ꅝꇐꊰꑋꑟ   ꅋꒃꈌꄡꊐ

                                 .ꌠꈚꑿꋒ.

   ꆈꌠꇐꀳꇬ:“ꂘꅇꊰꇬꀕꇉꃹꀋꅲ，ꊢꅇꊰꇬꋍꁏꌌꈴꏽ”ꄷꌠꀋꐯꐥꀋꁨ。ꁍꇁꀿꃀꆹꈀꄸꂷꉬꄿꂿ;ꈮꅐꀃꅪꎔꌉꈿꀃꌺꈄꑟꁇ，ꄚ，ꌳꃈꅩꆹꎼꈍꃅꉉꆎꀋꅐꃅꀿꅇꃀꅇꇉꅶꐻꒉꅇꌠꋀꋋꅲꇁꈏꀋꊐ，ꑓꋪꂭꌊꃪꐛꅩꑳꀕꅉꇬꌋꆀꒈꅐꆈꇽꀕꅉꇬꉜꄉꑇꇬꎷ。

   ꈍꑋꈎꂾ，ꆃꎭꃅꄷꏭꊼꇅꐛꀋꒆꇈꊋꋠꄉꒈꅐꒉꂋꃅꐛꌟꆏ;ꂿꃋꑽꃤꊰ，ꃄꅉꑽꏜꋦ，ꆈꌺꉪꑽꏦꑳꐷ，ꐍꌺꉪꑽꅋꒃꈌꇬꊐ，ꆈꃀꉪꑽꐩꊁꀱꐩꏿ，ꐍꃀꉪꑽꇇꉈꐋꊂꈹ。ꅡꈭꆗꌺ꒔ꑽꋋꀱꀵ，ꑗꁧꀗꌺ꒔ꉂꋋꋉꑽ，ꑌꑿꉪꑽꊫꉻꒈꍠꅝ，ꇌꃀꉪꑽꃪꄩꏜꑡꋠ，ꃰꊿꉪꑽꀋꎼꈜꇬꍬꄉꀉꑌꄹꁆꌠꅋꅝ。

   ꋋꆹꃅꋊ1990ꈎꅑꅷꇁꊂ，ꅋꅝꌤ꒧ꆃꎭꃅꄷꄉꁭꁘ，ꁭꁘꐳꐨꆹ꒔ꑍꋍꉙꃅꊿꋋꉮꀙꐯꀙ，ꆃꎭꃅꄷꅐꋺꌠꑞꑵꏭꑌꀋꋌꃅꀥꐳ。ꅋꇐꁭꁘꌠꉮꐪꆹ，ꆃꎭꆈꌠꊨꏦꀻꎆꌠꏭꉮꐪꀉꒉꃅꐥꀐ。ꄂꃅꈭꄲꌺꋒꑌ，ꃄꇖꄹꊂꃰ，꒔ꂷꈜꑽꏼꏂꁻꈜꃹ，ꇉꈬꍀꆿꌺꋒꑌ，ꇉꊂꁮꎹꁮꅝꐺ，꒔ꂷꈜꑽꀖꄲꇉꈜꃹ，ꆎꈱꉢꊏꉡꈱꆏꊏꃅꌠꆗꑮꆜꐂꇁꅋꈜꃹ。ꂴꆏꂱꑱꀁꇬꃤꃢꇔꃢꈜꌋꆀꋛꂷꒈꈄꑠꈐꌊꄉꀠꅝ，ꊁꆏꏣꃀꏣꑟ，ꐋꀨꐡꊈꄷꊏꅰꈺꄉꅝ，ꋍꃢꀋꄿꑍꃢꃅꊏꅰꀋꊌꄮꇫꆏꊿꏭꇑꈐꇁ。ꉪꆈꌠꋋꁯꆹꀃꌋꀊꆨꅑꅷꀃꑍꋋꄮꑟꌠ，ꃬꈐꌟꆏꆼꏻꌦ，ꀉꑐꈐꆏꏂꅩꈬꒀꊒꑵ。ꋋꉬꑴꇬ，ꅋꇐꇁꌊꆃꎭꃅꄷꃹꇈꉈ，ꅋꅝꊿꋍꈨꋋꈨꆹꀑꑊꀋꈁꃅ:ꃬꈐ、ꈌꈐ、ꀉꑐꈐ、ꈎꏅꃮꎸꑠꑞꂿꆏꑞꈐꌠꑌꌐꀋꉆ。ꋋꆹꇭꀧꎷꄜꌋꆀꑱꈐꏭꉮꌠꀉꄂꀋꉬꃅ，ꐧꋦꃅꇐꋋꇱꍍꆀꀙꇈꁍꁇꏦꃤꋋꐆꆘꅝꌐ。

