ꄈꅿꑆꊋꎺ

   .ꌠꈚꑿꋒ.

ꄈꅿꑆꊋꇆ

ꉌꐡꌕꑍꁦꀑꉆꄉꑵ

ꉌꎭꌕꑍꆺꑳꑌꄉꉪ

ꌕꈎꅔꇫꄉꑌꆳꀋꅸ

ꌕꆪꒉꃴꀀꑌꒉꀋꌌ

ꅽꅾꈌꁯꑓꂷꎺꂯꅀ

ꅽꅾꃅꇏꂶꄟꍗꂯꆏ

ꆏꀋꑌꈧꌺꆫꄉꇵꂷꅧꇗꀕ

ꁮꐚꐏꁇꐺꌟꇨ

ꆏꀋꀀꃅꌋꏡꄉꉌꃀꄎꄹꐂ

ꌉꊭꌉꄐꉜꌟꇨ

ꃅꋯꆹꏮꁌꄝꂽꑼꑠꁥꑌ

ꁮꇁꐙꇨꄙꂿꄷ

ꐥꍂꈎꄜꑌꀋꇎꈛꎼꈝꃀꑌꀋꎴ

ꀑꇬꆺꌠꈍꑋꐥꀋꐚ

ꃺꇁꑌꐞꅡꈭꏂꊂꎭ

ꀿꇁꃀꐞꆺꑳꏂꃴꎭ

ꐋꇁꊈꐞꃄꇖꄹꊂꎭ

ꑭꇇꄚꌧꊐ

ꇵꆹꎸꉘꅑ

ꊿꂾꇓꁨꐛ

ꊿꌦꒊꄝꇉ

ꎭꀑꃌꆗꒆꆗꈹ

ꎭꐧꀋꃀꌺꄂꈘ

ꎭꂫꀿꇁꃀꈤꏣꀋꄐꌠꀋꃷ꓂

ꁦꄵꇉꏭꃚ

ꁦꀑꎺꁧꃈꊭꋲ

ꎺꑭꎺꇇꈬꐙꄎꌬꀕ

ꌭꄲꂷ꒨ꃚ

ꌭꑌꃄꐔꄀ

ꇉꅶꈬꊂꐓꇌꏭꀜꏿ

ꃰꊿꉌꃀꉪꇐꊰꑋꑟ

ꎺꇊꉈꑟꈻꌠꁮꅉꂴꅐꊂꊛꏽ

ꉩꌠꈭꏂꐉꄉꈤ

ꈄꌠꍀꆿꐉꄉꈤ

ꎔꌠꂙꃨꐉꄉꈤ

ꄈꅿꑆꊋꇆ

ꆏꎷꈌꉌꈪꑌ

ꇇꋌꒉꀋꅝ

ꎭꌺꉌꈪꑌ

ꈚꅍꋚꀋꒌ

ꑗꈜꃅꃴꁮ

ꎰꆳꋋꀋꁏ

ꑗꈜꃄꅉꁮ

ꁬꃷꋋꀋꑝ

ꐆꀵꅉꐆꎹ

ꎆꀵꅉꎆꊒ

ꃅꈻꏁꈌꄲ

ꅇꉉꅊꁦꅐ

ꂽꈻꑳꉎꆈ

ꂽꌒꁯꆮꃰ

ꊪꈅꍈꀮꀜ

ꍩꇓꐛꑿꈴ

ꋌꃀꃅꉒꃴ

ꌳꈄꁾꇓꉘꀋꇉ

ꅡꈭꉏꆂꉘꀋꇉ

ꀑꆏꉒꇁꉐꃥꍸ

ꇇꆏꌩꇁꂷꃥꍸ

ꑬꆏꈜꁧꏜꃥꍸ

ꁮꐚꉻꃶꇁꌠꂖ

ꁮꏂꊿꄵꇁꌠꒃ

ꆿꃀꊿꑝꇁꌠꅥ

ꉇꆏꁮꇁꐙꇨꉧ

ꈏꆏꊿꋅꌺꇖꄖ

ꄈꅿꑆꊋꇆ

ꆏꑓꅑꁧꇂꇈꈌꆫ

ꅳꅑꆀꇁꉷꃅꅲ

ꃤꉬꃤꉻꇬ

ꃤꈚꃤꑬꆍ

ꃣꈄꃤꁭꁉ

ꋊꉂꆹꏂꅪ

ꋊꏦꆹꃆꄔ

ꊫꏬꅔꉩꌠꅔꇱ

