤꄕꄒꌠꎁꃅꊊꍈꌗꍈꅐꌐꅊꇈ，ꀃꂰꈊꃀꆹꆍꊇꎭꏿꅧꈠꌠꇬꅲꇫꉌꌒꄀꌠꑠꃢꉬ。ꉡꆹꀊꅰꃅꄉꆍꊇꇬꉘꇉꌠꆏꈀꄸꑌꉌꇿꑓꇿꃅꈩꌒꀜꌒꃅꄉꎧꏸꊼꇅꅝꌐꅊꇈ。ꋬꂻꈨꅪꄺꆍꊇꁵ，ꈀꄸꑌꋓꄉꐮꇰꀒꁨꎧꋍꍔꅝꄷ。ꌷꐋꊈꑌꄡꇗꉬꇮꉉꄺꀋꅐꃅꇓꍔꄌꌊꄓꇬꉆꄉꀉꋶꃄꑗꑤꍈꏭꈀꎭꀕꄷꉉꌐꇈ，ꈀꄸꑌꇵꆹꎇꀉꂥꃅꄉꂱꑱꂴꆽꎌꌠꎧꍔꌠꎵꇁꀃꃀꇬꊐꌐꀐ。

ꀉꋶꃄꑗꑤꍈꆹꆈꌠꏦꃤꇬꈴꄉꎧꌞꎧꈈꌐꈭꐨꆏ，ꌟꒉꀉꁁꑠꈍꑋꑼꌋꆀꐮꐊꄉꐕꍯꏀꇽꌊꁧꀐ。ꋋꆹꎭꂵꂱꎼꇬꄐꌐꄉꉉꇈꇬ，ꆎꆹꄚꇬꄉꏟꈯꀕꃅꌷꐋꊇꁥꌠꐊꄉꐪꊛꄉꎧꅝꎸꋠꄉꇈ，ꀋꎪꃅꋀꊇꁳꄉꈍꃅꑋꌌꉌꇿꑓꇿꈩꌒꀜꌒꃅꈩꎻꅊꇈ。ꎭꂵꂱꎼꆹꀉꋶꃄꑗꑤꍈꅇꅲꌐꈭꐨꆏ，ꋋꆹꋋꇅꃅꆧꁨꎇꌊꄉꈭꐨꆏ，ꇇꈌꇙꌊꄉ，ꃅꀹꈨꑴꌊꀋꆏꃅꎧꌞꎧꈈꇁꌷꐋꊇꁥꌠꄐꇱꀋꏦꃅꎌꇬꎷ。ꌷꐋꊇꑋꄡꇗꉉꄺꀋꅐꃅꎧꌞꎧꈈꀱꇁꎭꂵꂱꎼꌋꆀꌷꐋꈨꌠꄐꌐꀐ。ꋋꄹꉖꈀꄸꑌꎧꅝꄉꈩꌒꃅꈩꅷꈊꃀꄮꈉꊯꊪꂷꎖꄮꇬꑟ，ꎧꀉꄂꅝꌠꇯꀋꉬꃅ，ꊁꆏꑵꉙꑌꑵꁧ，ꑵꉙꑵꌐꈭꐨꆏ，ꄡꇗꊛꄉꎷꃚꑌꃪꋠꁦꌦꀐ，ꁦꀮꋋꂷꆹꄚꄉꇯꍝꃅꐈꇁꋀꊇꅿꃅꈋꃄꇁꏅꌠꈩꌒꁍꐛꀐꌠꉬꅊꇈ。