   ꏃꊰꋋꂿꇇꏷꄂ，ꉆꊰꋋꂿꈌꋓꀕ。ꁦꀑꁧꄩꈴꇀꆏꊿꐗꅏꐞꌩꏢꌡ，ꐦꈫꇁꄿꈴꇀꆏꋚꂽꋙꒌꇀꂷꌡ，ꁡꇤꁨꇊꈴꇀꆏꈌꐔꃮꐔꉅꂷꌡ，ꆺꑳꏂꃴꈴꇀꆏꀉꑳꋙꈐꇁꂷꌡ。ꊿ꒔ꃅꐙꑠꆹꂷꍸꂶꑷꅐ，ꌩꋲꌩꐭꅐ，ꀋꐊꌠꀜꅐꁧꈭꐨ;ꁦꀑꎺꁧꄚꄉꆳꌌꊰ，ꆺꑳꀿꂓꄚꄉꌺꌌꊰꀐꌠ。ꈜꀕꇈꌺꄸꀉꂿꍕꇁꑕꅉꃅ，ꌺ꒟ꀉꂿꍔꇁꑋꅉꃅ。ꁦꐛꐯꒈꑌ ，ꌩꋦꐯꀋꑍ，ꊿꐥꐯꒈꑌ，ꐰꇑꐯꀋꒊ。

   ꆃꎭꃅꄷꆈꌠꌺꇖꅋꅝꅋꃔꃆꂮꋋꏢꌌꄉꉉꇁꇬ:ꊿꋋꇰ，ꊽꃨꆰ，ꂮꐚꋚꐙꑌꀋꉬ，ꈜꈼꃢꈫꑌꀋꉬ，ꀿꆹꌩꇽꌩꅥꌥꄉꌩꀋꏦꀋꉆꄷꌟꑌꀋꉬ，ꃀꆹꒉꇸꒉꐛꌥꄉꒉꀋꅝꀋꉆꄷꌠꑌꀋꉬ。ꑱꈐꂷꇬꁦꋠꃌꅪꑍꂷꐯꇯꅋꅝꅋꃔꌐ，ꎆꃀꀉꑌꃅꄉꌌꅝꄺꅐ，ꋍꑍꅝꄎꊰꑋꅝꀋꄐ。ꃅꑍꋙꀋꍈ，ꃅꑍꒉꀋꄐ。ꃅꈎꃅꆪꆹꅔꊂꇓꂃꌟꃅꂃꇬꎷꐛꅹ，ꊨꏦꃤꁨꇐꄉꇐꌋꆀꁍꑗꃄꅉꉬꇮ꒔ꑍ꒔ꍈꑍꃅꌌꄉꅋꅝꇧꎭꌐ。ꀋꇊꆏꉜꎼꇁꇬ，ꌩꌦꂷꌦꁦꀑꈣꉻꀕ，ꑌꌦꑿꌦꆧꐎꈣꉻꀕ，ꀿꌦꃀꌦꆺꑳꈣꉻꀕꌠꌡ。ꊿꐥꊾꌕꏠ，ꃅꐛꊀꌕꋬ，ꅋꅝꅋꃔꊿ，ꀑꈥꀊꍆꈌ，ꅳꒉꄃꆺꀕ，ꄔ-ꀕꄹꇬꃬꂷꑳꀋꇴ，ꑗ-ꀕꄹꇬꃮꂷꑳꀋꀆ，ꉽꐯꇢꇑꐯꀋꉜ。ꆗꌺꅋꅝꇀꂷꁍꑗꇓꉅꇁꀋꉆ，ꑮꆜꅋꅝꇀꂷꐷꈭꑭꋊꇁꀋꉆ。ꑊꋌꊿꈹꋋꀋꇝ，ꇢꇑꊿꁏꋋꀋꇝ，ꃅꇴꋋꁙꅝꌠꀉꄂꉪ。ꃣꈌꌅꎭꆏꇖꎭ，ꃅꉒꁧꃴꆏꇉꃴ，ꅽꉪꈀꄸꉪꇐꑌꐯꐊ:ꃃꌺꑲꌺꆹꀉꁌꊂꌒꅑ，ꎭꌺꈚꌺꆹꐰꇑꈐꉘꅑ，ꋠꅍꈚꅍꆹꂱꑱꆧꁨꄾꎆꅑ。ꀋꊭꀋꄐꈍꃅꌉꈿꂯ，ꀋꃅꀋꑽꈍꃅꃥꆦꂯ。ꃰꊿꋚꂾꌺ，ꋙꈘꆏꊿꌦ，ꎇꃀꏜꃀꌺ，ꏜꈘꆏꎆꌦ。ꁍꑗꃄꅉꆹꌌꄉꋚꊪꒉꏿꈭꐨꁬꏿꆰꏿꌊꎆꉘꑵ，ꄷꀋꁧ，ꊿꌋꆀꎆꋚꁬꆰꑠꆹꐮꐞꀋꉆꌠ。ꁍꑗꃄꅉꏬꀋꁨꃅꋠꅍꅝꒉꇿꅐꇁꌠꄜ，ꊾꒆꊿꐛꄎꄏꂰ？ꀀꁍꌞꁍꐛ，ꀀꑗꌞꑗꐛ，ꃷꌊꃅꇴꁙꐛꄉꐔꄀꇧꎭꌐ，ꈍꃅꌣꈚꐞꄿꇁꄎꂯ？