ꀋꍽꇉꉩꌠꇉꇱ

ꌩꆹꊨꅑꅉꇫꍸ

ꂷꆹꐞꅑꅉꇫꍸ

ꊋꏓ꒔ꃱꃅ

ꈌꃅꉬꌠꑄ

ꌳꆗꉬꌠꏃ

ꃆꇭꉬꌠꋩ

ꄈꅿꑆꊋꇆ

ꆏꎭꇔꊋꋠꀖ

ꈭꇁꈝꃀꄐ

ꈎꉪꆪꉪꐥꌒꄻꌒꉪ

ꑍꉪꌋꉪꑲꋦꌣꈚꉪ

ꁍꎹꑗꎹꌺꇖꊫꂫꌆ

ꃢꎹꈚꎹꌺꇖꋍꉻꎔ

ꆫꇁꂿꈤꂿꇌꀋꁨꊰ

ꂿꇌꆏꎹꉪꂿꄉ

ꁍꑗꈬꁍꄄꍅꀕ

ꃢꇁꈚꈤꑌꑿꀋꁨꊰ

ꑌꑿꆏꎹꉪꆫꄉ

ꊋꑌꇭꀧꊷꆣꀕ

ꆅꇁꈻꃚꆺꑳꏂꃴꎓꁨꀕ

ꁬꇁꆰꋌꅜꁌꆏꁵꄉ

ꐥꍂꈎꄜꈜꀕꎴ

ꂮꐚꁁ꓂ꆹꄛꅞ

ꋚꇁꒉꎔꆏꎹꉪꍈꄉ

ꀃꃀꂊꊪꀕ

ꋧꍸꆏꉘꃙꒆꅳꀧꊱ

ꃬꍸꆏꉘꃬꂪꃬꅍꄅ

ꌺꍸꆏꉘꃚꀨꃚꑆꈚ

ꌣꎭꊋꄏꌣꈚꌐꇈꉈ

ꁦꀑꁧꄩꑌꑿꄅꆈꐛ

ꐦꈫꇁꄿꆿꍯꇵꌅꀕ

ꑳꈫꑳꇋꌩꋙꇓꂵꀮꇗꀕ

ꁧꑭꁧꇇꂘꇁꀘꃚꐛꑾꇖ

ꁡꇤꁨꇊꑷꋦꐛꁓꄅ

ꒉꈻꐷꈭꒉ

ꄆꄑꑳꈏꄔ

ꈭꇁꈝꃀꄻ

ꋍꁯ꒔ꑷꀃꈈꁮꑭꑟ

ꑳꎔꇤꃨꀀ

ꐥꐨꌒꃅꐥ

ꃅꀹꈨꑴꃪ

ꋻꅑꉾꌠꄖ

ꎔꄩꄉꎔꄅ

ꋽꄩꄉꋽꇱ

ꄈꅿꑆꊋꇆ

ꆏꎭꇔꈚꏂꀒꁨꂵꐛꅹ

ꆫꏂꂿꇭꆎꀱꉢꂘꃅ

ꑘꃅꊖꑣꆎꀱꉢꇇꀨ

ꁦꎴꇤꌃꆎꀱꉢꊂꌷ

ꀋꄃꍯꋚꋠ

ꀋꈪꃢꈜꈚ

ꀋꏬꎧꏸꅝ

ꑭꅑꈚꀋꎼ

ꇇꅑꑘꀋꃅ

ꄈꅿꑆꊋꇆ

ꆏꎹꄓꈨꑭꌟꃅꁧꇂꇉꌸꐽ

ꁯꋒꉐꌦꌟꃅꁬꇁꆰꌸꐽ

ꐧꇁꃰꊿꆹ

ꁦꀑꂙꃨꊴꌊꅽꅾꑆꊋꌞꂾꉂ

ꐎꃅꏂꄣꌌꄉꅽꄹꈁꁠꏿꂾꉂ

ꃅꃴꏷꋦꃷꌐꑌ

ꄈꅿꑆꊋꉉꀋꌐ

ꅉꃴꇓꎍꃷꌐꑌ

ꄈꅿꑆꊋꉉꀋꌐ

ꅔꐎꏜꋦꃷꌐꑌ

ꄈꅿꑆꊋꉉꀋꌐ

作者：苏呷有则   电话：13881544185   地址：布拖县嘎子街南段300号