ꎧꌞꎧꅝꄮꇬꆏ，ꈀꄸꑌꀋꇊꆏꇁꌊꉌꂵꈐꇬꄉꋓꉪꁨꌠꆏ，ꉉꄷꀋꅐꃅꀊꄶꈜꎳꅉꇬꐛꎌꌠꆳꂾꇉꑳꌺꈨꌠꉬꌐꀐ。ꆳꂾꇉꑳꌺꈨꌠꈐꏭꄆꄒꂷꇭꑵꌠꆹ，ꀋꆏꃅꋓꄉꄔꎼꆹꌠꆹꋀꊇꇱꊌꂿꌐꄮꇬꆏ，ꀊꄶꇬꆹꄇꄜꀋꋊꇈꊼꇅꊷꆣꀕꌊꉂꑟꅑꌠꄆꄒꂷꇭꁨꑭꈨꌠꉬꌐꌠꉬꅊꇈ。

ꉌꂵꈐꏮꄉꅇꐚꃶꐚꌠꌌꉉꑳꆏ，ꀊꄶꇬꆹꇯꍝꃅꈍꃅꋽꎔꌠꉬꀐꅊꇈ。ꌋꅪꌶꌺꑠꂷꆹꋍꈯꋋꀋꌅꃅꄉꑠꃅꉉꅷꐺ，ꀊꄶꆳꂾꇉꑳꌺꀉꅪꀊꋨꈨꆹ，ꇯꍝꃅꈍꃅꉜꌒꐮꉜꌒꌐꌠꉬ。ꎭꂵꂱꎼꉉꇬꆏ，ꀊꄶꀊꋨꈨꆹꆍꊇꇬꀋꌧꌐꌠꉬ，ꉡꆍꏭꉘꇉꌠꆹꈀꄸꑌꇁꄜꑠꇬꄡꉜꌐꅊꇈꄷ。

ꄚꀋꃅꋋꇅꇬꆹꇯꍝꃅꇁꌊꆿꃀꆹꑾꋠꈌꇬ、ꃰꊿꆹꎧꅝꈌꇬꇅꌠꇬꊜꐛꅹ，ꃷꐕꃮꌺꌋꆀꌺꃰꌷꐋꀉꁁꑠꂷꑊꆹ，ꈍꃅꑋꋰꄉꀋꄐꃅꋓꄉꒊꒉꁖꇁꀐꅊꇈ。ꎭꂵꂱꎼꆹꇁꌊꇰꇬꊼꇅꉆꇈ，ꋋꑌꄡꇗꋰꀋꄐꃅꒊꒉꁖꇁꀐ。ꀊꄶꌋꅪꌶꌺꂷꌠꀉꄂꑊꏦꌊꈁꑓꅩꃅꅪꍠꀕꃅꎍꅊꇈ。

ꋀꊇꆹꋓꃅꑬꄒꏿꄉꀱꇁꑤꍰꇓꈓꇬꇁꄮꇬꆏ，ꃷꐕꃮꌺꂷꌠꆹꑓꋪꋰꀋꄐꇈꀋꉜꎴꀕꃅꄉ，ꀋꆏꃅꋋꏭꇁꀊꄶꎿꃝꄩꆳꂾꇉꑳꌺꀊꏀꁨꌠꇬꊼꇅꉜꅷꐺꇈ，ꆳꂾꇉꑳꌺꀊꋨꁨꆹꑳꀊꅪꁨꉬꌠꆹ，ꈍꄮꑋꀋꆏꃅꇁꌊꋍꉌꂵꈐꏭꄉꀋꇊꇬꆏꌐꄀꂷꀕꄻꅷꐺꌠꌡꇬꎷ。

作者简介

阿克鸠射，学名阿克日布，男，彝族，1979年12月生，四川昭觉人，大学文化，中共党员，1999年7月参加工作，历任教师、教导主任、副校长、助理记者、记者、县语委副主任、县委宣传部副部长、县记者站站长、县委外宣办主任、县委宣传部常务副部长，现任昭觉县政协提案委员会主任。