   ꀋꉊꂴꆽꏭꆃꎭꃅꄷꋋꈚꇬ，ꁍꋦꅉꁍꋦ，ꇌꆱꅉꇌꆱ，ꃺꄿꑌꄿꐉꆏꊯꑻꋍꎃꃅ，ꀿꄿꌺꄿꐉꆏꊯꑻ꒔ꎴꉉ，ꑌꃅꑿꆫꇤꃅꈾꏿꋠꑠꈚ。ꊁꀿꌠꌕꑵꅐ:“ꅋꅝꀿ、ꎧꑱꀿ、ꊱꅞꀿ”ꃅꐛꃅꐙꀱꇬꅜ。ꉪꆈꌠꅫꃀꌱꃀꑠꆹꎲꁨꀺꁨꑵꉬꑴꇬ;ꅋꁧꎰꆈꋦ，ꅋꃨꅩꋝꀕ，ꅋꂷꆈꅊꀕ，ꅐꆹꉇꄅꅐ，ꅐꌋꉪꃅꑟꈭꐨ，ꃀꌠ，ꌠꆗꑮꆜꋋꅝꃔ，ꅝꇁꀑꇬꊎ，ꀑꃀꑓꉱꏂ ꅝꇁꑭꇬꊎ，ꑬꃶꈝꃀꍬ。ꀋꇷꇈꀋꇷ！ꀋꉊꋍꃢꇬ，ꅋꅝꊿꅫꃀꌱꃀꑠꎲꄏꉈꏠꌠꀋꉜꃅꎲꃷꅋꀠꅝꌠꌐꀋꉆ。꒔ꑠꆹꉹꁌꐥꐨꁤꇅꀕꌠꇬꉮꐪ，ꉇꑴꐧꋦꃰꊿꋈꄻꌊꌣꈚꇁꂿꄷꇬꈭ꒔ꈜꇈꅍꀉꒉꃅꐥꐘꉬ。

   ꃰꊿꐥꇈꂓꇬꉪ，ꍀꆿꌦꊂꑆꁬꋒ。ꋀꊇꆹꐥꐨꐓꂿꀕꌟꑌꀋꈁ，ꊫꂫꁤꇅꀕꌟꑌꀋꉜ，ꐰꇑꂄꌠꌌꄉꄸꌠꀠ。ꀋꉊꅋꒃꈌꀋꊐꌦꂾ;ꁮꇁꂥꅍꐤꄉꃮꉘꃬꉘꐺ，ꃌꇁꌺꇱꋦꄉꋊꇁꃤꐉꐺ，ꀿꇁꃀꅍꐤꄉꊈꇁꌐꋑꐺ。ꌺꄸꀉꂿꌺꄷ꒟ꉘꇉ，ꑿꐚꌌꁈꑿꐚꄓꉘꇉ。ꅋꅝꅋꃔꇭꀧꐕ，ꌺꇰꀁꇬꑌ，ꃈꊭꑳꁮꌸ，ꇓꇵꒉꉱꃹ，ꌩꇽꃪꇬꊎ，ꀱꇁꄷꂸꉆ。ꊿꄹꇬ:ꁧꎔꇈꑌꄏꑴꄷ，ꁦꐞꇉꂂꇁꀐꂼ。ꌩꎔꃪꑌꄏꑴꄷ，ꃰꐛꌩꇪꆗꀐꂼ。ꌺꎔꀿꑌꄏꑴꄷ，ꌺꌦꀿꂴꎍꀐꂼ！