中国作家协会会员、新华社签约摄影师、中国报告文学学会会员、中国少数民族作家学会会员、中国少数民族文学学会会员、中国作家协会第十次全国代表大会代表、第六届全国少数民族文学创作会代表、第十三届全国人大五次会议翻译员、全国政协十三届五次会议翻译员、四川省作家协会第八届、第九届全委会委员、四川省作家协会报告文学委员会委员、四川省作家协会文学工作者职业道德委员会委员、四川省摄影家协会会员、四川省彝学会会员、四川省民族文化影像艺术协会藏羌彝走廊委员会专家委员、博学会士，凉山州申报世界遗产暨非物质文化遗产保护工作专家委员会委员、凉山州第六届文学艺术界委员会委员、凉山州作家协会副主席、凉山州报告文学学会副会长。

作品荣获凉山州“五个一工程”奖、凉山州人民政府第十四届社会科学哲学二等奖、首届李劼人文学奖、首届四川省彝学会山鹰奖，第五届、第八届四川省少数民族文学奖、第十届四川文学奖特别奖、2019四川好书奖、第十五届四川省“五个一工程奖”、四川省人民政府文艺精品奖；2019中国好书、第十二届全国少数民族文学创作报告文学骏马奖、第八届徐迟报告文学奖、中国广播电视大奖；400余次荣获凉山州好新闻奖、四川省报纸副刊作品奖、四川省好新闻奖、中国少数民族好新闻奖、中国地市报好新闻奖、中国农民报优秀副刊、中国城市党报新闻奖一、二、三等奖。

出版长篇小说《雾中情缘》《逐梦彝乡—在索玛花开的地方》，散文集《翻阅生活的注脚》，报告文学《悬崖村》《天梯》，长诗集《阿克鸠射作品选》等14部作品。作品被翻译成英文、俄文、法文、葡萄牙文等21种语言文字在国内外发行发表。在《人民日报》《新华通讯社》《中央广播电视总台》《解放军报》《光明日报》《文艺报》《诗刊》《民族文学》《诗神》《人民画报》《中国摄影报》《民族画报》《人民摄影》《解放日报》《四川日报》《四川画报》等报刊杂志上刊发稿件和图片9000多篇（幅）；作品入选2019年“中国图书对外推广计划”、2020年中宣部对外出版任务类出版项目、2020年、2021年、2022年农家书屋重点图书推荐目录、全国首批“乡村振兴与扶贫扶智”主题出版物书目、2021“农民喜爱的百种图书”、中国新闻出版总署全国农家书屋推荐书目、中国当代作品翻译工程。100余篇小说、诗歌、散文、新闻作品、摄影作品被入选《新时期中国少数民族文学作品选集•彝族卷》《中国少数民族文学作品年度精选•散文卷》《祖国：大凉山向您报告》等20余种文集里出版，10余篇文章入选四川省中小学彝语文教材和中高考试卷。

摄影作品《悬崖村之变》于2018年2月11日、2022年3月6日被习近平总书记欣喜翻阅点赞和现场向习总书记展示。100余次摄影作品向党和国家领导人展示过，20余幅摄影作品入选“伟大的变革——庆祝改革开放40周年大型展览”“伟大历程辉煌成就——庆祝中华人民共和国成立70周年大型成就展”“‘不忘初心、牢记使命’中国共产党历史展览”“奋进新时代”主题成就展等5次全国大型展览和四川省大型展览6次。

先后6次荣获四川省委宣传系统先进个人、四川省文学工作先进个人、四川省作家万千百十先进个人、四川省“突出贡献作家”荣誉，6次荣获凉山州委、州人民政府先进个人，荣获西昌学院特别贡献校友奖，50余次荣获凉山州委宣传部、凉山日报社、昭觉县委、县人民政府先进个人。

其事迹先后被《人民日报》、新华社、中央广播电视总台、《学习强国》平台、《四川日报》等中央、省、州级主流媒体报道，先进事迹入选《向祖国报告：记全国少数民族地区决战决胜脱贫攻坚先进典型人物》出版发行。

分享到：

阿克鸠射||小说《梦落无痕殇依旧选》（初稿）选1—6

阿克鸠射 阿克鸠射de笔记 2024-01-04 21:21 四川

阿克鸠射阿克鸠射de笔记 2024-01-04 21:21