   ꉠꐴꌞꀱꆹꁁꀱꁁꀋꀱ，ꉠꐴꉠꀱꆹꐴꈘꊖꀋꅿ。ꑷꂿꀉꒉꊿꄝꃴꇁꋃꐛꃲ，ꁍꇁꀿꃀꊿꄻꂮꐙꈠꆺꃲ;ꑳꃴꆀꐪꀋꏦꌩꃅꁨꂾꉂꌠꁮꑍꃀꑟꎑ，ꒌꈎꍯꐎꀋꋠꍯꃅꁨꂾꉂꌠꈑ꒔ꈑꆠꐊ，ꃅꌊꃬꑴꀋꐗꃬꃅꁨꂾꉂꌠꏬꉀꃅꈯꏹ，ꈌꑌꊋꈘꅔꊂꊰ，ꉆꑌꊋꈘꇉꇬꃹ。ꀿꇁꃀꐞꃀꄳꑭꊂꎭ，ꃺꇁꑋꐞꋍꁯꋍꑷꋦ，ꐋꇁꊇꐞꃄꇖꄹꊂꎭ，ꃌꇁꌺꐞꆺꑳꏂꃴꎭ。ꏂꆨꑳꐗꄀꌟꇨ，ꃮꆪꀉꂿꌦꌟꇨ，ꇗꏿꌕꆪꇗꅿꉘꁇꀕ，ꌺꍸꌕꈎꉈꑟꈺꄲꀕ。ꀿꌦꌺꀋꂿ，ꃀꌦꅪꀋꂿ，ꃀꑌꌺꎹꇖꈭꀕ，ꌺꑌꃀꎹꂲꍠꀕ，ꌺꐔꇢꇑꉩ，ꅩꍸꈝꃴꑀꌠꌐꀋꉆ……

   ꈍꃅꆎꀋꅐ，ꃰꊿꀋꌦꇿ，ꂿꃋꀋꉩꇿ。ꊰꑋꐥꌒꌌꄉ꒔ꑍꐥꎭꀠꌟꆹꄡꉪ，ꊰꑋꉪꐨꌌꄉ꒔ꑍꃆꄔꆹꄡꄀ，ꊿꐥꅋꀋꅝꑲꆏ，ꑬꅮꀉꁘꉅꅉꅑꅉꑟꑌꊿꇿꌠ，ꀋꀨꀉꁘꉅꅉꈚꅉꑟꑌꊿꊸꌠ，ꂥꏅꋚꃄꋠꑌꊾꂊꌠ。ꅋꆹꅝꑲꆏ，ꂱꀾꃢꈜꈚꑌꊿꀋꄮ，ꂷꑤꑬꅮꅑꑌꊿꀋꋽ。ꀃꑍ꒔ꄮꆏꉎꏯꑌꇬꊎꏢꇋ，ꒃꑌꇬꊎꒃ，ꈌꅑꅋꊐ，ꇇꅑꅋꒃꌟꑌꀊꅰꃅꀋꐥꆘꅝꀐ。

   ꊂꋊꌺꇖꇫꐥꌠ:ꁍꁨꌺꇖꁍꑖꃅꇴꋊ，ꉻꁨꌺꇖꉻꄝꆘꄡꅝ。ꑽꌠꂴꆽꃅꉃꌠꊁꆹꅷꄉꄺꀱꇈ，ꀑꐩꁍꎼꊿꆠꑋꑌꇮ，ꈑꐟꃆꄔꀀꑌꇮ，ꌋꐓꆄꇖꉙꄸꀕꌠꄓꑌꇮ，ꂵꆤꑵꃚꐝꄧꀕꌠꌦꑌꇮ。ꉪꊇꆹꁍꇩꅾꊫꂫ，ꁍꇩꅾꃨꎔ，ꅋꇐꑱꒉꏭꄡꈩꃅꄈꅿꍔꊱꁤꐞꄑꌠꇂꃴꄉꉌꑌꐛꏀꉪ，ꇇꅑꐛꏀꋉ。ꀿꇁꃀꎹꏓꂱꍔꃚꊫ，ꎃꇁꊒꌠꄈꅿꇗꅉꍬ，ꌧꇐꁱꂷꌷꌊꁧꐙꃅꈋꐛꏀꁏꇈꄿꌦꋩꃅꀕꋊꀊꏀꈿꄉꐂ，ꉪꊇꆹꎹꄓꈧꌺꌡ，ꊸꑭꊂꆹꎍ，ꉹꁻꁦꀑꋉ，ꉹꑍꁧꀋꑍ。

   ꈜꑌꈜꎴꇢꅉꐥꌠꏣꑟꐋꀨꊈ:ꉘꇉꌟꆏꉪꊇꐯꇯꎔꃅꂱꑱꈭꇍꐥꌠꊂꋊꌺꇖꏭꉙꂘꇬ，ꎔꇁꃨꌠꁍꇩꀉꂿꊂꈹꄉꅋꂿꅳꁖ꒔ꅋꂿꑓꋪꋘ，ꅋꂿꇵꊫꋏꃅꐥꇈꎻ！

姓名：苏呷有则

电话：13881544185

地址：布拖县嘎子街南段300号